၂၅. အညတိတ္ထိယပုဗ္ဗဝတ္ထုကထာ

၈၆. ယော ပနာတိ ယော ပန အညတိတ္ထိယပုဗ္ဗော. အညောပီတိ ပသူရတော အပရောပိ. ဣဓာတိ ဣမသ္မိံ သာသနေ. တသ္မိန္တိ အညတိတ္ထိယပုဗ္ဗေ. တတ္ထာတိ ‘‘ယော သော ဘိက္ခဝေ အညောပီ’’တိအာဒိဝစနေ. အယန္တိ ပရိဝါသော. နဂ္ဂပရိဗ္ဗာဇကဿေဝါတိ ဝတွာ တဿ ဘေဒံ ဒဿေတုံ ဝုတ္တံ ‘‘အာဇီဝကဿ ဝါ အစေလကဿ ဝါ’’တိ. တတ္ထ အာဇီဝကော ဥပရိ ဧကမေဝ ဝတ္ထံ ဥပကစ္ဆကေ ပဝေသေတွာ ပရိဒဟတိ၊ ဟေဋ္ဌာ နဂ္ဂေါ. အစေလကော ပန သဗ္ဗေန သဗ္ဗံ နဂ္ဂေါယေဝ. သောပီတိ =၀၃ နဂ္ဂပရိဗ္ဗာဇကောပိ. ဝါလကမ္ဗလာဒီနန္တိ ဝါလေန ကတံ ကမ္ဗလံ၊ အာဒိသဒ္ဒေန ကေသကမ္ဗလာဒယော သင်္ဂဏှာတိ. အဿာတိ ပရိဗ္ဗာဇကဿ. အညဿာတိ နဂ္ဂပရိဗ္ဗာဇကတော အပရဿ. ပဏ္ဍရင်္ဂါဒိကဿာတိ ပဏ္ဍရံ သေတဝတ္ထံ အင်္ဂေ သရီရေ ဧတဿတ္ထီတိ ပဏ္ဍရင်္ဂေါ၊ အာဒိသဒ္ဒေန နီလင်္ဂါဒယော သင်္ဂဏှာတိ.

ဧဝန္တိ ဣမိနာ ကေသမဿုဩရောပနာဒိနာ. ပဗ္ဗာဇေန္တေဟိ ဘိက္ခူဟီတိ သမ္ဗန္ဓော. တသ္မိန္တိ အညတိတ္ထိယပုဗ္ဗေ၊ နိသိန္နေယေဝါတိ ယောဇနာ. အနာဒရေ စေတံ ဘုမ္မဝစနံ. တဿာတိ အညတိတ္ထိယပုဗ္ဗဿ. နယိမေတိ န ဣမေ၊ ဘိက္ခူတိ သမ္ဗန္ဓော. တန္တိ အညတိတ္ထိယပုဗ္ဗံ.

၈၇. ‘‘ဧဝံ ခေါ။ပေ။ အနာရာဓကော’’တိ အယံ ကထာ မာတိကာတိ ယောဇနာ. အဿာတိ အညတိတ္ထိယပုဗ္ဗဿ. တဿေဝါတိ တဿာယေဝ မာတိကာယ. တတ္ထာတိ ဝိဘင်္ဂေ. အတိကာလေနာတိ ဧတ္ထ ဘတ္တကိစ္စံ ကတွာ ဝတ္တကရဏဝေလာယေဝ အတိကာလော နာမာတိ ဒဿေန္တော အာဟ ‘‘ဝတ္တကရဏဝေလာယမေဝါ’’တိ. ဣမိနာ ဘုမ္မတ္ထေ ကရဏဝစနန္တိပိ ဒဿေတိ. တတ္ထေဝါတိ ကုလဃရေသုယေဝ. အညဒတ္ထူတိ ဧကံသေန၊ ‘‘ကရောန္တော’’တိ ဣမိနာ ပါဌသေသံ ဒဿေတိ. ဧဝမ္ပိ ကရောန္တော အညတိတ္ထိယပုဗ္ဗောတိ ယောဇနာ. ‘‘သမ္ပာဒကော’’တိ ဣမိနာ အနာရာဓကောတိ ဧတ္ထ အာရာဓသဒ္ဒဿ သာဓနတ္ထံ ဒဿေတိ၊ တောသနတ္ထာဒယော နိဝတ္တေတိ.

