၁၀. ဆန္ဒံအဒတွာဂမနသိက္ခာပဒဝဏ္ဏနာ

အာရောစိတံ ဝတ္ထု အဝိနိစ္ဆိတန္တိ အာရောစိတဝတ္ထု အာပတ္တိကဘာဝေန န ဝိနိစ္ဆိတံ. ဧတ္ထ စ စောဒကေန စ စုဒိတကေန စ အတ္တနော ကထာ ကထိတာ၊ အနုဝိဇ္ဇကော သမ္မတော၊ ဧတ္တာဝတာ ဝတ္ထုမေဝ အာရောစိတံ ဟောတီတိ ဒဋ္ဌဗ္ဗံ. ဆန္ဒံ အဒတွာ ဥဋ္ဌာယာသနာ ပက္ကမေယျာတိ ‘‘ကထံ ဣဒံ ကမ္မံ ကုပ္ပံ အဿ၊ ဝဂ္ဂံ အဿ၊ န ကရေယျာ’’တိ (ပါစိ. ၄၈၁) ဣမိနာ အဓိပ္ပါယေန ဆန္ဒံ အဒတွာ နိသိန္နာသနတော ဥဋ္ဌာယ ဂစ္ဆေယျ. တေနာဟ ‘‘ယော ဘိက္ခူ’’တိအာဒိ. ကိရိယာကိရိယန္တိ ဧတ္ထ ဂမနံ ကိရိယံ၊ ဆန္ဒဿ အဒါနံ အကိရိယံ.

ဆန္ဒံအဒတွာဂမနသိက္ခာပဒဝဏ္ဏနာ နိဋ္ဌိတာ.