၆. ဒုတိယမဟာပထဝီသုတ္တံ

၁၁၂၆. ‘‘သေယျထာပိ၊ ဘိက္ခဝေ၊ မဟာပထဝီ ပရိက္ခယံ ပရိယာဒါနံ ဂစ္ဆေယျ ဌပေတွာ သတ္တ ကောလဋ္ဌိမတ္တိယော ဂုဠိကာ. တံ ကိံ မညထ၊ ဘိက္ခဝေ၊ ကတမံ နု ခေါ ဗဟုတရံ – ယံ ဝါ မဟာပထဝိယာ ပရိက္ခီဏံ ပရိယာဒိန္နံ၊ ယာ ဝါ သတ္တ ကောလဋ္ဌိမတ္တိယော ဂုဠိကာ အဝသိဋ္ဌာ’’တိ? ‘‘ဧတဒေဝ၊ ဘန္တေ၊ ဗဟုတရံ မဟာပထဝိယာ ယဒိဒံ ပရိက္ခီဏံ ပရိယာဒိန္နံ၊ အပ္ပမတ္တိကာ သတ္တ ကောလဋ္ဌိမတ္တိယော ဂုဠိကာ အဝသိဋ္ဌာ. သင်္ခမ္ပိ န ဥပေန္တိ၊ ဥပနိဓမ္ပိ န ဥပေန္တိ၊ ကလဘာဂမ္ပိ န ဥပေန္တိ မဟာပထဝိယာ ပရိက္ခီဏံ ပရိယာဒိန္နံ ဥပနိဓာယ သတ္တ ကောလဋ္ဌိမတ္တိယော ဂုဠိကာ အဝသိဋ္ဌာ’’တိ. ‘‘ဧဝမေဝ ခေါ၊ ဘိက္ခဝေ၊ အရိယသာဝကဿ။ပေ။ ယောဂေါ ကရဏီယော’’တိ. ဆဋ္ဌံ.