၇. ဣဿရိယသုတ္တံ

၇၇. ‘‘ကိံသု ဣဿရိယံ လောကေ၊ ကိံသု ဘဏ္ဍာနမုတ္တမံ၊

ကိံသု သတ္ထမလံ လောကေ၊ ကိံသု လောကသ္မိမဗ္ဗုဒံ.

‘‘ကိံသု ဟရန္တံ ဝါရေန္တိ၊ ဟရန္တော ပန ကော ပိယော၊

ကိံသု ပုနပ္ပုနာယန္တံ၊ အဘိနန္ဒန္တိ ပဏ္ဍိတာ’’တိ.

‘‘ဝသော ဣဿရိယံ လောကေ၊ ဣတ္ထီ ဘဏ္ဍာနမုတ္တမံ၊

ကောဓော သတ္ထမလံ လောကေ၊ စောရာ လောကသ္မိမဗ္ဗုဒါ.

‘‘စောရံ ဟရန္တံ ဝါရေန္တိ၊ ဟရန္တော သမဏော ပိယော၊

သမဏံ ပုနပ္ပုနာယန္တံ၊ အဘိနန္ဒန္တိ ပဏ္ဍိတာ’’တိ.