၃. ပေသုညသိက္ခာပဒံ

၃၆. တတိယေ ‘‘ဇာတဘဏ္ဍနာန’’န္တိ ဝတ္တဗ္ဗေ အဂျာဟိတောတိအာဒီသု ဝိယ ဝိသေသနပရနိပါတဝသေန ‘‘ဘဏ္ဍနဇာတာန’’န္တိ ဝုတ္တန္တိ အာဟ ‘‘သဉ္ဇာတဘဏ္ဍနာန’’န္တိ. ‘‘ပုဗ္ဗဘာဂေါ’’တိ ဝတွာ တဿ သရူပံ ဒဿေတိ ‘‘ဣမိနာ စ ဣမိနာ စာ’’တိအာဒိနာ. ဝိရုဒ္ဓံ ဝဒတိ ဧတေနာတိ ဝိဝါဒေါ၊ ဝိဂ္ဂါဟိကကထာ၊ တံ အာပန္နာတိ ဝိဝါဒါပန္နာ၊ တေသံ. ပိသတိ သဉ္စုဏ္ဏေတီတိ ပိသုဏော၊ ပုဂ္ဂလော၊ တဿ ဣဒန္တိ ပေသုညံ၊ ဝစနန္တိ အတ္ထံ ဒဿေန္တော အာဟ ‘‘ပေသုညန္တိ ပိသုဏဝါစ’’န္တိ.

၃၇. ဘိက္ခုပေသုညေတိ ဘိက္ခူနံ သန္တိကံ ဥပသံဟဋေ ပေသုညဝစနေတိ ဆဋ္ဌီသမာသော.

၃၈. ‘‘ဒိသွာ’’တိ ပဒံ ‘‘ဘဏန္တဿာ’’တိ ပဒေ ပုဗ္ဗကာလကိရိယာ၊ ဒဿနံ ဟုတွာတိ အတ္ထော. တတိယံ.