၁၀. ဥယျောဓိကသိက္ခာပဒံ

၃၂၂. ဒသမေ ယုဇ္ဈန္တီတိ သံပဟရန္တိ. ‘‘ဗလဿ အဂ္ဂံ ဧတ္ထာ’’တိဣမိနာ ဘိန္နာဓိကရဏဗာဟိရတ္ထသမာသံ ဒဿေတိ. ‘‘ဇာနန္တီ’’တိပဒံ အတ္ထသမ္ပုဏ္ဏတ္ထာယ ပက္ခိတ္တံ. အဂ္ဂန္တိ ကောဋ္ဌာသံ. ဗလံ ဂဏီယတိ ဧတ္ထာတိ ဗလဂ္ဂန္တိ ဝစနတ္ထောပိ ယုဇ္ဇတိ. တေနာဟ ‘‘ဗလဂဏနဋ္ဌာန’’န္တိ. ဣဒဉှိ ဝစနံ အမ္ဗသေစနဂရုသိနနယေန ဝုတ္တံ. ကထံ? ‘‘ဗလဂဏနဋ္ဌာန’’န္တိ ဝဒန္တေန အဋ္ဌကထာစရိယေန ‘‘ဗလဿ အဂ္ဂံ ဇာနန္တိ ဧတ္ထာတိ ဗလဂ္ဂ’’န္တိ ဝစနတ္ထဿ ပိဏ္ဍတ္ထော စ ဉာပီယတိ၊ ‘‘ဗလံ ဂဏီယတိ ဧတ္ထာတိ ဗလဂ္ဂ’’န္တိ ဝစနတ္ထော စ ဒဿီယတိ. ဝိယူဟီယတေ သမ္ပိဏ္ဍီယတေ ဗျူဟော၊ သေနာယ ဗျူဟော သေနာဗျူဟောတိ အတ္ထံ ဒဿေတိ ‘‘သေနာယ ဝိယူဟ’’န္တိအာဒိနာ. အဏတိ ဘေရဝသဒ္ဒံ ကရောတီတိ အဏီကံ၊ မုဒ္ဓဇဏကာရော၊ ဟတ္ထီယေဝ အဏီကံ ဟတ္ထာဏီကံ. ဧသေဝ နယော သေသေသုပိ. ယော ဟတ္ထီ ပုဗ္ဗေ ဝုတ္တော၊ တေန ဟတ္ထိနာတိ ယောဇနာတိ. ဒသမံ.

အစေလကဝဂ္ဂေါ ပဉ္စမော.