၃၄. ဒါသဝတ္ထုကထာ

၉၇. ဒါသာတိ စေဋကာ. တေ ဟိ သာမိကေဟိ ဒုက္ခေ ဝါ ဒုဋ္ဌကမ္မေ ဝါ အသီယန္တိ ခိပီယန္တီတိ ဒါသာတိ ဝုစ္စန္တိ. တတ္ထာတိ စတူသု ဒါသေသု. ‘‘ဃရဒါသိယာ ပုတ္တော’’တိ ဣမိနာ အန္တောဂေဟေ ဃရဒါသိယာ ကုစ္ဆိမှိ ဇာတော အန္တောဇာတောတိ ဝစနတ္ထံ ဒဿေတိ. ဓနံ ဒတွာ ကီတော ဓနက္ကီတောတိ ဝစနတ္ထံ ဒဿေန္တော အာဟ ‘‘ဓနက္ကီတော နာမာ’’တိအာဒိ. ဓနေန ကီတော ဓနက္ကီတောတိ ဝစနတ္ထောပိ ယုတ္တောယေဝ. ဒါသစာရိတ္တန္တိ ဒေသကာလဝသေန ဒါသာနံ စာရိတ္တံ. တတ္ထ တတ္ထာတိ တသ္မိံ တသ္မိံ ဒေသေ၊ ကာလေ ဝါ.

ကရမရာနီတော နာမာတိ ဧတ္ထ ကရမရောတိ ဝန္ဒိ. သော ဟိ သတ္တူနံ ကရေန ဟတ္ထေန မရိတဗ္ဗတ္တာ ကရမရောတိ ဝုစ္စတိ. ကရမရဘာဝေန အာနီတော ကရမရာနီတော. တိရောရဋ္ဌာ အာဟရန္တီတိ သမ္ဗန္ဓော. ဥပလာပေတွာ ဝါတိ ပလောဘေတွာ ဝါ. တတောတိ ကသ္မာစိ ဂါမတော. မနုဿာ ဧဝ မာနုဿကာနိ. ဣတ္ထိပုရိသာနံ သာဓာရဏဘာဝေန သာမညဘာဝတော နပုံသကလိင်္ဂဝသေန ဝုတ္တံ. ပိသဒ္ဒေန န ကေဝလံ ဓနာနိယေဝ အာဟရန္တိ၊ အထ ခေါ မာနုဿကာနိပီတိ သမ္ပိဏ္ဍေတိ. တတ္ထာတိ မာနုဿကေသု. ဧဝရူပေါ ကရမရာနီတော ဒါသော န ပဗ္ဗာဇေတဗ္ဗောတိ ယောဇနာ. သဗ္ဗသာဓာရဏေနာတိ ဗန္ဓနာဂါရသောဓနကာလေ သဗ္ဗေသံ သာဓာရဏေန.

