၄၁. ရာဟုလဝတ္ထုကထာ

၁၀၅. ကပိလဝတ္ထူတိ ဧတ္ထ ကပိလောတိ ကဠာရဝဏ္ဏော ဣသိ ဝုစ္စတိ၊ သော ဝသတိ ဧတ္ထာတိ ကပိလဝတ္ထု၊ အဿမော. တသ္မိံ ဌာနေ မာပိတတ္တာ နဂရမ္ပိ ကပိလဝတ္ထူတိ (ဒီ. နိ. အဋ္ဌ. ၁.၂၆၇၊ သု. နိ. အဋ္ဌ. ၂.၃၆၂) ဝုစ္စတိ. အယန္တိ ဝက္ခမာနကထာ. သုဒ္ဓေါဒနမဟာရာဇာတိ ဧတ္ထ သုဒ္ဓေါဒနောတိ တဿ ရညော နာမံ. အထ ဝါ သုဒ္ဓံ ဩဒနံ ဣမဿာတိ သုဒ္ဓေါဒနော၊ သောယေဝ မဟာရာဇာ သုဒ္ဓေါဒနမဟာရာဇာ. ဝိဟရတိ ကိရာတိ သမ္ဗန္ဓော. သောတိ သုဒ္ဓေါဒနမဟာရာဇာ. ရာဇဂဟန္တိ ရာဇဂဟနဂရံ. သာဓူတိ အာယာစနတ္ထေ နိပါတော. အာယာစာမီတိ ဟိ အတ္ထော. မေတိ မမ၊ ပုတ္တန္တိ သမ္ဗန္ဓော၊ အနာဒရေ ဝါ သာမိဝစနံ. သောတိ အမစ္စော. သာဓူတိ သမ္ပဋိစ္ဆနတ္ထေ နိပါတော. ဧဝန္တိ ဟိ အတ္ထော. အထာတိ တသ္မိံ နိသီဒနကာလေ. အဿာတိ ပုရိသသဟဿပရိဝါရဿ အမစ္စဿ. တတောတိ ယာစနကာရဏာ. နန္တိ ပုရိသသဟဿပရိဝါရံ အမစ္စံ. တတ္ထေဝါတိ ရာဇဂဟေယေဝ. တေပီတိ အဋ္ဌ ဒူတာပိ. တေတိ နဝ ဒူတာ.

အထာတိ တတော ပစ္ဆာ. ဧကဒိဝသဇာတကန္တိ ဧကသ္မိံ ဒိဝသေ ဇာတကံ. သောတိ ကာဠုဒါယီအမစ္စော. ပဗ္ဗဇိတွာပီတိ ပိသဒ္ဒေန ‘‘အပဗ္ဗဇိတွာပီ’’တိ အတ္ထံ သမ္ပိဏ္ဍေတိ. တထေဝါတိ ယထာ နဝ ဒူတာ သပရိဝါရာ အရဟတ္တံ ပါပုဏိံသု၊ တထေဝါတိ အတ္ထော. သောတိ ကာဠုဒါယီ. သမ္ဘတေသူတိ သမ္ဘရိတေသု ဂဟေတွာ နိဋ္ဌာပိတေသူတိ အတ္ထော. ဝိဿဋ္ဌကမ္မေသူတိ ဝိဿဋ္ဌာ ကမ္မန္တာ ဧတေသန္တိ ဝိဿဋ္ဌကမ္မန္တာ၊ တေသု. သုပုပ္ဖိတေသူတိ သုန္ဒရပုပ္ဖသဉ္ဇာတေသု. ပဋိပဇ္ဇနက္ခမေတိ ပဋိပဇ္ဇနတ္ထာယ ခမေ ယောဂျေ. ဂမနဝဏ္ဏံ သံဝဏ္ဏေသီတိ သမ္ဗန္ဓော. သဋ္ဌိမတ္တာဟီတိ (ဗု. ဝံ. အဋ္ဌ. နိဒါနကထာ ၂) သဋ္ဌိပမာဏာဟိ. ဧတန္တိ ဧတံ သံဝဏ္ဏဿ ကာရဏံ ကိန္တိ ပုစ္ဆိ. စာရိကံ ပက္ကမိတုံ ကာလောတိ ယောဇနာ. တေန ဟီတိ ဥယျောဇနတ္ထေ နိပါတော. ဘဂဝါ ပက္ကာမီတိ သမ္ဗန္ဓော. ပရိဝုတောတိ ပရိသမန္တတော ဝုတော အာဝုတော နိဝုတော ဟုတွာတိ သမ္ဗန္ဓော. အတုရိတစာရိကန္တိ အဇဝနစာရိကံ.

