၄၀. နိဿယမုစ္စနကကထာ

၁၀၃. ဩဂဏေနာတိ ဧတ္ထ ဩတျူပသဂ္ဂေါ လာမကတ္ထဝါစကောတိ အာဟ ‘‘ပရိဟီနဂဏေနာ’’တိ. အတ္တနော ဝုဍ္ဎတရဿေဝ ဘိက္ခုဿ သန္တိကေ နိဿယော ဂဟေတဗ္ဗောတိ အာဟ ‘‘သစာယံ ဝုဍ္ဎတရ’’န္တိအာဒိ. တတ္ထ အယန္တိ အဗျတ္တော ဘိက္ခု. ဥပသမ္ပဒါယာတိ ဥပသမ္ပာဒေတွာ. အာယသ္မတောတိ အာယသ္မန္တံ၊ ဥပယောဂတ္ထေ စေတံ သာမိဝစနံ. အာယသ္မတော ဝါ ဩဝါဒန္တိ ယောဇနာ. သဗ္ဗတ္ထာတိ သဗ္ဗေသု. အာပုစ္ဆနေသူတိ ဒိသာပက္ကမနာဒိအတ္ထာယ အာပုစ္ဆနေသု. ဧတ္ထာတိ ဣမသ္မိံ နိဿယဝသနဋ္ဌာနေ. တန္တိ တတ္တကံ သုတံ. တဿာတိ သုတဿ.