၁၂. ဥရုဝေလပါဋိဟာရိယကထာ

၃၈. ပရိယာဒိယေယျန္တိ ဧတ္ထ ဒါဓာတုဿ ပရီတိ စ အာတိ စ ဥပသဂ္ဂဝသေန အဘိဘဝနတ္ထောတိ အာဟ ‘‘အဘိဘဝေယျ’’န္တိ.

၃၉. ပစ္ဆာ ပက္ခိတ္တာတိ သင်္ဂီတိတော ပရံ ပေါတ္ထကာရူဠှေဟိ ဌပိတာတိ အတ္ထော.

၄၄. ‘‘ဧဝံ ဝဒန္တော ဝိယ ဩဏတော’’တိ ဣမိနာ ‘‘အာဟရဟတ္ထော’’တိပဒဿ တဒ္ဓိတဘာဝံ ဒဿေတိ. ဝိတ္ထိဏ္ဏမုခတ္တာ မန္ဒံ ဟီနံ အတိမုခမေတာသန္တိ ဝစနတ္ထေန အဂ္ဂိကပါလာ မန္ဒာမုခိယောတိ ဝုစ္စန္တီတိ အာဟ ‘‘အဂ္ဂိဘာဇနာနိ ဝုစ္စန္တီ’’တိ.

၅၁. ယသ္မာ ယော နာဂဒမနကာလော စိရံ ပတတိ ပဝတ္တတိ၊ တသ္မာ သော စိရပတိကောတိ ဝုစ္စတိ၊ တသ္မာ စိရပတိကာ ပဋ္ဌာယ အဘိပ္ပသန္နာတိ ယောဇနာ. ဣတိ ဣမမတ္ထံ ဒဿေန္တော အာဟ ‘‘စိရကာလတော ပဋ္ဌာယာ’’တိ.

၅၂. သဗ္ဗတ္ထာတိ သဗ္ဗေသု ‘‘ဇဋာမိဿ’’န္တိအာဒိပဒေသု. ခါရိကာဇန္တိ ဧတ္ထ ကမဏ္ဍလုအာဒိကာ တာပသပရိက္ခာရာ ခါရီတိ ဝုစ္စန္တိ၊ ခါရိသင်္ခါတေန ဘာရေန ပူရိတော ကာဇော ခါရိကာဇောတိ အတ္ထံ ဧကဒေသေန ဒဿေန္တော အာဟ ‘‘ခါရိဘာရော’’တိ.