၂၈. စောရဝတ္ထုကထာ

၉၁. ဒိဋ္ဌပုဗ္ဗောတိ အင်္ဂုလိမာလော ပုဗ္ဗေ ဒိဋ္ဌော. အယန္တိ စောရော. သောတိ အင်္ဂုလိမာလော. အညေသံ သန္တိကာ ဝစနံ သုဏန္တီတိ ယောဇနာ. တေတိ မနုဿာ. ဥဗ္ဗိဇ္ဇန္တိပီတိ ကာယေန ဥဗ္ဗိဇ္ဇန္တိပိ. ဥတ္တသန္တိပီတိ စိတ္တေန ဥတ္တသန္တိပိ. အင်္ဂုလိမာလော ဘိက္ခူဟိ န ပဗ္ဗာဇိတော၊ နနု ဘဂဝတာ ပန သယံ ပဗ္ဗာဇိတော၊ အထ ကသ္မာ ‘‘န ဘိက္ခဝေ’’တိ ဝုတ္တန္တိ အာဟ ‘‘ဘဂဝါ သယံ ဓမ္မဿာမီ’’တိ. ဓမ္မဿာမီတိ စ ဓမ္မဿ ဣဿရော၊ ဓမ္မေန ဝါ ဒေဝမနုဿာနံ ဣဿရော၊ အဓိပတီတိ အတ္ထော. ဘိက္ခူနံ အကရဏတ္ထာယ ဘိက္ခူနံ သိက္ခာပဒန္တိ ယောဇနာ. တတ္ထာတိ ‘‘န ဘိက္ခဝေ’’တိအာဒိဝစနေ. ‘‘ဓဇံ ဗန္ဓိတွာ’’တိအာဒိနာ ဓဇဿ ဗန္ဓနံ ဓဇဗန္ဓော၊ ဓဇဗန္ဓော ဝိယာတိ ဓဇဗန္ဓော၊ ဓဇဗန္ဓော ဟုတွာ စရတီတိ ဓဇဗန္ဓောတိ ဝစနတ္ထံ ဒဿေတိ. တသ္မာတိ ယသ္မာ ဓဇဗန္ဓော၊ တသ္မာ. ယောတိ စောရော. ပန္ထဒုဟနံ ဝါတိ ပန္ထေ ဒုဟနံ ဝါ. ပညာယတိ စာတိ ဧတ္ထ စသဒ္ဒေါ ဝါကျသမ္ပိဏ္ဍနတ္ထော. န ကေဝလဉှိ ဝိစရတိယေဝ၊ အထ ခေါ ပညာယတိ စာတိ အတ္ထော. ဣဒန္တိ စောရကမ္မံ. ရဇ္ဇန္တိ ရာဇဘာဝံ. သောတိ ရာဇပုတ္တော. ဟီတိ သစ္စံ၊ ယသ္မာ ဝါ. တသ္မိန္တိ ရာဇပုတ္တေ. ပုဗ္ဗေတိ ပုဗ္ဗကာလေ. တန္တိ စောရံ. ဧဝန္တိ ဣမိနာကာရေန၊ ဇာနန္တိ စေတိ ယောဇနာ. အဒိဿမာနာတိ အတ္တာနံ အပညာယမာနာ. ဣဒံ သန္ဓိစ္ဆေဒါဒိစောရေ သန္ဓာယ ဝုတ္တံ၊ န အမ္ဗလဗုဇာဒိစောရေ. ပစ္ဆာပီတိ ထေယျကရဏတော ပစ္ဆာပိ. တေပီတိ စောရေပိ.