အဇ္ဈာစာရတ္ထိကာ ဝိသန္တိ ပဝိသန္တိ ဧတ္ထာတိ ဝေသိယာ၊ သောဘဏရူပသင်္ခါတံ ဝေသံ ဓာရေတီတိ ဝါ ဝေသိယာ. တေန ဝုတ္တံ ‘‘သုလဘဇ္ဈာစာရာ’’တိအာဒိ. အာမိသောယေဝ ကိဉ္ဇက္ခော အပ္ပမတ္တကဋ္ဌေနာတိ အာမိသကိဉ္ဇက္ခော၊ ဝိသေသနပရပဒေါ. အထ ဝါ အာမိသော စ တတော အညော ကိဉ္ဇက္ခော စ အာမိသကိဉ္ဇက္ခံ၊ တဿ သမ္ပဒါနံ အာမိသကိဉ္ဇက္ခသမ္ပဒါနံ. ကိဉ္ဇက္ခသဒ္ဒေါ ကေသရဿေဝ မုချတော ဝါစကော၊ အပ္ပမတ္တကဿ ပန ရူဠှီဝသေန. ဝိဓဝါတိ ဧတ္ထ ဓဝသဒ္ဒေါ ပတိနောယေဝ ဝါစကော၊ န ရုက္ခဝိသေသဿာတိ ဒဿေန္တော အာဟ ‘‘မတပတိကာ ဝါ’’တိအာဒိ. ဣမေဟိ ပဒေဟိ မတဝသေန ဝါ ပဝုတ္ထဝသေန ဝါ ဝိဂတော ဓဝေါ ဧတာသံ၊ ဓဝေန ဝါ ဝိဂတာတိ ဝိဓဝါတိ ဝစနတ္ထံ ဒဿေတိ. တာတိ ဝိဓဝါ. ယောဗ္ဗနပတ္တတ္တာ ဝါ ယောဗ္ဗနာတီတတ္တာ ဝါ ထုလ္လာ မဟန္တာ ကုမာရိကာတိ ထုလ္လကုမာရိကာတိ ဒဿေန္တော အာဟ ‘‘ယောဗ္ဗနပတ္တာ’’တိအာဒိ. ပဏ္ဍကာတိ ဧတ္ထ အာသိတ္တပဏ္ဍကာဒီသု ပဉ္စသု ပဏ္ဍကေသု နပုံသကပဏ္ဍကောဝါဓိပ္ပေတောတိ အာဟ ‘‘နပုံသကာ’’တိ. သမာနပဗ္ဗဇ္ဇာတိ ဘိက္ခူဟိ သမာနပဗ္ဗဇ္ဇာ. တတောတိ ဝိဿာသတော.

တတ္ထာတိ ဝေသိယာဒီသု. တာသန္တိ ဝေသိယာနံ. သောတိ အညတိတ္ထိယပုဗ္ဗော. သဗ္ဗတ္ထာတိ သဗ္ဗေသု =၀၄ ဝိဓဝါဒီသု. ဂန္တဗ္ဗတံ ဒဿေန္တော အာဟ ‘‘သစေ ပနာ’’တိအာဒိ. တထာတိ ယထာ ဂန္တဗ္ဗတ္တံ ဝုတ္တံ၊ တထာ.

