၉. ဓာတုသုတ္တံ

၃၂၀. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ပထဝီဓာတုယာ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ။ပေ။ ဇရာမရဏဿ ပါတုဘာဝေါ၊ ယော အာပေါဓာတုယာ။ ယော တေဇောဓာတုယာ။ ယော ဝါယောဓာတုယာ။ ယော အာကာသဓာတုယာ။ ယော ဝိညာဏဓာတုယာ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ပထဝီဓာတုယာ နိရောဓော။ပေ။ ဇရာမရဏဿ အတ္ထင်္ဂမော၊ ယော အာပေါဓာတုယာ နိရောဓော။ ယော တေဇောဓာတုယာ နိရောဓော။ ယော ဝါယောဓာတုယာ နိရောဓော။ ယော အာကာသဓာတုယာ နိရောဓော။ ယော ဝိညာဏဓာတုယာ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. နဝမံ.