သတ္တကဝဏ္ဏနာ

၃၃၀. သမ္ပတ္တိပဋိလာဘဋ္ဌေနာတိ သီလသမ္ပတ္တိအာဒီနံ သမ္မာသမ္ဗောဓိပရိယောသာနာနံ သမ္ပတ္တီနံ ပဋိလာဘာပနဋ္ဌေန၊ သမ္ပတ္တီနံ ဝါ ပဋိလာဘော သမ္ပတ္တိပဋိလာဘော၊ တဿ ကာရဏံ သမ္ပတ္တိပဋိလာဘဋ္ဌော၊ တေန သမ္ပတ္တိပဋိလာဘဋ္ဌေန. တေနေဝါဟ ‘‘သမ္ပတ္တီနံ ပဋိလာဘကာရဏတော’’တိ. သဒ္ဓါဝ ဥဘယဟိတတ္ထိကေဟိ ဓနာယိတဗ္ဗဋ္ဌေန ဓနံ သဒ္ဓါဓနံ. ဧတ္ထာတိ ဧတေသု ဓနေသု. သဗ္ဗသေဋ္ဌံ သဗ္ဗေသံ ပဋိလာဘကာရဏဘာဝတော၊ တေသဉ္စ သံကိလေသဝိသောဓနေန မဟာဇုတိကမဟာဝိပ္ဖါရဘာဝါပါဒနတော. တေနာဟ ‘‘ပညာယ ဟီ’’တိအာဒိ. တတ္ထ ပညာယ ဌတွာတိ ကမ္မဿကတာပညာယ ပတိဋ္ဌာယ သုစရိတာဒီနိ ပူရေတွာ သဂ္ဂူပဂါ ဟောန္တိ. တတ္ထ စေဝ ပါရမိတာ ပညာယ စ ဌတွာ သာဝကပါရမိဉာဏာဒီနိ ပဋိဝိဇ္ဈန္တိ.

သမာဓိံ ပရိက္ခရောန္တိ အဘိသင်္ခရောန္တီတိ သမာဓိပရိက္ခာရာ၊ သမာဓိဿ သမ္ဘာရဘူတာ သမ္မာဒိဋ္ဌိအာဒယော. ဣဓ ပန သဟကာရီကာရဏဘူတာ အဓိပ္ပေတာတိ အာဟ ‘‘သမာဓိပရိဝါရာ’’တိ.

အသတံ အသာဓူနံ ဓမ္မာ တေသံ အသာဓုဘာဝသာဓနတော. အသန္တာတိ အသုန္ဒရာ ဂါရယှာ. တေနာဟ ‘‘လာမကာ’’တိ. ‘‘ဝိပဿကဿေဝ ကထိတာ’’တိ ဝတွာ တဿ ဝိပဿနာနိဗ္ဗတ္တိံ ဒဿေတုံ ‘‘တေသုပီ’’တိအာဒိ ဝုတ္တံ. စတုန္နမ္ပိ ဟိ သစ္စာနံ ဝိသေသေန ဒဿနတော မဂ္ဂပညာ သာတိသယံ ‘‘ဝိပဿနာ’’တိ ဝတ္တဗ္ဗာ၊ တံသမင်္ဂီ စ အရိယော ဝိပဿနကောတိ.

