၄၃. အနာပုစ္ဆာဝရဏဝတ္ထုအာဒိကထာ

၁၀၈. ဥပဇ္ဈာယံ အနာပုစ္ဆာတိ ဧတ္ထ ဥပဇ္ဈာယံ အနာပုစ္ဆိတွာ. သဗ္ဗထာ ကိံ န ကာတဗ္ဗန္တိ အာဟ ‘‘တုမှာက’’န္တိအာဒိ. ဒဏ္ဍကမ္မမဿာတိ ဒဏ္ဍကမ္မံ အဿ. အဿာတိ သာမဏေရဿ. သဒ္ဓိံ ဥပဇ္ဈာယေန ဝိဟရန္တီတိ သဒ္ဓိဝိဟာရိကာ. နိဿယာစရိယာဒီနံ အန္တေ သမီပေ ဝသန္တီတိ အန္တေဝါသိကာ၊ ဥပသမ္ပန္နာယေဝ.

အပလာဠေန္တီတိ ဧတ္ထ လဠ ဥပသေဝါယန္တိ ဓာတုပါဌေသု ဝုတ္တတ္တာ (သဒ္ဒနီတိဓာတုမာလာယံ ၁၈ ဠကာရန္တဓာတု) ထေရေ လဠတော ဥပသေဝတော အပဂမေန္တီတိ အတ္ထော ဒဋ္ဌဗ္ဗော. ဣဓ ပန အဓိပ္ပါယတ္ထံ ဒဿေန္တော အာဟ ‘‘တုမှာက’’န္တိအာဒိ. အပလာဠေတဗ္ဗာတိ အညံ လဠတော ဥပသေဝတော အပဂမေတဗ္ဗာ. ပရိသဘူတေ သာမဏေရူပသမ္ပန္နေတိ ယောဇနာ. အာဒီနဝန္တိ ဒုဿီလံ နိဿာယ ဝသနဿ ဒေါသံ. နှာယိတုံ အာဂတေန တယာ ဂူထမက္ခနံ ကတံ ဝိယ ဒုဿီလံ နိဿာယ ဝိဟရန္တေန ဒုဿီလံ ကတန္တိ ယောဇနာ. ‘‘ဒုဿီလ’’န္တိ ပဒံ ပုရိမပစ္ဆိမပဒါပေက္ခံ၊ တသ္မာ ဒွိန္နံ ပဒါနံ မဇ္ဈေ ဝုတ္တံ. တတ္ထ ပုရိမပဒါပေက္ခကာလေ ဝုတ္တကမ္မံ၊ ပစ္ဆိမပဒါပေက္ခကာလေ အဝုတ္တကမ္မံ. သောတိ သာမဏေရူပသမ္ပန္နော. ဥပဇ္ဈာယံ ဝါတိ သာမဏေရံ သန္ဓာယ ဝုတ္တံ. နိဿယံ ဝါတိ ဥပသမ္ပန္နံ သန္ဓာယ ဝုတ္တံ.

တီသု နာသနာသူတိ သံဝါသလိင်္ဂဒဏ္ဍကမ္မနာသနသင်္ခါတာသု တီသု နာသနာသု. ယောတိ သာမဏေရော. နာနာအာပတ္တိယောတိ ပါရာဇိကထုလ္လစ္စယ ပါစိတ္တိယာပတ္တိယော. ဟီတိ သစ္စံ၊ ယသ္မာ ဝါ. ကုန္ထကိပိလ္လိကမ္ပီတိ ဧတ္ထ ပါဏခါဒကေဟိ သတ္တေဟိ ကုထိယတိ ဟိံသိယတီတိ ကုန္ထော၊ ကုံ ပထဝိံ ဝါ ဓာရေတီတိ ကုန္ဓော.

ကိမိယေဝ ပိလ္လိကံ ပေါတကံ ကိပိလ္လိကံ မိကာရဿ လောပံ ကတွာ. ပိလ္လိကသဒ္ဒေါ ဟိ ပေါတကပရိယာယော. ကိမီနံ၊ ကိမီသု ဝါ ပိလ္လိကံ ကိပိလ္လိကံ. နာသေတဗ္ဗတံယေဝါတိ လိင်္ဂေန နာသေတဗ္ဗဘာဝမေဝ. တာဝဒေဝါတိ တသ္မိံ မာရဏဘိန္ဒနက္ခဏေယေဝ. အဿာတိ သာမဏေရဿ. သေနာသနဂ္ဂါဟော စ ပဋိပ္ပဿမ္ဘတီတိ ဝဿစ္ဆေဒေါ ဟောတီတိ အဓိပ္ပါယော. အာကိဏ္ဏဒေါသောဝါတိ လိင်္ဂနာသနဒေါသေန စ ဒဏ္ဍကမ္မနာသနဒေါသေန စ အာကုလဒေါသောဝ. ဝိရဇ္ဈိတွာတိ ဝိရာဓေတွာ. ယထာနိဝတ္ထပါရုတဿေဝ သာမဏေရဿာတိ သမ္ဗန္ဓော. တသ္မာတိ သရဏဂမနဥပသမ္ပဒကမ္မဝါစာနံ သဒိသတ္တာ. ဘိက္ခုနာ သမာဒိန္နံ ဝိယ ဣမိနာပိ သမာဒိန္နာနေဝ ဟောန္တီတိ ယောဇနာ. ဧဝန္တိ ဧဝမိဇ္ဈနေ၊ သမာဒိန္နေ ဝါ. ဒဠှီကရဏတ္ထန္တိ သိက္ခာပဒါနံ ဒဠှီကရဏတ္ထံ. ပတိဋ္ဌာပနတ္ထန္တိ သာမဏေရဿ ပတိဋ္ဌာပနတ္ထံ. လစ္ဆတီတိ လဘိဿတိ. သံဃေန ဒါတဗ္ဗောတိ သမ္ဗန္ဓော. အပလောကေတွာတိ သံဃံ အာပုစ္ဆိတွာ. ဣမိနာ ဆိန္နဝဿကံ ဒဿေတိ.

