၄၇. ပဏ္ဍကဝတ္ထုကထာ

၁၀၉. ဒဟရတရုဏသဒ္ဒါနံ ဝေဝစနတ္တာ ဝုတ္တံ ‘‘ဒဟရေ။ပေ။ တရုဏေ’’တိ. မောဠိဂလ္လသဒ္ဒေါ ထူလသရီရဝါစကော အနိပ္ဖန္နပါဋိပဒိကောတိ အာဟ ‘‘မောဠိဂလ္လေတိ ထူလသရီရေ’’တိ. ဟတ္ထိဘဏ္ဍေတိ ဧတ္ထ ဟတ္ထိသင်္ခါတံ ဘဏ္ဍံ ဧတေသန္တိ ဟတ္ထိဘဏ္ဍာတိ ဝုတ္တေ ဟတ္ထိဂေါပကာတိ အာဟ ‘‘ဟတ္ထိဂေါပကေ’’တိ. အဘိဓာနေ (အဘိဓာနပ္ပဒီပိကာယံ ၃၆၇ ဂါထာယံ) ပန ‘‘ဟတ္ထိမေဏ္ဍော’’တိ ပါဌော အတ္ထိ.

ပဏ္ဍကောတိ ပဍတိ ဝိကလဘာဝံ ဂစ္ဆတီတိ ပဏ္ဍကော. သံခေပေန ဝုတ္တမတ္ထံ ဝိတ္ထာရေန ဒဿေန္တော အာဟ ‘‘တတ္ထာ’’တိအာဒိ. တတ္ထ ယဿာတိ ပဏ္ဍကဿ. အသုစိနာတိ သမ္ဘဝေန. အာသိတ္တဿာတိ အာသိဉ္စိတဗ္ဗဿ. ဣမိနာ အသုစိနာ မုခေ အာသိဉ္စိတဗ္ဗောတိ အာသိတ္တောတိ ဝစနတ္ထံ ဒဿေတိ. အယန္တိ ပဏ္ဍကော. အဇ္ဈာစာရန္တိ မေထုနဇ္ဈာစာရံ. ‘‘ဥသူယာယ ဥပ္ပန္နာယာ’’တိဣမိနာ ဥသူယတီတိ ဥသူယောတိ ဝစနတ္ထံ ဒဿေတိ. ဥပက္ကမေနာတိ ဝါယာမေန. ဗီဇာနီတိ အဏ္ဍာနိ. ဣမိနာ ဥပက္ကမေန ဧတသ္မာ ဗီဇာနိ အပနီတာနီတိ ဩပက္ကမိကောတိ ဝစနတ္ထံ ဒဿေတိ. ပက္ခေ ပဝတ္တော ပဏ္ဍကော ပက္ခပဏ္ဍကော၊ ပက္ခေ ပရိဠာဟဝူပသမော ပဏ္ဍကော ပက္ခပဏ္ဍကောတိ ဝစနတ္ထံ ဒဿေန္တော အာဟ ‘‘ဧကစ္စော ပနာ’’တိအာဒိ. တတ္ထ ပုဗ္ဗဝစနတ္ထေ ပက္ခေတိ ကာလပက္ခေတိ အတ္ထော ဒဋ္ဌဗ္ဗော. ပစ္ဆိမဝစနတ္ထေ ပက္ခေတိ ဇုဏှပက္ခေတိ အတ္ထော ဒဋ္ဌဗ္ဗော. ‘‘အကုသလဝိပါကာနုဘာဝေနာ’’တိ ပဒံ ‘‘ပဏ္ဍကော ဟောတီ’’တိပဒေယေဝ သမ္ဗန္ဓိတဗ္ဗံ. အဿာတိ ပဏ္ဍကဿ. နပုံသကပဏ္ဍကောတိ ပုရိသော ဝိယ သာတိသယံ ပစ္စာမိတ္တေ န ပုံသကေတိ အဘိမဒ္ဒနံ ကာတုံ န သက္ကောတီတိ နပုံသကော. န ပုမာ န ဣတ္ထီတိ နပုံသကောတိ ကတွာ နပုမနဣတ္ထိသဒ္ဒဿ နိရုတ္တိနယေန နပုံသကကရဏမ္ပိ ဝဒန္တိ. နပုံသကောယေဝ ပဏ္ဍကော နပုံသကပဏ္ဍကော. တေသူတိ ပဉ္စသု ပဏ္ဍကေသု. တေသုပီတိ ဩပက္ကမိကာဒီသု တီသုပိ. ‘‘ယသ္မိံ ပက္ခေ’’တိ ဣမိနာ ပက္ခေ ပက္ခေ ပဏ္ဍကဘာဝံ နိဝတ္တေတိ. အဿာတိ ပဏ္ဍကဿ. ဧတ္ထာတိ ပဉ္စသု ပဏ္ဍကေသု. သောပီတိ ပဏ္ဍကောပိ. ဣတောတိ ပဏ္ဍကဝါရတော. ‘‘ဧသေဝ နယော’’တိ ဣမိနာ လိင်္ဂနာသနမေဝ အတိဒိသတိ.