ဥစ္စာဝစာနီတိ ဧတ္ထ ဥဒ္ဓံ စယတိ ဝဍ္ဎတီတိ ဥစ္စံ၊ စယတော အဝဂတော ဝိယောဂေါတိ အဝစံ. ဥစ္စဉ္စ အဝစဉ္စ ဥစ္စာဝစာနီတိ ဝစနတ္ထေန မဟန္တခုဒ္ဒကတ္ထောတိ အာဟ ‘‘မဟန္တခုဒ္ဒကာနီ’’တိ. ‘‘ကမ္မာနီ’’တိ ဣမိနာ ‘‘ကရဏီယာနီ’’တိပဒဿ သရူပံ ဒဿေတိ. တံဒဿနေန စ ကတ္တဗ္ဗာနီတိ ကရဏီယာနီတိ ဝစနတ္ထော ကာတဗ္ဗော. တတ္ထာတိ မဟန္တခုဒ္ဒကေသု ကမ္မေသု. တတ္ထ န ဒက္ခောတိ ဧတ္ထ တသဒ္ဒဿ ဝိသယံ ဒဿေတုံ ဝုတ္တံ ‘‘တေသု တေသု နဝကမ္မေသူ’’တိ. ‘‘ဥဋ္ဌာနဝီရိယသမ္ပန္နော’’တိ ဣမိနာ နတ္ထိ အလသော ကောသဇ္ဇံ ဧတဿာတိ အနလသောတိ ဝစနတ္ထံ ဒဿေတိ. တတြာတိ ဧတ္ထ တြပစ္စယော သတ္တမျတ္ထေ ဝိစ္ဆာဇောတကောတိ အာဟ ‘‘တေသု တေသူ’’တိ. ‘‘ဌာနုပ္ပတ္တိကာယ ဝီမံသာယာ’’တိ ဝုတ္တဝစနဿတ္ထံ ဒဿေန္တော အာဟ ‘‘ဣဒမေဝ’’န္တိအာဒိ. ‘‘တသ္မိံယေဝ ခဏေ ဥပ္ပန္နပညာယာ’’တိ ဣမိနာ ‘‘ဌာနုပ္ပတ္တိကာယာ’’တိ ဧတ္ထ ဌာနသဒ္ဒေါ တင်္ခဏတ္ထောတိ ဒဿေတိ. အလံ ကာတုန္တိ ဧတ္ထ အလံသဒ္ဒေါ ဘူသနဝါရဏပရိယတ္တသင်္ခါတေသု တီသု အတ္ထေသု ပရိယတ္တတ္ထောတိ အာဟ ‘‘ကာတုံ သမတ္ထော’’တိ.

တိဗ္ဗစ္ဆန္ဒောတိ တိခိဏဆန္ဒော. ‘‘ဗလဝစ္ဆန္ဒော’’တိ ဣမိနာ အဓိပ္ပါယတ္ထံ ဒဿေတိ. လောကိယသမာဓိဘာဝနာယာတိ လောကိယာယ အဋ္ဌသမာပတ္တိသင်္ခါတာယ သမာဓိဘာဝနာယ.

ဣဓာဂတောတိ ဣမသ္မိံ သာသနေ အာဂတော. တိတ္ထာယတနသာမိကဿာတိ တရန္တိ ဥပ္လဝန္တိ သတ္တာ ဥမ္မုဇ္ဇနိမုဇ္ဇံ ကရောန္တိ ဧတ္ထာတိ တိတ္ထံ၊ ဒွါသဋ္ဌိ ဒိဋ္ဌိယော. တမေဝ အာယတနံ ဒိဋ္ဌိဂတိကာနန္တိ တိတ္ထာယတနံ. အထ ဝါ တိတ္ထမေတေသမတ္ထီတိ တိတ္ထိနော၊ တေသမာယတနံ တိတ္ထာယတနံ၊ တဿ သာမိကော တိတ္ထာယတနသာမိကော၊ တဿ. တဿ ဒိဋ္ဌိယာတိ ဧတ္ထ ဒိဋ္ဌိသဒ္ဒေါ လဒ္ဓိပရိယာယောတိ အာဟ ‘‘တဿ သန္တကာယ လဒ္ဓိယာ’’တိ. ကသ္မာ သာ လဒ္ဓိ ‘‘ခန္တီ’’တိ စ ‘‘ရုစီ’’တိ စ ‘‘အာဒါယော’’တိ စ ဝုစ္စတီတိ အာဟ ‘‘ဣဒါနီ’’တိအာဒိ. သာယေဝ လဒ္ဓိ ခမတိ စေဝ ရုစ္စတိ စ ဂဟိတာ စာတိ ယောဇနာ. တဿ တိတ္ထကရဿာတိ ကတွတ္ထေ သာမိဝစနံ. တဿာတိ တိတ္ထာယတနသာမိကဿ. ဘညမာနာယာတိ ဘဏိယမာနာယ. အနဘိရဒ္ဓေါတိ ဧတ္ထ အနဘိရာဓိတော အပရိတောသိတစိတ္တောတိ အတ္ထံ ဒဿေန္တော အာဟ ‘‘အပရိပုဏ္ဏသင်္ကပ္ပေါ၊ နော ပဂ္ဂဟိတစိတ္တော’’တိ. ယဒိဒန္တိ ယံ ဣဒံ ‘‘အနတ္တမနတ္တ’’န္တိ ဝါ ‘‘အတ္တမနတ္တ’’န္တိ ဝါ သမ္ဗန္ဓော. ဣမိနာ ‘‘ဣဒ’’န္တိပဒဿ အနိယမံ ဒဿေတိ. ဣမေတိ ဘိက္ခူ. ယဉ္စ အနတ္တမနတ္တန္တိ ယောဇနာ. တဿေဝါတိ အညတိတ္ထိယပုဗ္ဗဿ ဧဝ အနတ္တမနတ္တန္တိ သမ္ဗန္ဓော. ဣဒန္တိ ဒွေ အတ္တမနတ္တာနိ၊ ဒွေ အနတ္တမနတ္တာနီတိ စတုဗ္ဗိဓံ ဣဒံ ဓမ္မဇာတံ. သင်္ဃာဋနီယန္တိ သင်္ဃဋိတဗ္ဗံ၊ သန္နိစယံ ကာတဗ္ဗန္တိ အတ္ထော. ‘‘အနာရာဓကေ’’တိအာဒိနာ အနာရာဓနီယသ္မိန္တိ =၀၅ ဧတ္ထ န အာရာဓေတိ ဝတ္တံ အနေန ကမ္မေနာတိ အနာရာဓနီယန္တိ ဝစနတ္ထံ ဒဿေတိ. ဣဒန္တိ စတုဗ္ဗိဓံ. လိင်္ဂန္တိ ကာရဏံ. လက္ခဏန္တိ စိဟနံ. ဣတောတိ အဋ္ဌင်္ဂတော နီဟဋေနာတိ သမ္ဗန္ဓော. ဝုတ္တဝိပလ္လာသေနာတိ ကဏှပက္ခေ ဝုတ္တဝိပရီတေန.

