၅. ဒုတိယဒါရုက္ခန္ဓောပမသုတ္တံ

၂၄၂. ဧကံ သမယံ ဘဂဝါ ကိမိလာယံ [ကိမ္ဗိလာယံ (သီ. ပီ.)၊ ကိမ္မိလာယံ (သျာ. ကံ.)] ဝိဟရတိ ဂင်္ဂါယ နဒိယာ တီရေ. အဒ္ဒသာ ခေါ ဘဂဝါ မဟန္တံ ဒါရုက္ခန္ဓံ ဂင်္ဂါယ နဒိယာ သောတေန ဝုယှမာနံ. ဒိသွာန ဘိက္ခူ အာမန္တေသိ – ‘‘ပဿထ နော တုမှေ၊ ဘိက္ခဝေ၊ အမုံ မဟန္တံ ဒါရုက္ခန္ဓံ ဂင်္ဂါယ နဒိယာ သောတေန ဝုယှမာန’’န္တိ? ‘‘ဧဝံ ဘန္တေ’’။ပေ။ ဧဝံ ဝုတ္တေ၊ အာယသ္မာ ကိမိလော ဘဂဝန္တံ ဧတဒဝေါစ – ကိံ နု ခေါ၊ ဘန္တေ၊ ဩရိမံ တီရံ။ပေ။ ကတမော စ၊ ကိမိလ၊ အန္တောပူတိဘာဝေါ. ဣဓ၊ ကိမိလ၊ ဘိက္ခု အညတရံ သံကိလိဋ္ဌံ အာပတ္တိံ အာပန္နော ဟောတိ ယထာရူပါယ အာပတ္တိယာ န ဝုဋ္ဌာနံ ပညာယတိ. အယံ ဝုစ္စတိ၊ ကိမိလ၊ အန္တောပူတိဘာဝေါတိ. ပဉ္စမံ.