၃. ဟသဓမ္မသိက္ခာပဒံ

၃၃၅. တတိယေ ပကာရေန ကရီယတိ ဌပီယတီတိ ပကတံ ပညတ္တန္တိ ဒဿေန္တော အာဟ ‘‘ယံ ဘဂဝတာ’’တိအာဒိ. ယန္တိ သိက္ခာပဒံ.

၃၃၆. ဟသသင်္ခါတော ဓမ္မော သဘာဝေါ ဟသဓမ္မောတိ ဝုတ္တေ အတ္ထတော ကီဠိကာယေဝါတိ အာဟ ‘‘ကီဠိကာ ဝုစ္စတီ’’တိ.

၃၃၇. ဂေါပ္ဖကာနန္တိ စရဏဂဏ္ဌိကာနံ. တေ ဟိ ပါဒေ ပါဒံ ဌပနကာလေ အညမညူပရိ ဌပနတော ဂေါပီယန္တီတိ ဂေါပ္ဖါ၊ တေ ဧဝ ဂေါပ္ဖကာတိ ဝုစ္စန္တိ. ပါဒဿ ဟိ ဥပရိ ပါဒံ ဌပနကာလေ ဧကဿ ဥပရိ ဧကော န ဌပေတဗ္ဗော. တေနာဟ ဘဂဝါ ‘‘ပါဒေ ပါဒံ အစ္စာဓာယာ’’တိ (ဒီ. နိ. ၂.၁၉၆၊ မ. နိ. ၁.၄၂၃၊ အ. နိ. ၃.၁၆). ဩဋ္ဌဇော ဒုတိယော. ဩရောဟန္တဿ ဘိက္ခုနောတိ သမ္ဗန္ဓော.

၃၃၈. ဖိယာရိတ္တာဒီဟီတိ အာဒိသဒ္ဒေန လင်္ကာရာဒယော သင်္ဂဏှာတိ. ကေစိ ဝဒန္တီတိ သမ္ဗန္ဓော. ပတနုပ္ပတနဝါရေသူတိ ပတနဝါရ ဥပ္ပတနဝါရေသု. တတ္ထာတိ တဿံ ခိတ္တကထလာယံ. ဟီတိ သစ္စံ၊ ယသ္မာ ဝါ. ဌပေတွာ ကီဠန္တဿာတိ သမ္ဗန္ဓော. လိခိတုံ ဝဋ္ဋတိ ကီဠာဓိပ္ပါယဿ ဝိရဟိတတ္တာတိ အဓိပ္ပါယော. ကီဠာဓိပ္ပါယေန အတ္ထဇောတကံ အက္ခရံ လိခန္တဿာပိ အာပတ္တိယေဝါတိ ဝဒန္တိ. ဧတ္ထာတိ ဣမသ္မိံ သိက္ခာပဒေတိ. တတိယံ.