၄၂. သိက္ခာပဒဒဏ္ဍကမ္မဝတ္ထုကထာ

၁၀၆. နာသနဝတ္ထူတိ လိင်္ဂနာသနာယ အဓိဋ္ဌာနံ၊ ကာရဏန္တိ ဝုတ္တံ ဟောတိ. ပစ္ဆိမာနံ ပဉ္စန္နန္တိ ယောဇနာ. ဒဏ္ဍကမ္မဝတ္ထူတိ ဒဏ္ဍကမ္မဿ ကာရဏံ.

၁၀၇. အပ္ပတိဿာတိ ဧတ္ထ ဘိက္ခူနံ ဝစနဿ ပဋိမုခံ အာဒရေန အသဝနံ ဘိက္ခူ ဇေဋ္ဌကဋ္ဌာနေ န ဌပေန္တိ နာမာတိ ဒဿေန္တော အာဟ ‘‘ဘိက္ခူ ဇေဋ္ဌကဋ္ဌာနေ’’တိအာဒိ. ‘‘သမာနဇီဝိကာ’’တိ ဣမိနာ အသဘာဂဝုတ္တိကာတိ ဧတ္ထ သဘာဂသဒ္ဒေါ သမာနသဒ္ဒပရိယာယော၊ ဝုတ္တိသဒ္ဒေါ ဇီဝိကပရိယာယောတိ ဒဿေတိ. ပရိသက္ကတီတိ ဧတ္ထ သက္က ဂတိယန္တိဓာတုပါဌေသု (သဒ္ဒနီတိဓာတုမာလာယံ ၁၆ ဠကာရန္တဓာတု) ဝုတ္တတ္တာ ပရိပုဗ္ဗော သက္ကသဒ္ဒေါ ဂတျတ္ထောတိ အာဟ ‘‘ပရက္ကမတီ’’တိ. ကိန္တီတိ ကိမေဝ. ဣတိသဒ္ဒေါ ဟေတ္ထ ဧဝသဒ္ဒတ္ထော၊ ကေန ဧဝ ဥပါယေနာတိ ဟိ အတ္ထော. အက္ကောသတိ စေဝါတိ ဇာတိအာဒီဟိ အက္ကောသတိ စေဝ. ဘေဒေတီတိ ဘေဒါပေတိ. အာဝရဏံ ကာတုန္တိ ဧတ္ထ အာဝရဏသဒ္ဒေါ နိဝါရဏသဒ္ဒဝေဝစနောတိ အာဟ ‘‘နိဝါရဏံ ကာတု’’န္တိ. ယတ္ထာတိ ယသ္မိံ ပရိဝေဏေ၊ သေနာသနေ ဝါ. ဝဿဂ္ဂေနာတိ ဝဿဂဏနာယ. (တဿာတိ ပရိဝေဏသေနာသနဿ. ဥပစာရေတိ အာသန္နေ). မုခဒွါရိကန္တိ မုခသင်္ခါတေန ဒွါရေန အဇ္ဈောဟရိတဗ္ဗံ. ‘‘ဝဒတောပီ’’တိ ဣမိနာ ဝစီပယောဂေန ဒုက္ကဋာပတ္တိံ ဒဿေတိ၊ ‘‘နိက္ခိပတောပီ’’တိ ဣမိနာ ကာယပယောဂေန. အနာစာရဿာတိ ဒဏ္ဍကမ္မေ အနာစာရဿ. ဧတ္တကေ နာမ ဒဏ္ဍကမ္မေတိ ဧတ္တကေ နာမ ဥဒကာဟရာပနာဒိသင်္ခါတေ ဒဏ္ဍကမ္မေ. ဣဒန္တိ ယာဂုဘတ္တာဒိံ. လစ္ဆသီတိ လဘိဿသိ. ‘‘ဧတ္တကေ နာမ ဒဏ္ဍကမ္မေ’’တိ ဝုတ္တဝစနဿ ယုတ္တိံ ဒဿေန္တော အာဟ ‘‘ဘဂဝတာ ဟီ’’တိအာဒိ. ဒဏ္ဍကမ္မန္တိ ဒဏ္ဍေန္တိ ဒမေန္တိ ဧတေနာတိ ဒဏ္ဍော၊ သောယေဝ ကတ္တဗ္ဗတ္တာ ကမ္မန္တိ ဒဏ္ဍကမ္မံ အာဝရဏာဒိ. အပရာဓာနုရူပန္တိ ဝီတိက္ကမဿ အပရာဓဿ အနုရူပံ. တမ္ပီတိ ဥဒကဒါရုဝါလိကာဒိအာဟရာပဏမ္ပိ. တဉ္စ ခေါတိ တဉ္စ ကရဏံ. ဩရမိဿတီတိ ကာယေန ဩရမိဿတိ. ဝိရမိဿတီတိ ဝါစာယ ဝိရမိဿတိ. ဥဏှပါသာဏေ ဝါတိအာဒီသု ဝါသဒ္ဒေန အညာနိပိ အတ္တတာပနပရိတာပနာဒီနိ ကမ္မာနိ သင်္ဂဏှာတိ.