ဧဝန္တိ ဣမိနာ နယေန. ဘဂဝတိ ပက္ကန္တေ စ သတီတိ ယောဇနာ. နိက္ခန္တဒိဝသတောတိ ဖဂ္ဂုဏပုဏ္ဏမိယာ ပါဋိပဒဒိဝသတော. ဥတ္တမဘောဇနရသဿာတိ ဥတ္တမဘောဇနရသေန. ဒဿထာတိ ဒဒေယျာထ. တေနေဝါတိ သဒ္ဓါယ ဥပ္ပါဒနကာရဏေနေဝ. နန္တိ ကာဠုဒါယိံ. ဘဂဝါ ဌပေသီတိ သမ္ဗန္ဓော. ဧတဒဂ္ဂန္တိ ဧသော အဂ္ဂေါ. ယဒိဒန္တိ ယော အယံ. ဧတဒဂ္ဂေတိ ဧတဒဂ္ဂဋ္ဌာနေ.

သာကိယာပိ ခေါ ပဟိဏိံသူတိ သမ္ဗန္ဓော. ဉာတိသေဋ္ဌန္တိ ဉာတီနံ သေဋ္ဌံ၊ ဉာတိယေဝ ဝါ သေဋ္ဌံ၊ ဘဂဝန္တန္တိ ယောဇနာ. နိဂြောဓသက္ကဿာတိ နိဂြောဓနာမကဿ သက္ကဿ. တတ္ထာတိ နိဂြောဓသက္ကဿ အာရာမေ. ပစ္စုဂ္ဂမနန္တိ ပဋိမုခံ ဥဋ္ဌဟိတွာ ဂမနံ. တတောတိ ပဟိဏတော၊ ပရန္တိ သမ္ဗန္ဓော. ရာဇကုမာရေ စ ရာဇကုမာရိကာယော စ ပဟိဏိံသူတိ ယောဇနာ. တေသန္တိ ရာဇကုမာရရာဇကုမာရိကာနံ. တတြာတိ နိဂြောဓာရာမေ. မာနော ဇာတိ သဘာဝေါ ဧတေသန္တိ မာနဇာတိကာ၊ မာနေန၊ မာနော ဝါ ထဒ္ဓေါ ဧတေသန္တိ မာနထဒ္ဓါ. တေတိ သာကိယာ၊ အာဟံသူတိ သမ္ဗန္ဓော.

တေသူတိ သာကိယေသု. နေတိ ဉာတယော. ဝုဋ္ဌာယာတိ စတုတ္ထဇ္ဈာနတော ဝုဋ္ဌဟိတွာ. တေသန္တိ ဉာတီနံ. ကဏ္ဍမ္ဗရုက္ခမူလေတိ ကဏ္ဍနာမကေန ဥယျာနပါလေန ရောပိမဿ အမ္ဗရုက္ခဿ အာသန္နေ. ရာဇာတိ သုဒ္ဓေါဒနမဟာရာဇာ. ဝေါတိ တုမှာကံ၊ ပါဒေတိ သမ္ဗန္ဓော. အယန္တိ ဝန္ဒနာ. ဇမ္ဗုစ္ဆာယာယာတိ ဇမ္ဗုရုက္ခဿ ဆာယာယ. ဣတိ အာဟာတိ ယောဇနာ.

