၅. ဥပ္ပါဒသံယုတ္တံ

၁. စက္ခုသုတ္တံ

၃၁၂. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ စက္ခုဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော သောတဿ ဥပ္ပါဒေါ ဌိတိ။ပေ။ ယော ဃာနဿ ဥပ္ပါဒေါ ဌိတိ။ ယော ဇိဝှါယ ဥပ္ပါဒေါ ဌိတိ။ ယော ကာယဿ ဥပ္ပါဒေါ ဌိတိ။ ယော မနဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ၊ ဘိက္ခဝေ၊ စက္ခုဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော. ယော သောတဿ နိရောဓော။ပေ။ ယော ဃာနဿ နိရောဓော။ ယော ဇိဝှါယ နိရောဓော။ ယော ကာယဿ နိရောဓော။ ယော မနဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ပဌမံ.

၂. ရူပသုတ္တံ

၃၁၃. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ရူပါနံ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော သဒ္ဒါနံ။ ယော ဂန္ဓာနံ။ ယော ရသာနံ။ ယော ဖောဋ္ဌဗ္ဗာနံ။ ယော ဓမ္မာနံ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ရူပါနံ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော. ယော သဒ္ဒါနံ။ ယော ဂန္ဓာနံ။ ယော ရသာနံ။ ယော ဖောဋ္ဌဗ္ဗာနံ။ ယော ဓမ္မာနံ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ဒုတိယံ.

၃. ဝိညာဏသုတ္တံ

၃၁၄. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ စက္ခုဝိညာဏဿ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။ ယော မနောဝိညာဏဿ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ စက္ခုဝိညာဏဿ နိရောဓော။ပေ။ ဇရာမရဏဿ အတ္ထင်္ဂမော။ပေ။ ယော မနောဝိညာဏဿ နိရောဓော။ပေ။ ဇရာမရဏဿ အတ္ထင်္ဂမော’’တိ. တတိယံ.

၄. သမ္ဖဿသုတ္တံ

၃၁၅. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ စက္ခုသမ္ဖဿဿ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။ ယော မနောသမ္ဖဿဿ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ စက္ခုသမ္ဖဿဿ နိရောဓော။ပေ။ ဇရာမရဏဿ အတ္ထင်္ဂမော။ပေ။ ယော မနောသမ္ဖဿဿ နိရောဓော။ပေ။ ဇရာမရဏဿ အတ္ထင်္ဂမော’’တိ. စတုတ္ထံ.

၅. သမ္ဖဿဇသုတ္တံ

၃၁၆. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ စက္ခုသမ္ဖဿဇာယ ဝေဒနာယ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။.

ယော မနောသမ္ဖဿဇာယ ဝေဒနာယ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ စက္ခုသမ္ဖဿဇာယ ဝေဒနာယ နိရောဓော ဝူပသမော။ပေ။ ဇရာမရဏဿ အတ္ထင်္ဂမော။ပေ။ ယော မနောသမ္ဖဿဇာယ ဝေဒနာယ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ပဉ္စမံ.

၆. သညာသုတ္တံ

၃၁၇. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ရူပသညာယ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။ ယော ဓမ္မသညာယ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ရူပသညာယ နိရောဓော။ပေ။ ဇရာမရဏဿ အတ္ထင်္ဂမော။ပေ။ ယော ဓမ္မသညာယ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ဆဋ္ဌံ.

၇. သဉ္စေတနာသုတ္တံ

၃၁၈. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ရူပသဉ္စေတနာယ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။ ယော ဓမ္မသဉ္စေတနာယ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ရူပသဉ္စေတနာယ နိရောဓော။ပေ။ ဇရာမရဏဿ အတ္ထင်္ဂမော။ပေ။ ယော ဓမ္မသဉ္စေတနာယ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. သတ္တမံ.

၈. တဏှာသုတ္တံ

၃၁၉. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ရူပတဏှာယ ဥပ္ပါဒေါ ဌိတိ။ပေ။ ဇရာမရဏဿ ပါတုဘာဝေါ။ပေ။ ယော ဓမ္မတဏှာယ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ရူပတဏှာယ နိရောဓော။ပေ။ ဇရာမရဏဿ အတ္ထင်္ဂမော။ပေ။ ယော ဓမ္မတဏှာယ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. အဋ္ဌမံ.

၉. ဓာတုသုတ္တံ

၃၂၀. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ပထဝီဓာတုယာ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ။ပေ။ ဇရာမရဏဿ ပါတုဘာဝေါ၊ ယော အာပေါဓာတုယာ။ ယော တေဇောဓာတုယာ။ ယော ဝါယောဓာတုယာ။ ယော အာကာသဓာတုယာ။ ယော ဝိညာဏဓာတုယာ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ပထဝီဓာတုယာ နိရောဓော။ပေ။ ဇရာမရဏဿ အတ္ထင်္ဂမော၊ ယော အာပေါဓာတုယာ နိရောဓော။ ယော တေဇောဓာတုယာ နိရောဓော။ ယော ဝါယောဓာတုယာ နိရောဓော။ ယော အာကာသဓာတုယာ နိရောဓော။ ယော ဝိညာဏဓာတုယာ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. နဝမံ.

၁၀. ခန္ဓသုတ္တံ

၃၂၁. သာဝတ္ထိနိဒါနံ. ‘‘ယော ခေါ၊ ဘိက္ခဝေ၊ ရူပဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော ဝေဒနာယ။ ယော သညာယ။ ယော သင်္ခါရာနံ။ ယော ဝိညာဏဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော စ ခေါ၊ ဘိက္ခဝေ၊ ရူပဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော. ယော ဝေဒနာယ။ ယော သညာယ။ ယော သင်္ခါရာနံ။ ယော ဝိညာဏဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ဒသမံ.

ဥပ္ပါဒသံယုတ္တံ သမတ္တံ.