၄၈. ထေယျသံဝါသကဝတ္ထုကထာ

၁၁၀. ပါရိဇညပတ္တဿာတိ ပရိဟာယတီတိ ပရိဇာနိ၊ ဣဿရိယဘောဂါဒိ၊ တဿ ဘာဝေါ ပါရိဇညံ၊ ဣဿရိယဘောဂါဒိက္ခယော၊ တံ ပတ္တောတိ ပါရိဇညပတ္တော၊ တဿ. ‘‘ပါရိဇုညပတ္တဿာ’’တိပိ ဥကာရေန သဟ ပါဌော အတ္ထိ. ခီဏကောလညောတိ ဧတ္ထ ကုလေ ဇာတာ ကောလညာ၊ ဏျပစ္စယော၊ နကာရာဂမော. ခီဏာ ကောလညာ အဿာတိ ခီဏကောလညောတိ ဝစနတ္ထံ ဒဿေန္တော အာဟ ‘‘မာတိပက္ခပိတိပက္ခတော’’တိအာဒိ. တတ္ထ မာတိပက္ခပိတိပက္ခတောတိ မာတုယာ ပက္ခော မာတိပက္ခော၊ ပိတုနော ပက္ခော ပိတိပက္ခော၊ မာတိပက္ခော စ ပိတိပက္ခော စ မာတိပက္ခပိတိပက္ခာ. ဖာတိံ ကာတုန္တိ ဧတ္ထ ဖာ-ဓာတု ဝဍ္ဎနတ္ထောတိ အာဟ ‘‘ဝဍ္ဎေတု’’န္တိ. ‘‘ပုစ္ဆိယမာနော’’တိ ဣမိနာ အနုယုဉ္ဇိယမာနောတိ ဧတ္ထ အနုတျူပသဂ္ဂဝသေန ယုဇသဒ္ဒေါ ပုစ္ဆနတ္ထောတိ ဒဿေတိ.

ထေယျသံဝါသကောတိ ထေနနံ ထေယျံ နကာရဿ ယကာရံ ကတွာ၊ ထေယျာယ သံဝါသကော ဣမဿာတိ ထေယျသံဝါသကော. ဧတ္ထ စ န ကေဝလံ ဝဿဂဏနာဒိကောယေဝ သံဝါသော နာမ ဟောတိ၊ အထ ခေါ ထေယျာယ လိင်္ဂဂဟဏမ္ပိ သံဝါသောယေဝ နာမ. တသ္မာ တဿ တိဝိဓဘာဝံ ဒဿေန္တော အာဟ ‘‘တယော’’တိအာဒိ. တတ္ထ လိင်္ဂံ ထေနေတီတိ လိင်္ဂထေနကော၊ ဧသေဝ နယော ဣတရေသုပိ. တမတ္ထံ ဝိတ္ထာရေန္တော အာဟ ‘‘တတ္ထာ’’တိအာဒိ. တတ္ထ ယောတိ ထေယျသံဝါသကော. လိင်္ဂမတ္တဿေဝါတိ ဧတ္ထ မတ္တသဒ္ဒေန သံဝါသာဒယော နိဝတ္တေတိ.

ဝိဒေသန္တိ အတ္တနော ဒေသတော ဝိယောဂံ ဒေသံ. ဝိသဒ္ဒေါ ဟေတ္ထ ဝိယောဂတ္ထဝါစကော. အထ ဝါ ဝိ ဒူရံ ဒေသံ. ဝိသဒ္ဒေါ ဟေတ္ထ ဒူရတ္ထဝါစကော. မုသာတိ အဘူတတ္ထေ ဒုတိယန္တနိပါတော၊ အဘူတံ ဝစနန္တိ အတ္ထော. ပဋိဗာဟတီတိ အညေ နိဝါရေတိ. သံဝါသထေနကော နာမာတိ ဧတ္ထ ကော သံဝါသော နာမ၊ နနု ဧကကမ္မာဒိကောတိ အာဟ ‘‘ဘိက္ခုဝဿဂဏနာဒိကော’’တိအာဒိ. ဘိက္ခုဝဿဂဏနာဒိကောတိ အာဒိသဒ္ဒေန ယထာဝုဍ္ဎံ ဝန္ဒနသာဒိယနံ အာသနပဋိဗာဟနံ ဥပေါသထပဝါရဏာဒီသု သန္ဒိဿနန္တိ ဣမာနိ သင်္ဂဏှာတိ. ‘‘ကိရိယဘေဒေါ’’တိ ဣမိနာ သံ ဧကတော ဝသိယတိ အနေနာတိ သံဝါသောတိ ဝစနတ္ထေန ကိရိယဘေဒေါ သံဝါသော နာမာတိ ဒဿေတိ. ဣမသ္မိံ အတ္ထေတိ ဣမသ္မိံ ဝတ္ထုမှိ၊ ဣမသ္မိံ ဌာနေတိ အတ္ထော. ဣမိနာ ပါရာဇိကာဒိဋ္ဌာနေ ပန ဧကကမ္မာဒိကော သံဝါသော နာမာတိ ဒဿေတိ.

