၄. အာသဝက္ခယသုတ္တံ

၅၃၄. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ အာသဝါနံ ခယာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ အာသဝါနံ ခယာယ သံဝတ္တန္တီ’’တိ.

‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ သံဝတ္တန္တိ၊ အနုသယသမုဂ္ဃါတာယ သံဝတ္တန္တိ၊ အဒ္ဓါနပရိညာယ သံဝတ္တန္တိ၊ အာသဝါနံ ခယာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ သံဝတ္တန္တိ၊ အနုသယသမုဂ္ဃါတာယ သံဝတ္တန္တိ၊ အဒ္ဓါနပရိညာယ သံဝတ္တန္တိ၊ အာသဝါနံ ခယာယ သံဝတ္တန္တီ’’တိ. စတုတ္ထံ.