သပ္ပုရိသာနံ ဓမ္မာတိ သပ္ပုရိသာနံယေဝ ဓမ္မာ၊ န အသပ္ပုရိသာနံ. ဓမ္မာနုဓမ္မပဋိပတ္တိယာ ဧဝ ဟိ ဓမ္မညုအာဒိဘာဝေါ၊ န ပါဠိဓမ္မပဌနာဒိမတ္တေန. ဘာသိတဿာတိ သုတ္တဂေယျာဒိဘာသိတဿ စေဝ တဒညဿ စ အတ္တတ္ထပရတ္ထဗောဓကဿ ပဒဿ. အတ္ထကုသလတာဝသေန အတ္ထံ ဇာနာတီတိ အတ္ထညူ. အတ္တာနံ ဇာနာတီတိ ယာထာဝတော အတ္တနော ပမာဏဇာနနဝသေန အတ္တာနံ ဇာနာတိ. ပဋိဂ္ဂဟဏပရိဘောဂမတ္တညုတာဟိ ဧဝ ပရိယေသနဝိဿဇ္ဇနမတ္တညုတာပိ ဗောဓိတာ ဟောန္တီတိ ‘‘ပဋိဂ္ဂဟဏပရိဘောဂေသု’’ ဣစ္စေဝ ဝုတ္တံ. ဧဝဉှိ တာ အနဝဇ္ဇာ ဟောန္တီတိ. ယောဂဿ အဓိဂမာယာတိ ဘာဝနာယ အနုယုဉ္ဇနဿ. အတိသမ္ဗာဓန္တိ အတိခုဒ္ဒကံ အတိက္ခပညဿ တာဝတာ ကာလေန တီရေတုံ အသက္ကုဏေယျတ္တာ. အဋ္ဌဝိဓံ ပရိသန္တိ ခတ္တိယပရိသာဒိကံ အဋ္ဌဝိဓံ ပရိသံ. ဘိက္ခုပရိသာဒိကံ စတုဗ္ဗိဓံ ခတ္တိယပရိသာဒိကံ မနုဿပရိသံယေဝ ပုန စတုဗ္ဗိဓံ ဂဟေတွာ အဋ္ဌဝိဓံ ဝဒန္တိ အပရေ. ‘‘ဣမံ မေ သေဝန္တဿ အကုသလာ ဓမ္မာ ပရိဟာယန္တိ၊ ကုသလာ ဓမ္မာ အဘိဝဍ္ဎန္တိ၊ တသ္မာ သေဝိတဗ္ဗော၊ ဝိပရိယာယတော တဒညော အသေဝိတဗ္ဗော’’တိ ဧဝံ သေဝိတဗ္ဗာသေဝိတဗ္ဗံ ပုဂ္ဂလံ ဇာနာတီတိ ပုဂ္ဂလညူ. ဧဝံ တေသံ ပုဂ္ဂလာနမ္ပိ ဗောဓနံ ဥက္ကဋ္ဌံ၊ နိဟီနံ ဝါ ဇာနာတိ နာမ.

၃၃၁. ‘‘နိဒ္ဒသဝတ္ထူနီ’’တိ. ‘‘အာဒိ-သဒ္ဒလောပေနာယံ နိဒ္ဒေသော’’တိ အာဟ ‘‘နိဒ္ဒသာဒိဝတ္ထူနီ’’တိ. နတ္ထိ ဒါနိ ဣမဿ ဒသာတိ နိဒ္ဒသော. ပဉှောတိ ဉာတုံ ဣစ္ဆိတော အတ္ထော. ပုန ဒသဝဿော န ဟောတီတိ တေသံ မတိမတ္တန္တိ ဒဿေတုံ ‘‘သော ကိရာ’’တိ ကိရသဒ္ဒဂ္ဂဟဏံ. ‘‘နိဒ္ဒသော’’တိ စေတံ ဒေသနာမတ္တံ၊ တဿ နိဗ္ဗီသာဒိဘာဝဿ ဝိယ နိန္နဝါဒိဘာဝဿ စ ဣစ္ဆိတတ္တာတိ ဒဿေတုံ ‘‘န ကေဝလဉ္စာ’’တိအာဒိ ဝုတ္တံ. ဂါမေ ဝိစရန္တောတိ ဂါမေ ပိဏ္ဍာယ ဝိစရန္တော.

န ဣဒံ တိတ္ထိယာနံ အဓိဝစနံ တေသု တန္နိမိတ္တဿ အဘာဝါ. သာသနေပိ သေက္ခဿာပိ န ဣဒံ အဓိဝစနံ၊ ကိမင်္ဂံ ပန ပုထုဇ္ဇနဿ. ယဿ ပနေတံ အဓိဝစနံ၊ ယေန စ ကာရဏေန၊ တံ ဒဿေတုံ ‘‘ခီဏာသဝဿေတ’’န္တိအာဒိ ဝုတ္တံ. အပ္ပဋိသန္ဓိကဘာဝေါ ဟိဿ ပစ္စက္ခတော ကာရဏံ. ပရမ္ပရာယ ဣတရာနိ၊ ယာနိ ပါဠိယံ အာဂတာနိ.