သုက္ကပက္ခေ အဋ္ဌင်္ဂါနိ သမောဓာနေတွာ ဒဿေန္တော အာဟ ‘‘နာတိကာလေန ဂါမပဝေသနံ နာတိဒိဝါ ပဋိက္ကမန’’န္တိအာဒိ. ကဏှပက္ခေပိ ဣမိနာ နယေန အဋ္ဌင်္ဂါနိ သမောဓာနေတဗ္ဗာနိ. ‘‘ပရိတောသကော’’တိ ဣမိနာ အာရာဓကသဒ္ဒဿ တောသနတ္ထံ ဒဿေတိ. ဟေဋ္ဌာ ပန ‘‘သမ္ပာဒကော’’တိ ဝုတ္တတ္တာ သာဓနတ္ထံ ဒဿေတီတိ ဒဋ္ဌဗ္ဗံ.

ဥပသမ္ပဒမာဠကေပီတိ ဥပသမ္ပာဒဋ္ဌာနေ ဧကကူဋယုတ္တေ အနေကကောဏေ ပတိဿယဝိသေသေပိ. သော ဟိ ဧကကူဋံ ကတွာ အနေကေဟိ ကောဏေဟိ မလီယတိ ဝိဘူသီယတီတိ မာဠောတိ ဝုစ္စတိ. ‘‘စတ္တာရော မာသေ ပရိဝသိတဗ္ဗ’’န္တိဝစနံ အသဒိသူပမာယ ပါကဋံ ကရောန္တော ‘‘ယထာ ပနာ’’တိအာဒိမာဟ. ဟီတိ သစ္စံ. အဿာတိ အညတိတ္ထိယပုဗ္ဗဿ. ပရိဝသန္တော အညတိတ္ထိယပုဗ္ဗောတိ သမ္ဗန္ဓော. အန္တရာတိ စတုမာသဿ အဗ္ဘန္တရေ. ကုပ္ပနသဘာဝေါတိ နဿနသဘာဝေါ. ပရိဂ္ဂဏှာတီတိ ပရိစ္ဆိန္ဒိတွာ ဂဏှာတိ. နာမရူပံ ဝဝတ္ထပေတီတိ ‘‘ဣဒံ နာမံ၊ ဣဒံ ရူပ’’န္တိ ဝဝတ္ထပေတိ. လက္ခဏန္တိ နမနရုပ္ပနလက္ခဏံ၊ အနိစ္စာဒိလက္ခဏံ ဝါ. သောတာပတ္တိမဂ္ဂဿ ဒိဋ္ဌိဝိစိကိစ္ဆာပဟာနံ သန္ဓာယ ဝုတ္တံ ‘‘သမူဟတာနိ။ပေ။ သလ္လ’’န္တိ. အဗ္ဗုဠှန္တိ အာဝဟိယိတ္ထာတိ အဗ္ဗုဠှံ၊ ဥဒ္ဓံ ဝဟိယိတ္ထာတိ အတ္ထော. အာတျူပသဂ္ဂေါ ဟိ ဥဒ္ဓင်္ဂမတ္ထော. တံဒိဝသမေဝါတိ တသ္မိံ သောတာပတ္တိမဂ္ဂဿ ပဋိလဘနဒိဝသေယေဝ. ဘုမ္မတ္ထေ စေတံ ဥပယောဂဝစနံ. တဒဟေဝါတိ တသ္မိံ သောတာပန္နဘဝနအဟနိ ဧဝ.

