၈. ဘဒ္ဒိယသုတ္တံ

၁၀၄၄. ကပိလဝတ္ထုနိဒါနံ. ဧကမန္တံ နိသိန္နံ ခေါ ဘဒ္ဒိယံ သက္ကံ ဘဂဝါ ဧတဒဝေါစ – ‘‘စတူဟိ ခေါ၊ ဘဒ္ဒိယ၊ ဓမ္မေဟိ သမန္နာဂတော အရိယသာဝကော သောတာပန္နော ဟောတိ အဝိနိပါတဓမ္မော နိယတော သမ္ဗောဓိပရာယဏော.

‘‘ကတမေဟိ စတူဟိ? ဣဓ၊ ဘဒ္ဒိယ၊ အရိယသာဝကော ဗုဒ္ဓေ။ပေ။ ဓမ္မေ။ပေ။ သံဃေ။ပေ။ အရိယကန္တေဟိ သီလေဟိ သမန္နာဂတော ဟောတိ အခဏ္ဍေဟိ။ပေ။ သမာဓိသံဝတ္တနိကေဟိ. ဣမေဟိ ခေါ၊ ဘဒ္ဒိယ၊ စတူဟိ ဓမ္မေဟိ သမန္နာဂတော အရိယသာဝကော သောတာပန္နော ဟောတိ အဝိနိပါတဓမ္မော နိယတော သမ္ဗောဓိပရာယဏော’’တိ. အဋ္ဌမံ.