၆. နဇီရတိသုတ္တံ

၇၆. ‘‘ကိံ ဇီရတိ ကိံ န ဇီရတိ၊ ကိံသု ဥပ္ပထောတိ ဝုစ္စတိ၊

ကိံသု ဓမ္မာနံ ပရိပန္ထော၊ ကိံသု ရတ္တိန္ဒိဝက္ခယော၊

ကိံ မလံ ဗြဟ္မစရိယဿ၊ ကိံ သိနာနမနောဒကံ.

‘‘ကတိ လောကသ္မိံ ဆိဒ္ဒါနိ၊ ယတ္ထ ဝိတ္တံ [စိတ္တံ (သီ. သျာ. ကံ. ပီ.)] န တိဋ္ဌတိ၊

ဘဂဝန္တံ ပုဋ္ဌုမာဂမ္မ၊ ကထံ ဇာနေမု တံ မယ’’န္တိ.

‘‘ရူပံ ဇီရတိ မစ္စာနံ၊ နာမဂေါတ္တံ န ဇီရတိ၊

ရာဂေါ ဥပ္ပထောတိ ဝုစ္စတိ.

‘‘လောဘော ဓမ္မာနံ ပရိပန္ထော၊ ဝယော ရတ္တိန္ဒိဝက္ခယော၊

ဣတ္ထီ မလံ ဗြဟ္မစရိယဿ၊ ဧတ္ထာယံ သဇ္ဇတေ ပဇာ၊

တပေါ စ ဗြဟ္မစရိယဉ္စ၊ တံ သိနာနမနောဒကံ.

‘‘ဆ လောကသ္မိံ ဆိဒ္ဒါနိ၊ ယတ္ထ ဝိတ္တံ န တိဋ္ဌတိ၊

အာလသျဉ္စ [အာလဿဉ္စ (သီ. ပီ.)] ပမာဒေါ စ၊ အနုဋ္ဌာနံ အသံယမော၊

နိဒ္ဒါ တန္ဒီ [တန္ဒိ (သီ.)] စ တေ ဆိဒ္ဒေ၊ သဗ္ဗသော တံ ဝိဝဇ္ဇယေ’’တိ.