သိခါပ္ပတ္တောတိ အဂ္ဂပ္ပတ္တော၊ ကောဋိပ္ပတ္တောတိ အတ္ထော. တတောတိ နိသီဒနတော၊ ပရန္တိ သမ္ဗန္ဓော. ပေါက္ခရဝဿန္တိ ပဒုမဝနေ ဝုဋ္ဌဝဿသဒိသံ. တမ္ဗဝဏ္ဏန္တိ လောဟိတဝဏ္ဏံ. တန္တိ အပတနံ ဘဂဝါ ကထေသီတိ သမ္ဗန္ဓော.

ဒုတိယဒိဝသေတိ ကပိလဝတ္ထုံ ပတ္တဒိဝသတော ဒုတိယေ ဒိဝသေ. ဣန္ဒခီလေတိ နဂရဿ ဥမ္မာရေ. ကထန္တိ ကေနာကာရေန စရိံသု နု ခေါတိ ယောဇနာ. အဂမံသု ကိံ စရိံသု ကိန္တိ ယောဇနာ. သပဒါနစာရန္တိ ဃရပဋိပါဋိခဏ္ဍနဝိရဟိတေန သဟ ပဝတ္တံ စာရံ. တတောတိ အာဝဇ္ဇနတော၊ ပရန္တိ သမ္ဗန္ဓော. အယမေဝ ဝံသောတိ ပုဗ္ဗဗုဒ္ဓါနံ အယမေဝ ဝံသော. အယံ ပဝေဏီတိ တဿေဝ ဝေဝစနံ. အနုသိက္ခန္တာတိ အနု ပဋိဘာဂံ သိက္ခန္တာ. နိဝိဋ္ဌဂေဟတောတိ နိဝါသနတ္ထာယ ဝိသိတဂေဟတော. အယျောတိ အဓိပေါ သာမီတိ အတ္ထော. သိဒ္ဓတ္ထကုမာရောတိ သဗ္ဗလောကဿ သိဒ္ဓေါ အတ္ထော အသ္မိံ အတ္ထီတိ သိဒ္ဓတ္ထော၊ သောယေဝ ကုမာရော သိဒ္ဓတ္ထကုမာရော. သီဟပဉ္ဇရန္တိ ဝါတပါနံ. တဉှိ သီဟရူပံ ဒဿေတွာ ကတပဉ္ဇရတ္တာ သီဟပဉ္ဇရန္တိ ဝုစ္စတိ. ဒဿနဗျာဝဋောတိ ဒဿနေ၊ ဒဿနတ္ထာယ ဝါ ဗျာဝဋော. ရာဟုလမာတာပိ ဒေဝီ အာရောစေသီတိ သမ္ဗန္ဓော. ကပါလဟတ္ထောတိ ကပါလော ဟတ္ထေသု အဿ ဘဂဝတောတိ ကပါလဟတ္ထော၊ ဟုတွာတိ သမ္ဗန္ဓော. နာနာဝိရာဂသမုဇ္ဇလာယာတိ နာနာဌာနေသု ဝိရာဂါယ သမုဇ္ဇလာယ. ဝိရောစမာနံ ဘဂဝန္တန္တိ သမ္ဗန္ဓော.