အဒိန္နာဒါနေ တိဏသလာကမတ္တေနာပိ ဝတ္ထုနာ အသမဏော ဟောတီတိ ယောဇနာ. ဝိပ္ပဋိပတ္တိယာတိ ဝိကာရေန ပဋိပဇ္ဇနတော. ဘဏိတေတိ ဘဏနေ. ဇာနိတွာတိ ဇာနိတွာ ဧဝ. ဧဝကာရော ဟေတ္ထ အဇ္ဈာဟရိတဗ္ဗော၊ တေန ဝုတ္တံ ‘‘န အဇာနိတွာ’’တိ. ယာနိ ပဉ္စ သိက္ခာပဒါနီတိ ယောဇနာ. အဿာတိ သာမဏေရဿ. ဌပနတ္ထာယာတိ သိက္ခာပဒါနံ ဌပနတ္ထာယ. အယန္တိ ပါရာဇိကော. ဝိသေသောတိ ဘိက္ခူနံ ပါစိတ္တိယတော ဝိသေသော.

ပဋိပက္ခဝသေနာတိ ‘‘အနရဟံ အသမ္မာသမ္ဗုဒ္ဓေါ’’တိအာဒိနာ စ ‘‘ဒွါက္ခာတော’’တိအာဒိနာ စ ‘‘ဒုပ္ပဋိပ္ပန္နော’’တိအာဒိနာ စ ပဋိဝိရုဒ္ဓဝသေန ဂရဟန္တော သာမဏေရော နိဝါရေတဗ္ဗောတိ သမ္ဗန္ဓော. ကဏ္ဍကနာသနာယာတိ ကဏ္ဍကနာမကဿ သာမဏေရဿ ဒဏ္ဍကမ္မနာသနာယ. တံ လဒ္ဓိန္တိ အဝဏ္ဏဘာသနဒိဋ္ဌိံ. အစ္စယန္တိ အတိက္ကမံ၊ ဒေါသံ ဝါ. ဒေသာပေတဗ္ဗောတိ ‘‘အစ္စယော မံ ဘန္တေ အစ္စဂမာ’’တိအာဒိနာ ဒေသာပေတဗ္ဗာ. တံ ယုတ္တန္တိ ‘‘လိင်္ဂနာသနာယ နာသေတဗ္ဗော’’တိ တံ ဝစနံ ပတိရူပံ. ဟီတိ သစ္စံ၊ ယသ္မာ ဝါ. ဣဓာတိ ခန္ဓကေ၊ ‘‘သာမဏေရံ နာသေတု’’န္တိဝစနေ ဝါ.

‘‘ဧသေဝ နယော’’တိ ဝုတ္တဝစနံ ပါကဋံ ကရောန္တော အာဟ ‘‘သဿတုစ္ဆေဒါနဉှီ’’တိအာဒိ. အညတရဒိဋ္ဌိကော သာမဏေရောတိ ယောဇနာ. ဧတ္ထာတိ ဒသသု နာသနင်္ဂေသု. ‘‘ကာမ’’န္တိပဒေန ပုနရုတ္တိနိရတ္ထကဒေါသာရောပနေန ဂရဟံ ဒဿေတိ. ‘‘ပနာ’’တိပဒေန တေသံ ဒေါသာနံ ပဟာနေန သမ္ဘာဝနံ ဒဿေတိ. အဗြဟ္မစာရိံ သာမဏေရန္တိ သမ္ဗန္ဓော. ဥပသမ္ပာဒေတုံ ဝဋ္ဋတီတိ ဥပသမ္ပာဒနံ ဝဋ္ဋတိ. ဘိက္ခုနိဒူသကော သာမဏေရောတိ သမ္ဗန္ဓော. ပဗ္ဗဇ္ဇမ္ပီတိ ဧတ္ထ ပိသဒ္ဒဿ ဂရဟတ္ထဘာဝံ ဒဿေတုံ ဝုတ္တံ ‘‘ပဂေဝ ဥပသမ္ပဒ’’န္တိ. ဧတမတ္ထန္တိ ဧတာဒိသမတ္ထံ.