၅. ပဌမမဟာပထဝီသုတ္တံ

၁၁၂၅. ‘‘သေယျထာပိ၊ ဘိက္ခဝေ၊ ပုရိသော မဟာပထဝိယာ သတ္တ ကောလဋ္ဌိမတ္တိယော ဂုဠိကာ ဥပနိက္ခိပေယျ. တံ ကိံ မညထ၊ ဘိက္ခဝေ၊ ကတမံ နု ခေါ ဗဟုတရံ – ယာ ဝါ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ၊ အယံ ဝါ မဟာပထဝီ’’တိ? ‘‘ဧတဒေဝ၊ ဘန္တေ၊ ဗဟုတရံ၊ ယဒိဒံ – မဟာပထဝီ၊ အပ္ပမတ္တိကာ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ. သင်္ခမ္ပိ န ဥပေန္တိ၊ ဥပနိဓမ္ပိ န ဥပေန္တိ၊ ကလဘာဂမ္ပိ န ဥပေန္တိ မဟာပထဝိံ ဥပနိဓာယ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ’’တိ. ‘‘ဧဝမေဝ ခေါ၊ ဘိက္ခဝေ၊ အရိယသာဝကဿ။ပေ။ ယောဂေါ ကရဏီယော’’တိ. ပဉ္စမံ.