ဒါသဗျန္တိ ဒါသဿ ဘာဝေါ ဒါသဗျံ၊ တံ. တေန ဝုတ္တံ ‘‘ဒါသဘာဝ’’န္တိ. ‘‘သယမေဝါ’’တိ ဣမိနာ သာမံသဒ္ဒေါ သယမတ္ထေ နိပါတောတိ ဒဿေတိ. ဘုဇိဿိတ္ထိယောတိ ရညော ဘုဇိဿိတ္ထိယော. ဝဏ္ဏဒါသီဟီတိ နဂရသောဘိနီဟိ. တာ ဟိ ဝဏ္ဏသမ္ပန္နဒါသိဘာဝတော ဝဏ္ဏဒါသီတိ ဝုစ္စန္တိ. တာသန္တိ ဘုဇိဿိတ္ထီနံ. ပဏ္ဏန္တိ ဒါသိပဏ္ဏံ. ဘဋိပုတ္တကဂဏာဒီနန္တိ အာဒိသဒ္ဒေန မလ္လပုတ္တဂဏာဒယော သင်္ဂဏှာတိ. ဣမိနာ ဗဟုသာမိကဒါသံ ဒဿေတိ. တေဟီတိ ဘဋိပုတ္တကဂဏာဒီဟိ. အဒိန္နာ န ပဗ္ဗာဇေတဗ္ဗာတိ ဗဟူသု သာမိကေသု ဧကေနပိ အဒိန္နာ န ပဗ္ဗာဇေတဗ္ဗာ. တေပီတိ အာရာမိကဒါသေပိ. ဣမသ္မိံ အာရာမိကဒါသပဗ္ဗာဇနေ အဋ္ဌကထာဝါဒံ ဒဿေန္တော အာဟ ‘‘မဟာပစ္စရိယ’’န္တိအာဒိ. ‘‘တက္က’’န္တိ ပဒံ ‘‘အာသိတ္တက’’ဣတိ ပဒေ ကမ္မံ. ‘‘သီသေ’’တိ ပဒံ ‘‘အာသိတ္တက’’ဣတိ ပဒေ အာဓာရော. ကေသုစိ ဇနပဒေသု ဒေသစာရိတ္တဝသေန သီသေ တက္ကဿ အာသိဉ္စနံ ဒါသာနံ ဘုဇိဿကရဏန္တိ အဓိပ္ပါယော. ‘‘အာရာမိကံ ဒေမာ’’တိ ဝစနံ ဒါသာနံ ဘုဇိဿဝစနန္တိ ဝုတ္တံ ဟောတိ. ယေန ကေနစိ ဝေါဟာရေနာတိ ‘‘အာရာမိကံ ဒေမာ’’တိ ဝါ ‘‘အာရာမိကဒါသံ ဒေမာ’’တိ ဝါ ‘‘ကပ္ပိယကာရကံ ဒေမာ’’တိ ဝါ ယေန ကေနစိ ဝေါဟာရေန. ဒွီသု အဋ္ဌကထာဝါဒေသု ကုရုန္ဒိဝါဒဿ ပစ္ဆာ ဝုတ္တတ္တာ သောယေဝ ပမာဏန္တိ ဒဋ္ဌဗ္ဗံ. ဒုဂ္ဂတမနုဿာတိ ဒုက္ခံ ဂတမနုဿာ. ဧတေတိ ဒုဂ္ဂတမနုဿေ. တံ ပဗ္ဗာဇေတုံ န ဝဋ္ဋတီတိ မာတာပိတူနံ ဒါသဘာဝံ ဥပဂတကာလေ ဇာတံ ပုတ္တံ သန္ဓာယ ဝုတ္တံ. အထ ပန မာတာပိတရော ဒါသဘာဝံ ဥပဂတာ၊ န ပုတ္တော၊ တံ ပဗ္ဗာဇေတုံ ဝဋ္ဋတိ. ‘‘ဘိက္ခုဿာ’’တိပဒံ ‘‘ဉာတကာ ဝါ ဥပဋ္ဌာကာ ဝါ’’တိပဒေသု သာမိသမ္ဗန္ဓော၊ ‘‘ဒေန္တီ’’တိ ပဒေ သမ္ပဒါနံ. အဿာတိ ဘိက္ခုဿ. ဣမန္တိ ဒါသံ. အဘိရမိဿတီတိ ဘိက္ခုဘာဝေ အဘိရမိဿတိ. ဝိဗ္ဘမိဿတီတိ ဝိနိဝတ္တေတွာ ဂိဟိဘာဝံ ဘမိဿတိ. ဣတိ ဝတွာ ဒေန္တီတိ သမ္ဗန္ဓော. နိဿာမိကဒါသောတိ ပရိဂ္ဂါဟကသာမိကဝိရဟိတော ဒါသော. နိဿာမိကဿ ဒါသဿ ရာဇာ သာမီ၊ တသ္မာ ရညာ အပရိဂ္ဂဟိတေ အတ္တနာဝ အတ္တာနံ ဘုဇိဿံ ကာတုံ ဝဋ္ဋတိ. ပရိဂ္ဂဟိတေ ရာဇာနံ ကာရာပေတုံ ဝဋ္ဋတိ. အဇာနန္တောတိ အတ္တနော ဒါသဘာဝမဇာနန္တော.

အနုရာဓပုရာတိ အနုရာဓနဂရတော နိက္ခမိတွာတိ သမ္ဗန္ဓော. သောတိ ပုတ္တော. ဣဓာတိ ရောဟဏေ. မာတရံ ပုစ္ဆိတွာတိ သမ္ဗန္ဓော. အာဂမ္မာတိ အာဂန္တွာ. အတိစ္ဆထာတိ အတိက္ကမိတွာ ဣစ္ဆထ၊ ဣဓ ကိဉ္စိ ဒေယျဓမ္မံ နတ္ထိ၊ ဣဒံ အတိက္ကမိတွာ အညတ္ထ ဌာတုမိစ္ဆထာတိ ဝုတ္တံ ဟောတိ. တေတိ ဃရသာမိကာ. စတူဟိ ပစ္စယေဟိ ပဋိဇဂ္ဂန္တာ ဝသာပေသုန္တိ ယောဇနာ.