၁၆. သမာရောပနဟာရဝဏ္ဏနာ

‘‘သဗ္ဗဓမ္မမူလပရိယာယ’’န္တိအာဒီသု မူလပရိယာယဂ္ဂဟဏေန အဿုတဝါဂဟဏေန သဉ္ဇာနနမညနာပရိညာဂဟဏေဟိ စ သံကိလေသဓမ္မာ ဒဿိတာ၊ တေ စ သင်္ခေပတော တိဝိဓာ တဏှာသံကိလေသော ဒိဋ္ဌိသံကိလေသော ဒုစ္စရိတသံကိလေသောတိ. တတ္ထ တဏှာသံကိလေသော တဏှာသံကိလေသဿ၊ ဒိဋ္ဌိသံကိလေသဿ၊ ဒုစ္စရိတသံကိလေသဿ စ ပဒဋ္ဌာနံ၊ တထာ ဒိဋ္ဌိသံကိလေသော ဒိဋ္ဌိသံကိလေသဿ၊ တဏှာသံကိလေသဿ၊ ဒုစ္စရိတသံကိလေသဿ စ ပဒဋ္ဌာနံ၊ ဒုစ္စရိတသံကိလေသောပိ ဒုစ္စရိတသံကိလေသဿ၊ တဏှာသံကိလေသဿ၊ ဒိဋ္ဌိသံကိလေသဿ စ ပဒဋ္ဌာနံ. တေသု တဏှာသံကိလေသော အတ္ထတော လောဘောဝ၊ ယော ‘‘လောဘော လုဗ္ဘနာ လုဗ္ဘိတတ္တံ သာရာဂေါ သာရဇ္ဇနာ သာရဇ္ဇိတတ္တ’’န္တိအာဒိနာ (ဓ. သ. ၃၈၉) အနေကေဟိ ပရိယာယေဟိ ဝိဘတ္တော. တထာ ဒိဋ္ဌိယေဝ ဒိဋ္ဌိသံကိလေသော၊ ယော ‘‘ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကံ ဒိဋ္ဌိဝိပ္ဖန္ဒိတ’’န္တိအာဒိနာ (ဓ. သ. ၁၁၀၅) အနေကေဟိ ပရိယာယေဟိ၊ ‘‘သန္တိ၊ ဘိက္ခဝေ၊ ဧကေ သမဏဗြာဟ္မဏာ’’တိအာဒိနာ (ဒီ. နိ. ၁.၃၀) ဒွါသဋ္ဌိယာ ပဘေဒေဟိ စ ဝိဘတ္တော. ဒုစ္စရိတသံကိလေသော ပန အတ္ထတော ဒုဿီလျစေတနာ စေဝ စေတနာသမ္ပယုတ္တဓမ္မာ စ၊ ယာ ‘‘ကာယဒုစ္စရိတံ ဝစီဒုစ္စရိတံ ကာယဝိသမံ ဝစီဝိသမ’’န္တိ (ဝိဘ. ၉၁၃၊ ၉၂၄)၊ ‘‘ပါဏာတိပါတော အဒိန္နာဒါန’’န္တိ (ဝိဘ. ၉၁၃) စ အာဒိနာ အနေကေဟိ ပရိယာယေဟိ၊ အနေကေဟိ ပဘေဒေဟိ စ ဝိဘတ္တာ.

တေသု တဏှာသံကိလေသဿ သမထော ပဋိပက္ခော၊ ဒိဋ္ဌိသံကိလေသဿ ဝိပဿနာ၊ ဒုစ္စရိတသံကိလေသဿ သီလံ ပဋိပက္ခော. တေ ပန သီလာဒယော ဓမ္မာ ဣဓ ပရိညာဂဟဏေန သေက္ခဂ္ဂဟဏေန ‘‘အရဟ’’န္တိအာဒိနာ အရိယတာဒိဂ္ဂဟဏေန စ ဂဟိတာ. တတ္ထ သီလေန ဒုစ္စရိတသံကိလေသပ္ပဟာနံ သိဇ္ဈတိ၊ တထာ တဒင်္ဂပ္ပဟာနံ ဝီတိက္ကမပ္ပဟာနဉ္စ၊ သမထေန တဏှာသံကိလေသပ္ပဟာနံ သိဇ္ဈတိ၊ တထာ ဝိက္ခမ္ဘနပ္ပဟာနံ ပရိယုဋ္ဌာနပ္ပဟာနဉ္စ. ဝိပဿနာယ ဒိဋ္ဌိသံကိလေသပ္ပဟာနံ သိဇ္ဈတိ၊ တထာ သမုစ္ဆေဒပ္ပဟာနံ အနုသယပ္ပဟာနဉ္စ. တတ္ထ ပုဗ္ဗဘာဂေ သီလေ ပတိဋ္ဌိတဿ သမထော၊ သမထေ ပတိဋ္ဌိတဿ ဝိပဿနာ၊ မဂ္ဂက္ခဏေ ပန သမကာလမေဝ ဘဝန္တိ. ပုဗ္ဗေယေဝ ဟိ သုပရိသုဒ္ဓကာယဝစီကမ္မဿ သုပရိသုဒ္ဓါဇီဝဿ စ သမထဝိပဿနာ အာရဒ္ဓါ ဂဗ္ဘံ ဂဏှန္တိယော ပရိပါကံ ဂစ္ဆန္တိယော ဝုဋ္ဌာနဂါမိနိဝိပဿနံ ပရိဗြူဟေန္တိ၊ ဝုဋ္ဌာနဂါမိနိဝိပဿနာ ဘာဝနာပါရိပူရိံ ဂစ္ဆန္တီ မဂ္ဂေန ဃဋေန္တိ မဂ္ဂက္ခဏေ သမထဝိပဿနာ ပရိပူရေတိ. အထ မဂ္ဂက္ခဏေ သမထဝိပဿနာဘာဝနာပါရိပူရိယာ အနဝသေသသံကိလေသဓမ္မံ သမုစ္ဆိန္ဒန္တိယော နိရောဓံ နိဗ္ဗာနံ သစ္ဆိကရောန္တီတိ. အယံ သမာရောပနော ဟာရော.

သောဠသဟာရဝဏ္ဏနာ နိဋ္ဌိတာ.