၉၂. ဘယေနာတိ ဘယတော. ဧတေ ပနာတိ ဘိက္ခူ ပန. လဒ္ဓါဘယတ္တာတိ ရာဇတော လဒ္ဓေါ အဘယော ဣမေဟီတိ လဒ္ဓါဘယာ၊ တေသံ ဘာဝေါ လဒ္ဓါဘယတ္တံ၊ တသ္မာ. ကာရဘေဒကောတိ ဧတ္ထ ကာရသဒ္ဒေါ ရုက္ခဝိသေသေ =၀၉ စ သက္ကာရေ စ ဗန္ဓနာလယေ စ ပဝတ္တတိ၊ ဣဓ ပန ဗန္ဓနာလယေတိ ဒဿေန္တော အာဟ ‘‘ကာရံ ဝုစ္စတိ ဗန္ဓနာဂါရ’’န္တိ. ဗန္ဓနာဂါရဉှိ ကရောန္တိ တံ ပဝေသိတေ ဇနေ ဟိံသန္တိ ဧတ္ထာတိ ‘‘ကာရာ’’တိ ဝုစ္စတိ. ဣဓာတိ ‘‘ကာရဘေဒကော’’တိပဒေ. ဒီပဗန္ဓနံ ဝါ ဟောတူတိ ယောဇနာ. ဣမေဟိ ပဒေဟိ န ကေဝလံ ဗန္ဓနာဂါရံယေဝ ကာရာ နာမ ဟောတိ၊ အထ ခေါ အန္ဒုဗန္ဓနာဒီနိပိ ကာရာယေဝ နာမာတိ ဒဿေတိ. ယောတိ စောရော. ဧတေသူတိ ဗန္ဓနေသု. မုဉ္စိတွာ ဝါတိ ရဇ္ဇုဗန္ဓနံ နိဗ္ဗေဌေတွာ ဝါ. ဣမေဟိ ပဒေဟိ န ကေဝလံ ကာရာယ ဘိန္ဒနတော ဧဝ ကာရဘေဒကော နာမ ဟောတိ၊ အထ ခေါ ဆိန္ဒနမုဉ္စနဝိဝရဏေဟိပိ ကာရဘေဒကောယေဝ နာမာတိ ဒဿေတိ. ဒီပန္တရန္တိ ဗန္ဓနဒီပတော အန္တရံ အညံ ဒီပန္တိ အတ္ထော. စက္ကဝါဠဗန္ဓနံ ဘိန္ဒိတွာ စက္ကဝါဠန္တရံ ဂတော အဋ္ဌကထာယံ န ဝုတ္တော. သောတိ နစောရကော. ဂါမနိဂမပဋ္ဋနာဒီနီတိ ဧတ္ထ ပဋ္ဋနန္တိ နာဝါပဋ္ဋနံ၊ သကဋပဋ္ဋနဉ္စ. ကေဏိယာတိ ရညော ဒါတဗ္ဗအာယေန. တန္တိ ကေဏိံ. နိဓာနန္တိ နိက္ခဏိတွာ ဌပိတံ ဓနံ. ဥပသံဟရိတွာတိ ရာဇာဒီနံ သန္တိကံ ဟရိတွာ. တန္တိ ကသိကမ္မာဒီဟိ သမ္ပာဒေတွာ ဇီဝန္တံ. တတ္ထေဝါတိ ဗန္ဓာပိတဋ္ဌာနေယေဝ.

၉၃. ယတ္ထာတိ ယသ္မိံ ဌာနေ. ယော ကောစိ ပလာတောတိ သမ္ဗန္ဓော. နန္တိ ယံ ကိဉ္စိ ဇနံ၊ လိခါပေတီတိ ယောဇနာ. ပဏ္ဏေ ဝါတိ ကုသေ ဝါ. အဿာတိ ဇနဿ. ဒဏ္ဍန္တိ ဓနဒဏ္ဍံ. လိခိတကောတိ လိခိတဗ္ဗောတိ လိခိတော၊ သောယေဝ လိခိတကော.

၉၄. ယော ပန ကသာဟိ ဟညတီတိ သမ္ဗန္ဓော. ဣမိနာ အညေဟိ ကသာဟိ ဟညတီတိ ကသာဟတောတိ ဝစနတ္ထံ ဒဿေတိ. ‘‘အယမေဝ တေ ဒဏ္ဍော ဟောတူ’’တိ ဣမိနာ ကတံ ဒဏ္ဍကမ္မံ ဣမဿာတိ ကတဒဏ္ဍကမ္မောတိ ဝစနတ္ထံ ဒဿေတိ. အလ္လဝဏောတိ တိန္တဝဏော. ဃာတေတွာတိ ဟနိတွာ ပဟရိတွာတိ အတ္ထော. ဂဏ္ဍိဂဏ္ဍိယောတိ ဖောဋဖောဋာ. သန္နိသိန္နာသူတိ ဂဏ္ဍီသု ပကတိသရီရေန သမံ နိသိန္နာသု.

၉၅. ကတဒဏ္ဍကမ္မဘာဝေါ တာဝ ပုရိမနယေနေဝ ဝေဒိတဗ္ဗော ဟောတု၊ ကထံ ပန လက္ခဏာဟတဘာဝေါ ဝေဒိတဗ္ဗောတိ အာဟ ‘‘ယဿ ပနာ’’တိအာဒိ. တတ္ထ တတ္တေနာတိ တာပေန. လက္ခဏန္တိ သညာဏံ. သောတိ ဇနော. ဘုဇိဿောတိ ဘုဇော ဧတဿတ္ထီတိ ဘုဇိဿော (မ. နိ. ဋီ. ၂.၄၂၆). ပရေဟိ အပါလိတော စ အနဇ္ဈောဟရာပိတော စ ဟုတွာ သယမေဝ အတ္တာနံ ပါလနေန စ ဘောဇနံ အဇ္ဈောဟရဏေန စ သမန္နာဂတောတိ ဝုတ္တံ ဟောတိ. အဿာတိ လက္ခဏာဟတဿ. ဝဏာတိ အရူနိ. တာနိ ဟိ ယသ္မာ ဝဏန္တိ ဂတ္တာနိ ဝိစုဏ္ဏာနိ ကရောန္တိ၊ တသ္မာ ဝဏာတိ ဝုစ္စန္တိ. ရူဠှာတိ တရုဏမံသေန ရုဟာ. တိမဏ္ဍလဝတ္ထဿ လက္ခဏာဟတဿ ဇနဿာတိ သမ္ဗန္ဓော.