တဿာတိ အညတိတ္ထိယပုဗ္ဗဿ. ပါဠိယံ ပတ္တဿ အနာဂတတ္တာ ဝုတ္တံ ‘‘ပတ္တမ္ပိ တထေဝါ’’တိ. ယထာ ဥပဇ္ဈာယမူလကံ စီဝရံ ပရိယေသိတဗ္ဗံ၊ ပတ္တမ္ပိ တထေဝါတိ အတ္ထော. ဣဒန္တိ ပတ္တစီဝရံ. ဣမဿာတိ အညတိတ္ထိယပုဗ္ဗဿ. အညေတိ ဥပဇ္ဈာယတော အပရေ. တေဟိပီတိ အညေဟိပိ. ဝိလောမာတိ ပဋိလောမာ. အာယတ္တန္တိ အဓီနံ. အာယတ္တဇီဝိကတ္တာတိ အညတိတ္ထိယပုဗ္ဗဿ ဥပဇ္ဈာယေန အာယတ္တဇီဝိကတ္တာ. တဿာတိ ဥပဇ္ဈာယဿ. ဝစနကရောတိ ဝစနံ ကရော. ဝါကျေပိ သမာသေပိ ဝစနသဒ္ဒဿ ‘‘တဿာ’’တိ ပဒမေဝ အပေက္ခတ္တာ ‘‘ဝစနကရော’’တိ သမာသော ဟောတိ. ဧသေဝ နယော ‘‘ဥပဇ္ဈာယေန အာယတ္တဇီဝကတ္တာ’’တိ ဧတ္ထာပိ. တေနာတိ ဝစနကရဟေတုနာ.

အဂ္ဂိပရိစရဏကာတိ =၀၆ အဂ္ဂိပူဇကာ. ဣမိနာ အဂ္ဂိံ ပရိစရန္တီတိ အဂ္ဂိကာတိ ဝစနတ္ထံ ဒဿေတိ. တာပသာတိ ဇဋာဓရာ. တေ ဟိ ယသ္မာ ဇဋာ စ တပေါ စ ဧတေသမတ္ထိ၊ တသ္မာ ‘‘ဇဋိလာ’’တိ စ ‘‘တာပသာ’’တိ စ ဝုစ္စန္တိ. ဧတေတိ ဇဋိလကာ. ‘‘ကိရိယံ န ပဋိဗာဟန္တီ’’တိ ဝုတ္တဝစနဿ အတ္ထံ ဒဿေန္တော အာဟ ‘‘အတ္ထိ ကမ္မံ၊ အတ္ထိ ကမ္မဝိပါကော’’တိ. ဧတဒေဝ ပဗ္ဗဇ္ဇန္တိ ဧတံ ဧဝ တာပသပဗ္ဗဇ္ဇံ. ဧတေသန္တိ ဇဋိလာနံ. သာသနေတိ ဗုဒ္ဓဿ သာသနေ. တေသန္တိ ဉာတီနံ၊ ဣမံ ပရိဟာရန္တိ သမ္ဗန္ဓော. တေတိ ဉာတယော. ဟီတိ သစ္စံ၊ ယသ္မာ ဝါ. ဉာတိသေဋ္ဌဿာတိ ဉာတိယေဝ သေဋ္ဌော၊ ဉာတီနံ ဝါတိ ဉာတိသေဋ္ဌော၊ တဿ၊ ဗုဒ္ဓဿာတိ သမ္ဗန္ဓော.