‘‘လိင်္ဂဿ စေဝ သံဝါသဿ စာ’’တိ ဣမိနာ ဥဘယထေနကောတိ ဧတ္ထ ဥဘယသရူပံ ဒဿေတိ.

ဧတ္ထာတိ ထေယျသံဝါသကဋ္ဌာနေ. ရာဇ။ပေ။ ဘယေဟိ ဝါတိ ဧတ္ထ ဘယသဒ္ဒေါ ပစ္စေကံ ယောဇေတဗ္ဗော. ရာဇဘယေန စ ဒုဗ္ဘိက္ခဘယေန စ ကန္တာရဘယေန စ ရောဂဘယေန စ ဝေရိဘယေန စာတိ ဟိ အတ္ထော. စီဝရဂဟဏတ္ထန္တိ စီဝရာဟရဏတ္ထံ၊ အယမေဝ ဝါ ပါဌော. ဝါသဒ္ဒေါ ဟေတွတ္ထံ ဝါ သမ္ပဒါနတ္ထံ ဝါ သမ္ပိဏ္ဍေတိ. အယံ ဂါထာ ဝိဘတ္တိယာ ဥပ္ပဋိပါဋိတ္တာ ဘဂ္ဂရီတိသင်္ခါတာ အလင်္ကာရဒေါသာ န မုတ္တာ. လိင်္ဂန္တိ သမဏလိင်္ဂံ. ဣဓာတိ ဣမသ္မိံ သာသနေ.

နာဓိဝါသေတီတိ န သမ္ပဋိစ္ဆတိ. ယာဝါတိ ယတ္တကံ ကာလံ၊ အယံ ပနေတ္ထ ယောဇနာ – ဣဓ ယော ရာဇ။ပေ။ ဘယေန ဝါ စီဝရဂဟဏတ္ထံ ဝါ လိင်္ဂံ အာဒိယတိ၊ သော သုဒ္ဓမာနသော ဟုတွာ ယာဝ သံဝါသံ နာဓိဝါသေတိ၊ တာဝ ဧသော ‘‘ထေယျသံဝါသကော နာမာ’’တိ န ဝုစ္စတီတိ.

တတြာတိ တာသု ဂါထာသု. ဣဓာတိ ဣမသ္မိံ သာသနေ. ဧဝန္တိ လိင်္ဂေ ဂဟိယမာနေ. တသ္မိန္တိ ဇနေ. အနောသရိတွာဝါတိ အနောက္ကမိတွာဝ. လိင်္ဂံ အပနေတွာတိ သယံ ဂဟိတံ သမဏလိင်္ဂံ ဝိနာသေတွာ. ပဗ္ဗဇိတာလယန္တိ ပဗ္ဗဇိတဆာယံ. ပုဗ္ဗေတိ သံဝါသထေနကေ.

သဗ္ဗပါသဏ္ဍိယဘတ္တာနီတိ သဗ္ဗာနိ ပါသဏ္ဍံ ဥဒ္ဒိဿ ဒိန္နာနိ ဘတ္တာနိ.

သတ္တေ ဝဟတီတိ သတ္တဝါဟော. ဝိရမိတဗ္ဗန္တိ ဝေရံ၊ တံ ပဝတ္တေတီတိ ဝေရိကော. ကာယေန ပရိဟရိတဗ္ဗာနီတိ ကာယပရိဟာရိယာနိ. တန္တိ တုဝံ. ဟီနာယာဝတ္တဘာဝန္တိ ဟီနာယ ဂိဟိဘာဝါယ အာဝတ္တဘာဝံ.

ဥပ္ပဗ္ဗဇိတွာတိ ပဗ္ဗဇဝိယောဂံ ကတွာ. တမတ္ထန္တိ ဥပ္ပဗ္ဗဇိတသင်္ခါတမတ္ထံ. အဿာတိ မဟာသာမဏေရဿ.