ဥဏှီသတောတိ သိရောဝေဌနတော. တဉှိ ဥပရိသီသေ နဟတိ ဗန္ဓတိ၊ နဟီယတိ ဗန္ဓီယတီတိ ဝါ ဥဏှီသောတိ ဝုစ္စတိ. နရသီဟဂါထာဟိ နာမာတိ နရသီဟဂါထာနာမကာဟိ. တာ ဟိ ယသ္မာ နရောယေဝ သဗ္ဗသတ္တာနံ သီဟော သေဋ္ဌော၊ နရာနံ၊ နရေသု ဝါ သီဟော သေဋ္ဌောတိ နရသီဟော၊ တဿ ပကာသကာ ဂါထာ ဟောန္တိ၊ တသ္မာ နရသီဟဂါထာတိ ဝုစ္စန္တိ. ရညောတိ သဿုရရညော၊ မာတုလရညော ဝါ. သံဝိဂ္ဂဟဒယောတိ စလနစိတ္တော. သဏ္ဌာပယမာနောတိ သုဋ္ဌု ဌာပယမာနော. တုရိတတုရိတန္တိ တုရိတတော တုရိတံ၊ အတိသီဃန္တိ အတ္ထော. ကိံ ဘန္တေတိ ကိံ ကာရဏာ ဘန္တေ. အဟုဝတ္ထာတိ ဟိယျတ္တနီမဇ္ဈိမပုရိသသင်္ခါတာယ တ္ထဝိဘတ္တိယာ ဟူဓာတုဿ ဦကာရဿ ဥဝါဒေသော ဟောတိ၊ တသ္မာ တုမှေ ဧဝံသညိနော အဟုဝတ္ထာတိ ယောဇနာ. ဝံသစာရိတ္တမေတန္တိ ဧတံ ပိဏ္ဍာယ စရဏံ ဝံသတော ပဝေဏိတော စာရိတ္တံ. တတ္ထ စာတိ မဟာသမ္မတခတ္တိယဝံသေ စ. အယန္တိ မဟာသမ္မတခတ္တိယဝံသော. အန္တရဝီထိယန္တိ ဝီထိယာ မဇ္ဈေ. ဌိတောဝ အာဟာတိ သမ္ဗန္ဓော.

ဥတ္တိဋ္ဌေတိ ဥဒ္ဒိဿ၊ ဥဋ္ဌဟိတွာ ဝါ ပိဏ္ဍာယ တိဋ္ဌနေ. ဓမ္မံ သုစရိတန္တိ သုဋ္ဌု စရိတဗ္ဗံ ဘိက္ခာစရိယသင်္ခါတံ ဓမ္မံ. စရေတိ စရေယျ. ဓမ္မစာရီတိ ဘိက္ခာစရိယသင်္ခါတံ ဓမ္မံ စရဏသီလော သမဏော. သုခံ သေတီတိ ဥပလက္ခဏဝသေန ဝုတ္တံ. သေသဣရိယာပထာပိ လက္ခဏဟာရဝသေန ဂဟေတဗ္ဗာ သမာနကိစ္စတ္တာ. အသ္မိဉ္စ လောကေ ပရမှိ စ လောကေတိ ယောဇနာ.

န တံ ဒုစ္စရိတံ စရေတိ ဝေသိယာဒိဂေါစရသင်္ခါတံ ဒုဋ္ဌု စရိတဗ္ဗံ တံ ဓမ္မံ န စရေယျ.

ဧတ္ထ စ ပဌမဂါထံ အန္တရဝီထိယံ ကထေတွာ ရာဇာနံ သောတာပတ္တိဖလေ ပတိဋ္ဌာပေသိ၊ ဒုတိယဂါထံ ပိတုနိဝေသနေ ကထေတွာ မဟာပဇာပတိံ သောတာပတ္တိဖလေ၊ ရာဇာနံ သကဒါဂါမိဖလေ ပတိဋ္ဌာပေသီတိ ဒဋ္ဌဗ္ဗံ. ဓမ္မပါလဇာတကံ သုတွာတိ ပုန အပရသ္မိံ ဒိဝသေ (ဇာ. အဋ္ဌ. ၄.၉၈ အာဒယော၊ ဓ. ပ. အဋ္ဌ. ၁.နန္ဒတ္ထေရဝတ္ထု) ဓမ္မပါလဇာတကံ (ဇာ. အဋ္ဌ. ၄.မဟာဓမ္မပါလဇာတကဝဏ္ဏနာ) သုတွာ. မရဏသမယေတိ မရဏာသန္နကာလေ၊ မရဏသမယသမီပေ ဝါ၊ သမီပတ္ထေ စေတံ ဘုမ္မဝစနံ.

