၂၄. ဥပသမ္ပာဒေတဗ္ဗဆက္ကကထာ

၈၅. တန္တိ ဦနဒသဝဿပဒံ. သဗ္ဗတ္ထာတိ သဗ္ဗေသု ဆက္ကေသု. တတ္ထာတိ ဆက္ကေသု. ‘‘ပါတိမောက္ခာနိ ဝိတ္ထာရေနာ’’တိ ဝုတ္တတ္တာ ဝိဘင်္ဂဝသေန ဂဟေတဗ္ဗာနီတိ အာဟ ‘‘ဥဘတောဝိဘင်္ဂဝသေန ဝုတ္တာနီ’’တိ. မာတိကာဝိဘင်္ဂဝသေန သုဋ္ဌု ဝိဘဇိတဗ္ဗာနီတိ သုဝိဘတ္တာနိ၊ ဝါစုဂ္ဂတဝသေန သုန္ဒရာ ပဝတ္တိ ဧတေသန္တိ သုပ္ပဝတ္တီနိ၊ သုတ္တတော အနုဗျဉ္ဇနတော သုဋ္ဌု ဝိနိစ္ဆိတဗ္ဗာနီတိ သုဝိနိစ္ဆိတဗ္ဗာနီတိ အတ္ထံ ဒဿေန္တော အာဟ ‘‘မာတိကာဝိဘင်္ဂဝသေနာ’’တိအာဒိ.