မဟန္တော ဝါတိ ဧတ္ထ ဝါသဒ္ဒေါ ဂရဟတ္ထော. ပဂေဝ ဒဟရောတိ ဒဿေတိ. အဗျတ္တော ဟောတီတိ ယောဇနာ. သောတိ သာမဏေရော.

ဝစ္ဆဂေါရက္ခာဒီနီတိ ဧတ္ထ ဝစ္ဆောတိ တရုဏဂေါဏော. သော ဟိ မာတုသန္တိကေ ဝသတီတိ ဝစ္ဆော. မာတုယာ ဝိယောဂကာလေ ဝါ ဝဿတီတိ ဝစ္ဆောတိ ဝုစ္စတိ. ဣမိနာ ဒမ္မဂဝဇရဂ္ဂဝါပိ သာမညတော ဂဟိတာ. ဂေါ ဝုစ္စတိ ခေတ္တဘူမိ. ဝစ္ဆော စ ဂေါ စ ဝစ္ဆဂဝါ၊ တေသံ ရက္ခနံ ဝစ္ဆဂေါရက္ခော၊ သော အာဒိ ယေသံ ကသိကမ္မာဒီနန္တိ ဝစ္ဆဂေါရက္ခာဒီနိ. ‘‘သူပသမ္ပန္နော’’တိ ဣမိနာ ဂဟဋ္ဌမ္ပိ သစေ ဥပသမ္ပာဒေတိ၊ သူပသမ္ပန္နောတိ ဒဿေတိ. အနုပသမ္ပန္နကာလေယေဝါတိ သာမဏေရကာလေယေဝ. ဝိနယဝိနိစ္ဆယေတိ ဝိနယေ ဝုတ္တဿ ထေယျသံဝါသကဿ ဝိနိစ္ဆယေ. ထေယျသံဝါသကော ဟောတိ လိင်္ဂဿ အပနီတတ္တာ.

ထေယျသံဝါသကော န ဟောတိ သလိင်္ဂေ ဌိတတ္တာ. အယမ္ပိ ထေယျသံဝါသကော န ဟောတိ ကာသာယေ သဥဿာဟတ္တာ. ထေယျသံဝါသကော ဟောတိ ကာသာယေ ဓုရဿ နိက္ခိတ္တတ္တာ.

ထေယျသံဝါသကော န ဟောတိ သလိင်္ဂေ ဌိတတ္တာ. နေဝ ထေယျသံဝါသကော ဟောတိ ကာသာယေ သဥဿာဟတ္တာ. မေထုနသေဝနာဒီဟီတိအာဒိသဒ္ဒေန ပါဏာတိပါတာဒယော သင်္ဂဏှာတိ. ထေယျသံဝါသကော ဟောတိ ကာသာယေ ဓုရဿ နိက္ခိတ္တတ္တာ. ဩဝဋ္ဋိကန္တိ အဓောဝဋ္ဋေန ကရဏံ. ရက္ခတိ တာဝါတိ တာဝ ရက္ခတိ ဝီမံသနေန နိဝါသိတတ္တာ. လိင်္ဂန္တိ သမဏလိင်္ဂံ. ထေယျသံဝါသကော ဟောတိ ဂိဟိလိင်္ဂဿ သမ္ပဋိစ္ဆိတတ္တာ.

ဝီမံသတိ ဝါ သမ္ပဋိစ္ဆတိ ဝါ ရက္ခတိယေဝ ဩဒါတဝတ္ထဿ အန္တောကာသာယဘာဝတော. ‘‘ဘိက္ခုနိယာပိ ဧသေဝ နယော’’တိ ဝုတ္တမေဝတ္ထံ ဝိဘာဝေန္တော အာဟ ‘‘သာပီ’’တိအာဒိ.

ဝုဍ္ဎပဗ္ဗဇိတော သာမဏေရောတိ သမ္ဗန္ဓော. ပါဠိယမ္ပီတိ ပန္တိယမ္ပိ. သေနော မံသပေသိံ ဂဟေတွာ ဂစ္ဆတိ ဝိယ ဘတ္တပိဏ္ဍေ ပတ္တံ ဥပနာမေတွာ ဂဟေတွာ ဂစ္ဆတိ. ထေယျသံဝါသကော န ဟောတိ ဝဿာနံ အဂဏနတ္တာ.