သိက္ခာယ သမ္မဒေဝ အာဒါနံ သိက္ခာသမာဒါနံ၊ တံ ပနဿာ ပါရိပူရိယာ ဝေဒိတဗ္ဗန္တိ အာဟ ‘‘သိက္ခတ္တယပူရဏေ’’တိ. သိက္ခာယ ဝါ သမ္မဒေဝ အာဒိတော ပဋ္ဌာယ ရက္ခဏံ သိက္ခာသမာဒါနံ၊ တဉ္စ အတ္ထတော ပူရဏေ ပရိစ္ဆိန္နံ အရက္ခဏေ သဗ္ဗေန သဗ္ဗံ အဘာဝတော၊ ရက္ခဏေ စ ပရိပူရဏတော. ဗဟလစ္ဆန္ဒောတိ ဒဠှစ္ဆန္ဒော. အာယတိန္တိ အနန္တရာနာဂတဒိဝသာဒိကာလော အဓိပ္ပေတော၊ န အနာဂတဘဝေါတိ အာဟ ‘‘အနာဂတေ ပုနဒိဝသာဒီသုပီ’’တိ. သိက္ခံ ပရိပူရေန္တဿ တတ္ထ နိဝိဋ္ဌအတ္ထိတာ အဝိဂတပေမတာ၊ တေဘူမကဓမ္မာနံ အနိစ္စာဒိဝသေန သမ္မဒေဝ နိဇ္ဈာနံ ဓမ္မနိသာမနာတိ အာဟ ‘‘ဝိပဿနာယေတံ အဓိဝစန’’န္တိ. တဏှာဝိနယနေတိ ဝိရာဂါနုပဿနာဒိဝိပဿနာဉာဏာနုဘာဝသိဒ္ဓေ တဏှာဝိက္ခမ္ဘနေ. ဧကီဘာဝေတိ ဂဏသင်္ဂဏိကာကိလေသသင်္ဂဏိကာဝိဂမသိဒ္ဓေ ဝိဝေကဘာဝေ. ဝီရိယာရမ္ဘေတိ သမ္မပ္ပဓာနဝီရိယဿ ပဂ္ဂဏှနေ၊ တံ ပန သဗ္ဗသော ဝီရိယဿ ပရိဗြူဟနံ ဟောတီတိ အာဟ ‘‘ကာယိကစေတသိကဿ ဝီရိယဿ ပူရဏေ’’တိ. သတိယဉ္စေဝ နေပက္ကဘာဝေ စာတိ သတောကာရိတာယ စေဝ သမ္ပဇာနကာရိတာယ စ. သတိသမ္ပဇညဗလေနေဝ ဝီရိယာရမ္ဘော ဣဇ္ဈတိ. ဒိဋ္ဌိပဋိဝေဓေတိ သမ္မာဒိဋ္ဌိယာ ပဋိဝိဇ္ဈနေ. တေနာဟ ‘‘မဂ္ဂဒဿနေ’’တိ. သစ္စသမ္ပဋိဝေဓေ ဟိ ဣဇ္ဈမာနေ မဂ္ဂသမ္မာဒိဋ္ဌိ သိဒ္ဓါ ဧဝ ဟောတိ.

အသုဘာနုပဿနာဉာဏေတိ ဒသဝိဓဿ၊ ဧကာဒသဝိဓဿာပိ ဝါ အသုဘဿ အနုပဿနာဝသေန ပဝတ္တဉာဏေ. ဣဒဉှိ ဒုက္ခာနုပဿနာယ ပရိစယဉာဏံ. အာဒီနဝါနုပဿနာဉာဏေတိ သင်္ခါရာနံ အနိစ္စဒုက္ခဝိပရိဏာမတာသံသူစိတဿ အာဒီနဝဿ အနုပဿနာဝသေန ပဝတ္တဉာဏေ. အပ္ပဟီနဋ္ဌေနာတိ မဂ္ဂေန အသမုစ္ဆိန္နဘာဝေန. အနုသေန္တီတိ သန္တာနေ အနု အနု သယန္တိ. ကာရဏလာဘေ ဟိ သတိ ဥပ္ပန္နာရဟာ ကိလေသာ သန္တာနေ အနု အနု သယိတာ ဝိယ ဟောန္တိ၊ တသ္မာ တေ တဒဝတ္ထာ ‘‘အနုသယာ’’တိ ဝုစ္စန္တိ. ထာမဂတောတိ ထာမပ္ပတ္တော. ထာမဂမနဉ္စ အညေဟိ အသာဓာရဏော ကာမရာဂါဒီနမေဝ အာဝေဏိကော သဘာဝေါ ဒဋ္ဌဗ္ဗော. တထာ ဟိ ဝုတ္တံ အဘိဓမ္မေ ‘‘ထာမဂတာနုသယံ ပဇဟတီ’’တိ. ကာမရာဂေါ ဧဝ အနုသယော ကာမရာဂါနုသယော. ယေ ပန ‘‘ကာမရာဂဿ အနုသယော ကာမရာဂါနုသယော’’တိ ဝဒန္တိ၊ တံ တေသံ မတိမတ္တံ. န ဟိ ကာမရာဂဝိနိမုတ္တော ကာမရာဂါနုသယော နာမ ကောစိ အတ္ထိ. ယဒိ ‘‘တဿ ဗီဇ’’န္တိ ဝဒေယျုံ၊ တမ္ပိ တဗ္ဗိနိမုတ္တံ ပရမတ္ထတော န ဥပလဗ္ဘတေဝါတိ. ဧသေဝ နယော သေသေသုပိ.