သောတာပတ္တိဖလံ သစ္ဆိကတွာ ပရိဝိသီတိ သမ္ဗန္ဓော. သဗ္ဗံ ဣတ္ထာဂါရန္တိ သဗ္ဗော ဩရောဓော. သော ဟိ ဣတ္ထီနံ အဂါရန္တိ ဣတ္ထာဂါရန္တိ ဝုစ္စတိ. ဣမိနာ ဝစနတ္ထေန အဂါရမေဝ မုချတော လဗ္ဘတိ၊ ရာဇိတ္ထိယော ပန ဥပစာရေနာတိ ဒဋ္ဌဗ္ဗံ. သာ ပနာတိ ရာဟုလမာတာ ပန. ပရိဇနေနာတိ ပရိဝါရေန. နန္တိ အယျပုတ္တံ. ‘‘ရာဇာန’’န္တိပဒံ ‘‘ဂါဟာပေတွာ’’တိပဒေ ကာရိတကမ္မံ၊ ‘‘ပတ္တ’’န္တိပဒံ တတ္ထေဝ ဓာတုကမ္မံ. ရာဇဓီတာယာတိ သုပ္ပဗုဒ္ဓရညော ဓီတာယ. သာတိ ရာဇဓီတာ. ဂေါပ္ဖကေသူတိ စရဏဂဏ္ဌီသု ဘဂဝန္တံ ဂဟေတွာတိ ယောဇနာ. အထ ဝါ ဘဂဝတော ဂေါပ္ဖကေ ဂဟေတွာတိ ယောဇနာ. ဧဝဉှိ သတိ ဥပယောဂတ္ထေ ဘုမ္မဝစနန္တိ ဒဋ္ဌဗ္ဗံ.

ရာဇာ ကထေသီတိ သမ္ဗန္ဓော. အနစ္ဆရိယန္တိ န အစ္ဆရိယံ၊ အစ္ဆရံ ပဟရိတုံ န ယောဂျန္တိ အတ္ထော. ရာဇဓီတာ ယံ အတ္တာနံ ရက္ခိ၊ ဣဒံ အနစ္ဆရိယန္တိ ယောဇနာ.

တံဒိဝသမေဝါတိ တသ္မိံ ဒုတိယဒိဝသေယေဝ. ကေသဝိသဇ္ဇနန္တိ ရာဇစူဠာမဏိဗန္ဓနတ္ထံ ကုမာရကာလေ ဗန္ဓိတသိခါဝေဏိသင်္ခါတဿ ကေသဿ ဝိသဇ္ဇနံ၊ မောစနန္တိ အတ္ထော. ပဋ္ဋဗန္ဓောတိ အသုကော နာမ ရာဇာတိ နလာဋေ သုဝဏ္ဏမယဿ ပဋ္ဋဿ ဗန္ဓနံ. ဃရမင်္ဂလန္တိ အဘိနဝဃရံ ပဝေသနမင်္ဂလံ. အာဝါဟမင်္ဂလန္တိ အာဝါဟေ ပဝတ္တံ မင်္ဂလံ. ဆတ္တမင်္ဂလန္တိ ရာဇဆတ္တုဿာပနကာလေ ပဝတ္တံ မင်္ဂလံ. မင်္ဂလံ ဝတွာတိ မင်္ဂလသံယုတ္တံ ဓမ္မကထံ ကထေတွာ. ဇနပဒကလျာဏီတိ ဇနပဒမှိ ကလျာဏသမန္နာဂတာ. တုဝဋ္ဋံ ခေါတိ ခိပ္ပမေဝ. သောပီတိ နန္ဒရာဇကုမာရောပိ. ဣတီတိအာဒိ နိဂမနံ. ဒုတိယဒိဝသေတိ ကပိလဝတ္ထုပတ္တဒိဝသတော ဒုတိယေ ဒိဝသေ. ဓမ္မပဒအဋ္ဌကထာယံ (ဓ. ပ. အဋ္ဌ. ၁.နန္ဒတ္ထေရဝတ္ထု၊ ထေရဂါ. အဋ္ဌ. ၁.နန္ဒတ္ထေရဂါထာဝဏ္ဏနာ) ပန ‘‘တတိယဒိဝသေ နန္ဒံ ပဗ္ဗာဇေသီ’’တိ ဝုတ္တံ.

