၄. အနာဒရိယသိက္ခာပဒံ

၃၄၂. စတုတ္ထေ ဓမ္မော နာမ တန္တိယေဝါတိ အာဟ ‘‘တန္တီ’’တိ. ပဝေဏီတိ တဿေဝ ဝေဝစနံ. ‘‘တံ ဝါ န သိက္ခိတုကာမော’’တိ ဧတ္ထ တံသဒ္ဒဿ အတ္ထမာဝိကာတုံ ဝုတ္တံ ‘‘ယေန ပညတ္တေနာ’’တိ. ဝိနယေ အပညတ္တံ သန္ဓာယ ဝုတ္တံ ‘‘အပညတ္တေနာ’’တိ အာဟ ‘‘သုတ္တေ ဝါ အဘိဓမ္မေ ဝါ အာဂတေနာ’’တိ.

၃၄၄. ပဝေဏိယာတိ ဥပါလိအာဒိကာယ အာစရိယပရမ္ပရသင်္ခါတာယ တန္တိယာ. ကုရုန္ဒိယံ ဝုတ္တန္တိ သမ္ဗန္ဓော. မဟာပစ္စရိယံ ဝုတ္တန္တိ သမ္ဗန္ဓော. တံ သဗ္ဗန္တိ ကုရုန္ဒိဝါဒမဟာပစ္စရိဝါဒသင်္ခါတံ သဗ္ဗံ တံ ဝစနံ. ပဝေဏိယာ အာဂတေတိ ပဝေဏိယာ အာဂတသင်္ခါတေ မဟာအဋ္ဌကထာဝါဒေတိ. စတုတ္ထံ.

၃၄၅. ပဉ္စမေ မနုဿဝိဂ္ဂဟေတိ မနုဿဝိဂ္ဂဟပါရာဇိကေတိ. ပဉ္စမံ.