၇. မဟာနာမသုတ္တံ

၁၀၃၃. ဧကံ သမယံ ဘဂဝါ သက္ကေသု ဝိဟရတိ ကပိလဝတ္ထုသ္မိံ နိဂြောဓာရာမေ. အထ ခေါ မဟာနာမော သက္ကော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ မဟာနာမော သက္ကော ဘဂဝန္တံ ဧတဒဝေါစ –

‘‘ကိတ္တာဝတာ နု ခေါ၊ ဘန္တေ၊ ဥပါသကော ဟောတီ’’တိ? ‘‘ယတော ခေါ၊ မဟာနာမ၊ ဗုဒ္ဓံ သရဏံ ဂတော ဟောတိ၊ ဓမ္မံ သရဏံ ဂတော ဟောတိ၊ သံဃံ သရဏံ ဂတော ဟောတိ – ဧတ္တာဝတာ ခေါ၊ မဟာနာမ၊ ဥပါသကော ဟောတီ’’တိ.

‘‘ကိတ္တာဝတာ ပန၊ ဘန္တေ၊ ဥပါသကော သီလသမ္ပန္နော ဟောတီ’’တိ? ‘‘ယတော ခေါ၊ မဟာနာမ၊ ဥပါသကော ပါဏာတိပါတာ ပဋိဝိရတော ဟောတိ၊ အဒိန္နာဒါနာ ပဋိဝိရတော ဟောတိ၊ ကာမေသုမိစ္ဆာစာရာ ပဋိဝိရတော ဟောတိ၊ မုသာဝါဒါ ပဋိဝိရတော ဟောတိ၊ သုရာမေရယမဇ္ဇပ္ပမာဒဋ္ဌာနာ ပဋိဝိရတော ဟောတိ၊ – ဧတ္တာဝတာ ခေါ၊ မဟာနာမ၊ ဥပါသကော သီလသမ္ပန္နော ဟောတီ’’တိ.

‘‘ကိတ္တာဝတာ ပန၊ ဘန္တေ၊ ဥပါသကော သဒ္ဓါသမ္ပန္နော ဟောတီ’’တိ? ‘‘ဣဓ၊ မဟာနာမ၊ ဥပါသကော သဒ္ဓေါ ဟောတိ၊ သဒ္ဒဟတိ တထာဂတဿ ဗောဓိံ – ဣတိပိ သော ဘဂဝါ။ပေ။ သတ္ထာ ဒေဝမနုဿာနံ ဗုဒ္ဓေါ ဘဂဝါတိ. ဧတ္တာဝတာ ခေါ၊ မဟာနာမ၊ ဥပါသကော သဒ္ဓါသမ္ပန္နော ဟောတီ’’တိ.

‘‘ကိတ္တာဝတာ ပန၊ ဘန္တေ၊ ဥပါသကော စာဂသမ္ပန္နော ဟောတီ’’တိ? ‘‘ဣဓ၊ မဟာနာမ၊ ဥပါသကော ဝိဂတမလမစ္ဆေရေန စေတသာ အဂါရံ အဇ္ဈာဝသတိ မုတ္တစာဂေါ ပယတပါဏိ ဝေါဿဂ္ဂရတော ယာစယောဂေါ ဒါနသံဝိဘာဂရတော – ဧတ္တာဝတာ ခေါ၊ မဟာနာမ၊ ဥပါသကော စာဂသမ္ပန္နော ဟောတီ’’တိ.

‘‘ကိတ္တာဝတာ ပန၊ ဘန္တေ၊ ဥပါသကော ပညာသမ္ပန္နော ဟောတီ’’တိ? ‘‘ဣဓ၊ မဟာနာမ၊ ဥပါသကော ပညဝါ ဟောတိ ဥဒယတ္ထဂါမိနိယာ ပညာယ သမန္နာဂတော အရိယာယ နိဗ္ဗေဓိကာယ သမ္မာ ဒုက္ခက္ခယဂါမိနိယာ – ဧတ္တာဝတာ ခေါ၊ မဟာနာမ၊ ဥပါသကော ပညာသမ္ပန္နော ဟောတီ’’တိ. သတ္တမံ.