သတ္တမေ ဒိဝသေတိ ကပိလဝတ္ထုပတ္တဒိဝသတောယေဝ သတ္တမေ ဒိဝသေ. ဧတံ သမဏံ ပဿာတိ ယောဇနာ. ဗြဟ္မရူပဝဏ္ဏန္တိ ဗြဟ္မုနော ရူပသင်္ခါတော ဝဏ္ဏော ဝိယ ဝဏ္ဏော ဣမဿာတိ ဗြဟ္မရူပဝဏ္ဏော၊ တံ. အယန္တိ အယံ သမဏော. တျဿာတိ တေ အဿ. တေတိ နိဓယော. အဿာတိ သမဏဿ. နန္တိ သမဏံ. ယာစာတိ ယာစာဟိ. အယံ ဒွိကမ္မိကဓာတု. ဟီတိ သစ္စံ၊ ယသ္မာ ဝါ. ပုတ္တော ပိတုသန္တကဿ သာမိကော၊ ဣတိ တသ္မာ မေ ဒေဟီတိ ယောဇနာ. အနုရူပံ ဝစနန္တိ သမ္ဗန္ဓော. ဘဂဝန္တံ အနုဗန္ဓီတိ ဘဂဝတော ပိဋ္ဌိတော ပိဋ္ဌိတော အနုဗန္ဓိ.

န ဝိသဟတီတိ န သမတ္ထေတိ. အယံ ကုမာရော ပိတုသန္တကံ ယံ ဓနံ ဣစ္ဆတိ၊ တန္တိ ယောဇနာ. ဝဋ္ဋာနုဂတန္တိ ဝဋ္ဋဒုက္ခံ အနုဂတံ. သဝိဃာတကန္တိ ဝိဃာတကေဟိ ပဉ္စဟိ ဝေရေဟိ သဟိတံ. အဿာတိ ကုမာရဿ. နန္တိ ကုမာရံ. အယန္တိ ကုမာရော. ဒါယဇ္ဇန္တိ ဒါယသင်္ခါတံ မာတာပိတူနံ ဓနံ အာဒဒါတီတိ ဒါယာဒေါ၊ ပုတ္တော၊ တဿ ဣဒန္တိ ဒါယဇ္ဇံ၊ မာတာပိတူနံ ဓနံ.

‘‘ကထာဟံ ဘန္တေ ရာဟုလကုမာရံ ပဗ္ဗာဇေမီ’’တိ ကသ္မာ အာဟ၊ နနု အာယသ္မာ သာရိပုတ္တော ဗာရာဏသိယံ တီဟိ သရဏဂမနေဟိ အနုညာတံ ပဗ္ဗဇ္ဇံ န ဇာနာတီတိ အာဟ ‘‘ဣဒါနီ’’တိအာဒိ. ယာ သာ ပဗ္ဗဇ္ဇာ စ ဥပသမ္ပဒါ စ အနုညာတာတိ ယောဇနာ. တတောတိ ပဗ္ဗဇ္ဇာဥပသမ္ပဒတော. ဥပသမ္ပဒံ ပဋိက္ခိပိတွာတိ သမ္ဗန္ဓော. ဝိမတီတိ ဝိဝိဓာ ဣစ္ဆာ. ဣမဉ္စ ပနတ္ထန္တိ ဣမမေဝ ဝိမတိသင်္ခါတမတ္ထံ. ဓမ္မသေနာပတိ အာဟာတိ သမ္ဗန္ဓော. ဘဂဝတော တံ အဇ္ဈာသယန္တိ ယောဇနာ.

