၄. ကာဏမာတာသိက္ခာပဒဝဏ္ဏနာ
ပဟေဏကတ္ထာယာတိ ပဏ္ဏာကာရတ္ထာယ. ပါထေယျတ္ထာယာတိ မဂ္ဂံ ဂစ္ဆန္တာနံ အန္တရာမဂ္ဂတ္ထာယ. သတ္တူတိ ဗဒ္ဓသတ္တု၊ အဗဒ္ဓသတ္တု စ. ဒွတ္တိပတ္တပူရေ ပဋိဂ္ဂဟေတွာတိ မုခဝဋ္ဋိယာ ဟေဋ္ဌိမလေခါယ သမံ ပူရေ ဒွတ္တိပတ္တပူရေ ဂဟေတွာတိ အတ္ထော. ဣမဿ စတ္ထဿ ဟေဋ္ဌာ ဝုတ္တနယေနေဝ ပါကဋတ္တာ တတ္ထ ကတ္တဗ္ဗပ္ပကာရမေဝ ဒဿေတုံ ‘‘ဧတ္ထာ’’တိအာဒိမာဟ. သေသန္တိ တတော ဧကပတ္တတော အညံ ပတ္တံ. သစေ တယော ပတ္တပူရာ ဂဟိတာ ဒွေ၊ သစေ ဒွေ ဂဟိတာ၊ ဧကန္တိ ဝုတ္တံ ဟောတိ.
ဂမနေ ဝါ ပဋိပ္ပဿဒ္ဓေတိ အန္တရာမဂ္ဂေ ဥပဒ္ဒဝံ ဒိသွာ၊ အနတ္ထိကတာယ ဝါ ‘‘မယံ ဣဒါနိ န ပေသိဿာမ န ဂမိဿာမာ’’တိ ဧဝံ ဂမနေ ဥပစ္ဆိန္နေ ဒေန္တာနန္တိ အတ္ထော.
ကာဏမာတာသိက္ခာပဒဝဏ္ဏနာ နိဋ္ဌိတာ.