၄၈. တိတ္ထိယပက္ကန္တကကထာ

၁၁၀. ပက္ကမတီတိ ပက္ကန္တော၊ ‘‘ပဝိဋ္ဌော’’တိ ဣမိနာ ကမုဓာတုယာ ပဒဝိက္ခေပတ္ထံ ဒဿေတိ၊ ဣစ္ဆာကန္တိအတ္ထေ နိဝတ္တေတိ. သောတိ တိတ္ထိယပက္ကန္တကော. တတြာတိ တိတ္ထိယပက္ကန္တကေ. ဥပသမ္ပန္နော ဘိက္ခု ဂစ္ဆတီတိ သမ္ဗန္ဓော. တေသန္တိ တိတ္ထိယာနံ. ‘‘တိတ္ထိယော ဘဝိဿာမီ’’တိ ပုဗ္ဗေဝ လဒ္ဓိဂဟိတတ္တာ ဝုတ္တံ ‘‘လိင်္ဂေ အာဒိန္နမတ္တေ’’တိ. ကုသစီရာဒီနီတိ ဧတ္ထ ကုသော ဝုစ္စတိ သလာကာ. စီရောတိ ပန္တိ၊ အာဝလီတိ အတ္ထော. ကုသေ ရဇ္ဇုနာ အာဝုနိတွာ ကတော စီရော ကုသစီရော၊ သော အာဒိ ယေသံ တာနီတိ ကုသစီရာဒီနိ. အာဒိသဒ္ဒေန ဖလကစီရာဒယော သင်္ဂဏှာတိ. ကုသတိဏေဟိ ကတော စီရော ကုသစီရောတိပိ ဝဒန္တိ. နဂ္ဂေါတိ အစေလကော. အာဇီဝကောတိ အစေလကဝတမာဒါယ ဇီဝတီတိ အာဇီဝကော. တေသန္တိ အာဇီဝကာနံ. ဩဝဒိတော ဟုတွာတိ သမ္ဗန္ဓော.

ကိန္တိ ကိံ ဝတံ. လုဉ္စာပေတီတိ အပနယာပေတိ. မောရပိဉ္ဆာဒီနီတိ ဧတ္ထ ပိဉ္ဆံ ဝုစ္စတိ ပက္ခော. သော ဟိ ပိဉ္ဆတိ အာကာသေ ဂစ္ဆတိ အနေနာတိ ပိဉ္ဆန္တိ ဝုစ္စတိ. ပိဆိ ဂတိယန္တိ ဓာတုပါဌော. မောရဿ ပိဉ္ဆံ မောရပိဉ္ဆံ၊ တံ အာဒိ ယေသံ တာနီတိ မောရပိဉ္ဆာဒီနိ. အာဒိသဒ္ဒေန ဥလူကပိဉ္ဆာဒယော သင်္ဂဏှာတိ. ယာဝ န သမ္ပဋိစ္ဆတီတိ ယာဝ လဒ္ဓိံ န သမ္ပဋိစ္ဆတိ. နန္တိ ဝီမံသမာနံ ဘိက္ခုံ. လဒ္ဓီတိ တိတ္ထိယလဒ္ဓိ. ရက္ခတီတိ တိတ္ထိယပက္ကန္တကတော ရက္ခတိ. လဒ္ဓိယာ အဘာဝေန တိတ္ထိယပက္ကန္တကော န ဟောတီတိ အဓိပ္ပါယော. အစ္ဆိဒ္ဒစီဝရောတိ ဧတ္ထ အာကာရော ကောဓတ္ထော၊ အဍ္ဍတ္ထော ဝါ ဟောတိ၊ ဆိဒ္ဒသဒ္ဒေါ ဒူသနတ္ထော ဟောတိ. တသ္မာ အာကောဓေန အဍ္ဍေန ဝါ ဆိဒ္ဒေါ ဒူသိတောတိ အစ္ဆိဒ္ဒေါတိ အတ္ထော ဒဋ္ဌဗ္ဗော. ‘‘အစ္ဆိန္နော’’တိပိ ပါဌော. အစ္ဆိဒ္ဒံ စီဝရမေတဿာတိ အစ္ဆိဒ္ဒစီဝရော. တိတ္ထာယတနန္တိ တိတ္ထီနံ နိဝါသဋ္ဌာနံ၊ တိတ္ထိယာနံ ဥပဿယန္တိ အတ္ထော.