‘‘အထ ခေါ။ပေ။ ပဗ္ဗာဇေသီ’’တိ ဧတ္ထ ကိံ ကုမာရဿ ကေသစ္ဆေဒနာဒီနိ သဗ္ဗကိစ္စာနိ အာယသ္မာ သာရိပုတ္တောယေဝ ကရောတီတိ အာဟ ‘‘မဟာမောဂ္ဂလ္လာနတ္ထေရော’’တိအာဒိ. ဩဝါဒါစရိယောတိ နိဝါသနပါရုပနာဒီသု သေခိယဝတ္တေသု၊ အာဘိသမာစာရိကေသု စ ဩဝါဒကော အာစရိယော. အထ ကသ္မာ ‘‘အာယသ္မာ သာရိပုတ္တော ရာဟုလကုမာရံ ပဗ္ဗာဇေသီ’’တိ ဝုတ္တန္တိ အာဟ ‘‘ယသ္မာ ပနာ’’တိအာဒိ. တတ္ထာတိ တဿံ ပဗ္ဗဇ္ဇာဥပသမ္ပဒါယံ. န အာစရိယောတိ ပဗ္ဗဇ္ဇာစရိယော စ ဩဝါဒါစရိယော စ န ဣဿရော.

ဥပ္ပန္နသံဝေဂေန ဟဒယေနာတိ ဧတ္ထ ဣတ္ထမ္ဘူတလက္ခဏေ ကရဏဝစနံ. ဥပ္ပန္နသံဝေဂေါ ဟဒယော ဟုတွာတိ ဟိ ယောဇနာ. သဗ္ဗန္တိ သဗ္ဗံ ဝစနံ.

တတ္ထာတိ ပုရိမဝစနာပေက္ခံ. အဝိသေသေနာတိ ‘‘ဓန’’န္တိ ဝါ ‘‘အည’’န္တိ ဝါ ‘‘သာဝဇ္ဇ’’န္တိ ဝါ ‘‘အနဝဇ္ဇ’’န္တိ ဝါ ဝိသေသမကတွာ သာမညေန. န စ ဗုဒ္ဓါနန္တိ ဧတ္ထ စသဒ္ဒေန န ကေဝလံ အပဋိရူပမေဝ၊ အထ ခေါ ဗုဒ္ဓါနဉ္စ န အာစိဏ္ဏန္တိ အတ္ထံ ဒဿေတိ. ယန္တိ ယံ ဝရံ. တထာ နန္ဒေတိ ဧတ္ထ တထာသဒ္ဒဿ ဥပမေယျတ္ထဇောတကဘာဝံ ဒဿေန္တော အာဟ ‘‘ယထေဝ ကိရာ’’တိအာဒိ. ယထေဝ ဗောဓိသတ္တံ ဗျာကရိံသု၊ ဧဝံ နန္ဒမ္ပိ ရာဟုလမ္ပိ ဗျာကရိံသု ကိရာတိ ယောဇနာ. ပါဠိယံ ပန ယထာ ဘဂဝတိ မေ ဘန္တေ ပဗ္ဗဇိတေ အနပ္ပကံ ဒုက္ခံ အဟောသိ၊ တထာ နန္ဒေ ပဗ္ဗဇိတေ အနပ္ပကံ ဒုက္ခံ အဟောသိ၊ တထာ ရာဟုလေ ပဗ္ဗဇိတေ အဓိမတ္တံ ဒုက္ခံ အဟောသီတိ ယောဇနာ. နေမိတ္တကာတိ သုဘာသုဘနိမိတ္တံ ကထေန္တီတိ နေမိတ္တကာ. ပုတ္တဿာတိ ဇေဋ္ဌပုတ္တဿ သိဒ္ဓတ္ထကုမာရဿ. ပဗ္ဗဇ္ဇာယာတိ ပဗ္ဗဇ္ဇာဟေတု ပဗ္ဗဇ္ဇာကာရဏာ၊ ပဗ္ဗဇ္ဇာနိမိတ္တံ ဝါ. တတောတိ ဘဂဝတော ပဗ္ဗဇ္ဇတော. တမ္ပီတိ နန္ဒမ္ပိ. ဣတီတိ ဤဒိသံ. ဘဂဝတော ပဗ္ဗဇ္ဇာယ မဟန္တံ ဣစ္ဆာဝိဃာတသဒိသန္တိ အတ္ထော. တမ္ပီတိ ရာဟုလမ္ပိ. တေနာတိ ပဗ္ဗဇ္ဇာဟေတုနာ. အဿာတိ ရညော. ဥပ္ပဇ္ဇီတိ သမ္ဗန္ဓော. ဣတောတိ သောကုပ္ပတ္တိတော ဝရယာစနတော ဝါ.

