၃၃. ဣဏာယိကဝတ္ထုကထာ

၉၆. ဣဏာယိကော နာမာတိ ဧတ္ထ ဣဏန္တိ ဥဒ္ဓါရော. သော ဟိ ယသ္မာ ဧတိ ဝုဒ္ဓိံ ဂစ္ဆတိ၊ တသ္မာ ဣဏန္တိ ဝုစ္စတိ. တံ ဂဏှာတိ၊ ဓာရေတီတိ ဝါ ဣဏာယိကော. ယံ ဝါတိ ဇနံ ဝါ အာဌပေတွာတိ သမ္ဗန္ဓော. အာဌပေတွာတိ စ ပေသနတ္ထာယ ဓနသာမိကဿ သန္တိကေ ဌပေတွာတိ အတ္ထော. အာကာရော ဟိ ပေသနတ္ထဝါစကော. သောပီတိ ပိသဒ္ဒေါ ပုရိမဇနေ အပေက္ခတိ. ‘‘ဓာရေတီ’’တိ ဣမိနာ အာယိကပစ္စယော ဓာရဏတ္ထေ ဟောတီတိ ဒဿေတိ. အညေတိ မာတာပိတူဟိ အညေ. ဟီတိ သစ္စံ၊ ယသ္မာ ဝါ. တေတိ အညေ ဉာတကာ၊ တံ အာဌပေတုံ ယသ္မာ န ဣဿရာ၊ တသ္မာ န ဣဏာယိကောတိ ယောဇနာ. ဣတရန္တိ နဣဏာယိကတော အညံ. အဿာတိ ဇနဿ. နန္တိ တံ ဇနံ. တေသူတိ ဉာတိသာလောဟိတာဒီသု. တထာရူပဿာတိ အတ္တနော ဉာတိသာလောဟိတဿာတိ အတ္ထော. အာရောစေတဗ္ဗာကာရံ ဒဿေန္တော အာဟ ‘‘သဟေတုကော’’တိအာဒိ. တတ္ထ သဟေတုကောတိ ဘဗ္ဗော. သောတိ ဥပဋ္ဌာကော. ပဋိပဇ္ဇတီတိ ပဋိဒဒါတိ. ဧတန္တိ ကပ္ပိယဘဏ္ဍံ. အဇာနိတွာတိ ဣဏာယိကဘာဝမဇာနိတွာ. ပဿန္တေနာတိ ဣဏာယိကံ ပဿန္တေန. ‘‘အပဿန္တဿ ဂီဝါ န ဟောတီ’’တိ ဣမိနာ ပဿိတွာ အဒဿေန္တဿ ဂီဝါ ဟောတီတိ ဒဿေတိ.

ပုစ္ဆိယမာနောပီတိ ‘‘ကိံ တွံ ဣဏာယိကောသီ’’တိ ပုစ္ဆိယမာနောပိ. တန္တိ ဣဏာယိကံ. တတ္ထာတိ အညသ္မိံ ဒေသေ. တန္တိ ဣဏသာမိကံ. သောတိ ဣဏသာမိကော. အယန္တိ ဣဏာယိကော. အယန္တိ ဝစနာ. တတ္ထာတိ ဣဏာယိကဿ ပဗ္ဗာဇနေ. သာမီစီတိ အနုဓမ္မတာ.

နန္တိ ဣဏာယိကံ. သောတိ ဣဏသာမိကော. အဿာတိ ထေရဿ. ဂီဝါ န ဟောတီတိ သမ္ဗန္ဓော. အစ္ဆတူတိ အာသတု ဥပဝေသတူတိ အတ္ထော. သောတိ ဣဏာယိကော. ဤဒိသောတိ သဟေတုကော ဝတ္တသမ္ပန္နောတိ အတ္ထော. အတိအာရာဓကောတိ ဝတ္တာစာရေန ထေရဿ အတိတောသကော.