၄၉. တိရစ္ဆာနဂတဝတ္ထု

၁၁၁. ဒေဝသမ္ပတ္တိသဒိသံ ဣဿရိယသမ္ပတ္တိံ အနုဘဝန္တောပိ သော နာဂေါ ကသ္မာ နာဂယောနိယာ အဋ္ဋီယတီတိ အာဟ ‘‘ကိဉ္စာပီ’’တိအာဒိ.

တတ္ထ ကိဉ္စာပိ အနုဘောတီတိ သမ္ဗန္ဓော. ကိဉ္စာပိသဒ္ဒေါ ဟေတ္ထ သမ္ဘာဝနာဇောတကော၊ ပနသဒ္ဒေါ ဂရဟတ္ထဇောတကော. ကုသလဝိပါကေနာတိ အဟေတုကကုသလဝိပါကေန. တဿာတိ နာဂဿ. သဇာတိယာတိ သမာနဇာတိယာ နာဂိယာ. ဥဒကသဉ္စာရိမဏ္ဍူကဘက္ခန္တိ ဥဒကေ သဉ္စရဏသီလံ မဏ္ဍူကသင်္ခါတံ ဘက္ခံ ပါတုဘဝတီတိ ယောဇနာ. သောတိ နာဂေါ. အဋ္ဋီယတီတိ အရမဏံ ပီဠိယတိ. ဟရာယတီတိ ဧတ္ထ ဟရေဓာတု လဇ္ဇနတ္ထောတိ အာဟ ‘‘လဇ္ဇတီ’’တိ. ဧကာရန္တော ဓာတု ဘူဝါဒိဂဏိကော (သဒ္ဒနီတိဓာတုမာလာယံ ၁၆ ရကာရန္တဓာတု). ဇိဂုစ္ဆတီတိ ဧတ္ထ ဂုပဓာတုယာ ကမ္မံ ဒဿေန္တော အာဟ ‘‘အတ္တဘာဝ’’န္တိ. ‘‘တဿ ဘိက္ခုနော’’တိပဒဿ ‘‘နိက္ခန္တေ’’တိပဒေန ယောဇိတဗ္ဗတ္တာ ဘုမ္မတ္ထေ သာမိဝစနန္တိ အာဟ ‘‘တသ္မိံ ဘိက္ခုသ္မိ’’န္တိ. အထ ဝါ တဿ ဘိက္ခုနောတိ သာမိယောဂတ္တာ ‘‘နိက္ခန္တေ’’တိ ဧတ္ထ ဘာဝတ္ထေ မာနပစ္စယောတိ အာဟ ‘‘နိက္ခမနေ’’တိ. ဣမိနာ နိက္ခန္တေတိ ဧတ္ထ န အန္တပစ္စယော၊ မာနပစ္စယဿေဝ အန္တဘာဝံ ကတွာ ဝုတ္တောတိ ဒဿေတိ. ဝိဿဋ္ဌောတိ သတိဝိဿဇ္ဇိတော. တသ္မိန္တိ ဘိက္ခုမှိ. ကပိမိဒ္ဓဝသေနေဝါတိ ကပိနော မိဒ္ဓဝသေန ဧဝ. အထ ဝါ ကပိမိဒ္ဓဝသေန နိဒ္ဒါယန္တော ဣဝ နိဒ္ဒါယန္တောတိ ယောဇနာ. ပဋိနိပဇ္ဇီတိ ပုန နိပဇ္ဇိ. ဝိဿရမကာသီတိ ဧတ္ထ ဝိသဒ္ဒေါ ဝိရူပတ္ထဇောတကော၊ သရသဒ္ဒေါ သဒ္ဒဝါစကောတိ ဒဿေန္တော အာဟ ‘‘ဝိရူပံ မဟာသဒ္ဒမကာသီ’’တိ.

‘‘အကာရဿ လောပံ ကတွာ’’တိ ဣမိနာ တုမှေ ခေါတ္ထာတိ ဧတ္ထ ‘‘တုမှေ ခေါ အတ္ထာ’’တိ ပဒဝိဘာဂံ ကတွာ ဩကာရတော ပရဿ အကာရဿ လောပံ ဒဿေတိ. ‘‘အကာရဿာလောပ’’န္တိပိ ပါဌော. ဧဝဉှိ သတိ အကာရဿ အလောပံ ကတွာတိ အတ္ထော ဒဋ္ဌဗ္ဗော. ဣမိနာ ‘‘တုမှေ ခေါ အတ္ထာ’’တိ ပဒစ္ဆေဒံ ကတွာ အကာရေ ပရေ ဩကာရဿ ဝကာရံ ကတွာ တုမှေ ခွတ္ထာ’’တိ ပါဌော ဒဿိတော. ကသ္မာ ဣမသ္မိံ ဓမ္မဝိနယေ အဝိရူဠှိဓမ္မာတိ အာဟ ‘‘ဈာန။ပေ။ အဘဗ္ဗတ္တာ’’တိ. ‘‘ဘဝထာ’’တိ ဣမိနာ အတ္ထာတိ ဧတ္ထ အသဓာတု သတ္တတ္ထဝါစကော ထဝိဘတ္တီတိ ဒဿေတိ. သဇာတိယာတိ ဧတ္ထ သမာနာ ဇာတိ ဧတိဿာတိ သဇာတီတိ ဝုတ္တေ နာဂီ ဧဝါတိ အာဟ ‘‘နာဂိယာ ဧဝါ’’တိ. မနုဿိတ္ထိအာဒီတိ ဧတ္ထ အာဒိသဒ္ဒေန တိရစ္ဆာနဂတိတ္ထီပေတိတ္ထီဒေဝိတ္ထိယော သင်္ဂဏှာတိ. ‘‘ဒွေမေ ဘိက္ခဝေ ပစ္စယာ’’တိ ဒေသနာ သာဝသေသဒေသနာတိ ဒဿေန္တော အာဟ ‘‘ဧတ္ထ စာ’’တိ. ဧတ္ထာတိ တိရစ္ဆာနဂတဝတ္ထုမှိ. အဘိဏှန္တိ အဘိက္ခဏံ ပုနပ္ပုနန္တိ အတ္ထော.

တိရစ္ဆာနဂတောတိ ဧတ္ထ ကိံ အပါယပရိယာပန္နော ဒုဂ္ဂတိအဟေတုကပဋိသန္ဓိကောဝါဓိပ္ပေတောတိ အာဟ ‘‘နာဂေါ ဝါ ဟောတူ’’တိအာဒိ.