၃၅. ကမ္မာရဘဏ္ဍုဝတ္ထုအာဒိကထာ

၉၈. တုလာဓာရမုဏ္ဍကောတိ မာနဘဏ္ဍဓာရော မုဏ္ဍကော. ဣမိနာ ကမ္မာရဘဏ္ဍူတိ ဧတ္ထ ကမ္မာရသဒ္ဒေါ တုလာဓာရပရိယာယော၊ ဘဏ္ဍုသဒ္ဒေါ မုဏ္ဍကပရိယာယောတိ ဒဿေတိ. တုလာဓာရော ဟိ အလင်္ကာရဝိကတိကရဏတ္ထာယ ကမ္မံ အရတိ ဇာနာတီတိ ကမ္မာရောတိ ဝုစ္စတိ. မုဏ္ဍကော ဘဏ္ဍီယတိ ‘‘မုဏ္ဍော’’တိ ပရိဘာသီယတီတိ ဘဏ္ဍူတိ ဝုစ္စတိ. ‘‘သုဝဏ္ဏကာရပုတ္တော’’တိ ဣမိနာ တဿ သရူပံ ဒဿေတိ. အပလောကေတုန္တိ ဧတ္ထ အပပုဗ္ဗော လောကသဒ္ဒေါ အာပုစ္ဆနတ္ထောတိ အာဟ ‘‘အာပုစ္ဆိတု’’န္တိ. ‘‘ဘဏ္ဍုကမ္မတ္ထာယာ’’တိ ဣမိနာ ဘဏ္ဍုကမ္မာယာတိ ဧတ္ထ တဒတ္ထေ စတုတ္ထီတိ ဒဿေတိ. တတြာတိ ‘‘သံဃံ အပလောကေတု’’န္တိအာဒိဝစနေ. သီမာပရိယာပန္နေတိ ဝိဟာရသီမာယ ဝါ ဥပစာရသီမာယ ဝါ ပရိယာပန္နေ. တတ္ထာတိ ဘိက္ခူနံ သန္နိပါတဋ္ဌာနံ. ဧတ္ထ စာတိ အာပုစ္ဆနေ စ. ဝတ္တုံ ဝဋ္ဋတိယေဝါတိ ပဉ္စသု ဝါကျေသု ယံကိဉ္စိ ဝါကျံ ကထေတုံ ဝဋ္ဋတိယေဝ. ပိသဒ္ဒေန ‘‘ဣမဿ မုဏ္ဍကမ္မံ အာပုစ္ဆာမီ’’တိ ဝါကျမ္ပိ သင်္ဂဏှာတိ.

တေသန္တိ ဝီသတိအာဒီနံ ဘိက္ခူနံ. ‘‘ဒဟရဘိက္ခူ ဝါ သာမဏေရေ ဝါ’’တိ ဣဒံ အာသန္နဝသေန ဝုတ္တံ. ဂိဟိမ္ပိ ပေသေတွာ အာပုစ္ဆာပေတုံ ဝဋ္ဋတိ. ကသ္မာ? ‘‘ပဗ္ဗဇ္ဇာပေက္ခံ ဝိနာ ဝါ’’တိ ဝုတ္တတ္တာ.

ပဗ္ဗာဇေန္တဿ အနာပတ္တိယေဝ၊ သုပဗ္ဗဇိတောတိ အာဟ ‘‘ပဗ္ဗာဇေန္တဿာပိ အနာပတ္တီ’’တိ.

အာပုစ္ဆိတံ ပဂေဝါတိ ယောဇနာ. ခဏ္ဍသီမာယန္တိ ဝိဟာရသီမာယ ဝါ ဥပစာရသီမာယ ဝါ အဗ္ဘန္တရေ ဌိတာယံ ခဏ္ဍသီမာယံ. ယော ပနာတိ ပဗ္ဗဇ္ဇာပေက္ခော ပန. ဝိဗ္ဘန္တကော ဝါတိ နဝဝိဗ္ဘန္တကော ဝါ. ပဗ္ဗဇိတာနံ ဒွင်္ဂုလကေသော ဝဋ္ဋတီတိ အာဟ ‘‘ဒွင်္ဂုလကေသော ဝါ’’တိ. ဒွီဟိ အင်္ဂုလီဟိ အတိရိတ္တော ကေသော ဣမဿာတိ ဒွင်္ဂုလာတိရိတ္တကေသော. ဧကသိခါမတ္တဓရောပိ ဟောတီတိ ယောဇနာ.

၁၀၀. မာရဗျာဓိနာတိ မာရဏာဗာဓော. သော ဟိ သတ္တာနံ မာရဏဋ္ဌေန၊ ဝိဝိဓဿ စ ဒုက္ခဿ အာဒဟဋ္ဌေန မာရဗျာဓီတိ ဝုစ္စတိ. ဣမိနာ အဟိဝါတကရောဂေနာတိ ဧတ္ထ အဟိဝိသသဒိသေန ဝါတေန ပဝတ္တော ရောဂေါ အဟိဝါတကရောဂေါတိ ဝုစ္စတီတိ ဒဿေတိ. တမတ္ထံ ဝိတ္ထာရေန္တော အာဟ ‘‘ယတြ ဟီ’’တိအာဒိ. တတ္ထ ယတြာတိ ယသ္မိံ ကုလေ. သော ရောဂေါ တသ္မိံ ကုလေ ဒွိပဒေ စတုပ္ပဒေ ပဌမံ ဂဏှာတိ၊ ပစ္ဆာ ဂေဟသာမိကေ ဂဏှာတီတိ ဓမ္မပဒအဋ္ဌကထာယံ (ဓ. ပ. အဋ္ဌ. ၁.သာမာဝတီဝတ္ထု) ဝုတ္တံ. တထာတိ ယထာ အညော ဘိတ္တိံ ဝါ ဆဒနံ ဝါ ဘိန္ဒိတွာ ပလာယိတွာ တိရောဂါမာဒိဂတော ဝါ ဟုတွာ မုစ္စတိ၊ တထာ. ဧတ္ထ စ ကုလေ ပိတာပုတ္တာ မုစ္စိံသူတိ အတ္ထော.

ကာကုဍ္ဍေပကန္တိ ဧတ္ထ ကာကေ ဥဍ္ဍာပေတီတိ ကာကုဍ္ဍေပကော၊ ကာကေ ဝါ ဥဍ္ဍာပေတွာ ဘတ္တံ ဘုဉ္ဇိတုံ သက္ကောတီတိ ကာကုဍ္ဍေပကောတိ ဝစနတ္ထံ ဒဿေန္တော အာဟ ‘‘ယော ဝါမဟတ္ထေနာ’’တိအာဒိ. တတ္ထ ဥဍ္ဍာပေတွာတိ ဥဒ္ဓံ အာကာသံ ဂမနာပေတွာ. တန္တိ ကာကုဍ္ဍေပကံ.

၁၀၂. ဣတ္တရသဒ္ဒေါ အပ္ပမတ္တကဝါစကော အနိပ္ဖန္နပါဋိပဒိကောတိ အာဟ ‘‘အပ္ပမတ္တကော’’တိ. ‘‘ကတိပါဟမေဝါ’’တိ ဣမိနာ တဿ အတ္ထံ ဒဿေတိ.