၇. ပဌမရုက္ခသုတ္တံ

၅၃၇. ‘‘သေယျထာပိ ဘိက္ခဝေ၊ ယေ ကေစိ ဇမ္ဗုဒီပကာ ရုက္ခာ၊ ဇမ္ဗူ တေသံ အဂ္ဂမက္ခာယတိ၊ ဧဝမေဝ ခေါ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. ဝီရိယိန္ဒြိယံ။ပေ။ သတိန္ဒြိယံ။ပေ။ သမာဓိန္ဒြိယံ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ၊ ဘိက္ခဝေ၊ ယေ ကေစိ ဇမ္ဗုဒီပကာ ရုက္ခာ၊ ဇမ္ဗူ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. သတ္တမံ.