၄. ဒုဋ္ဌုလ္လသိက္ခာပဒံ

၃၉၉. စတုတ္ထေ အတ္ထုဒ္ဓါရဝသေန ဒဿိတာနိ ဒုဋ္ဌုလ္လသဒ္ဒတ္ထဘာဝေန သဒိသတ္တာတိ အဓိပ္ပါယော. ‘‘ဓုရ’’န္တိ ဧတ္ထ လက္ခဏဝန္တတ္တာ ဘုမ္မတ္ထေ ဥပယောဂဝစနန္တိ အာဟ ‘‘ဓုရေ’’တိ. ဓုရေ နိက္ခိတ္တမတ္တေ သတီတိ ယောဇနာ.

ဧဝံ ဓုရံ နိက္ခိပိတွာတိ ‘‘အညဿ နာရောစေဿာမီ’’တိ ဧဝံ ဓုရံ နိက္ခိပိတွာ. အညဿာတိ ဝတ္ထု၊ ပုဂ္ဂလတော အညဿ ဒုတိယဿ. သောပီတိ ဒုတိယောပိ. အညဿာတိ တတိယဿ. ယာဝ ကောဋိ န ဆိဇ္ဇတိ၊ တာဝ အာပဇ္ဇတိယေဝါတိ ယောဇနာ. တဿေဝါတိ အာပတ္တိံ အာပန္နပုဂ္ဂလဿ. ဝတ္ထုပုဂ္ဂလောယေဝါတိ အာပတ္တိံ အာပန္နပုဂ္ဂလောယေဝ. အယန္တိ ပဌမဘိက္ခု. အညဿာတိ ဒုတိယဿ. သောတိ ဒုတိယော အာရောစေတီတိ သမ္ဗန္ဓော. ယေနာတိ ပဌမဘိက္ခုနာ. အဿာတိ ဒုတိယဿ. တဿေဝါတိ ပဌမဘိက္ခုဿေဝ. ဝတ္ထုပုဂ္ဂလံ ဥပနိဓာယ ‘‘တတိယေန ပုဂ္ဂလေန ဒုတိယဿာ’’တိ ဝုတ္တံ.

၄၀၀. ပဉ္စာပတ္တိက္ခန္ဓေတိ ထုလ္လစ္စယာဒိကေ ပဉ္စ အာပတ္တိက္ခန္ဓေ. အဇ္ဈာစာရော နာမာတိ အဓိဘဝိတွာ ဝီတိက္ကမိတွာ အာစရိတဗ္ဗတ္တာ အဇ္ဈာစာရော နာမာတိ. စတုတ္ထံ.