သောတိ ရာဇာ. ယတြ ဟိ နာမာတိ ယော နာမ. အဟမ္ပိ နာမ ယော ယာဒိသော ဗုဒ္ဓမာမကော ဓမ္မမာမကော သံဃမာမကော သမာနော၊ သော တာဒိသော အဟမ္ပိ န သက္ကောမီတိ ယောဇနာ. အညေတိ မယာ အပရေ. ဒုက္ခန္တိ ဉာတိဝိယောဂဒုက္ခံ. နိယျာနိကကာရဏန္တိ မနုဿာနံ ဂရဟဥပဝါဒအက္ကောသတော နိယျာနိကံ ကာရဏံ.

တတ္ထာတိ ‘‘အနနုညာတော’’တိအာဒိဝစနေ. ဇနေတီတိ ဇနနီ၊ မာတာ. ဇနေတီတိ ဇနကော၊ ပိတာ. ဣမိနာ ပေါသာဝနိကမာတာပိတရော နိဝတ္တေတိ. မာတာ ဝါ မတာ ဟောတီတိ ယောဇနာ. သော ဧဝ ဝါတိ ပုတ္တော ဧဝ ဝါ. အနုညာတောမှီတိ ဝဒတီတိ သစ္စေန ဝါ အလိကေန ဝါ ‘‘အနုညာတောမှီ’’တိ ဝဒတိ. မာတာ ဝါ သယံ ပဗ္ဗဇိတာတိ ယောဇနာ. ပိတဿာတိ ပိတာ အဿ. အဿာတိ ပုတ္တဿ. ဝိပ္ပဝုတ္ထောတိ မာတုယာ ကေနစိ ကာရဏေန ပဝါသော.

စူဠမာတာဒီနန္တိအာဒိသဒ္ဒေန မဟာမာတာဒီနိ သင်္ဂဏှာတိ. ပေါသနကာတိ ဝဍ္ဎနကာ. တေသုပီတိ ပေါသနကမာတာပိတရေသုပိ.

ယံ ပန ပုတ္တံ နာနုဇာနန္တီတိ သမ္ဗန္ဓော. ဇီဝဿေဝါတိ တဿ ဇီဝဿ ဧဝ၊ ပဗ္ဗာဇေန္တဿ ဝါ ဘိက္ခုဿ၊ န ဒေသန္တရဂမနာဒီနမတ္ထာယာတိ အတ္ထော. တေသန္တိ မာတာပိတူနံ.

မဟာကန္တာရောတိ ကေန ဥဒကေန တရိတဗ္ဗောတိ ကန္တာရော၊ နိရုဒကကန္တာရောဝ မုချတော လဗ္ဘတိ၊ ဝါဠကန္တာရော စောရကန္တာရော အမနုဿကန္တာရော ဒုဗ္ဘိက္ခကန္တာရော မရုကန္တာရောတိ ဣမေ ပဉ္စ ကန္တာရာ ရူဠှီဝသေန. မဟန္တော ကန္တာရော မဟာကန္တာရော.

ယာဝတကေတိ ဧတ္ထ ယာဝသဒ္ဒေါ ပမာဏတ္ထောတိ အာဟ ‘‘ယတ္တကေ’’တိ.