၁၀. ပဇ္ဇောတသုတ္တံ

၈၀. ‘‘ကိံသု လောကသ္မိ ပဇ္ဇောတော၊ ကိံသု လောကသ္မိ ဇာဂရော၊

ကိံသု ကမ္မေ သဇီဝါနံ၊ ကိမဿ ဣရိယာပထော.

‘‘ကိံသု အလသံ အနလသဉ္စ [ကိံ အာလသျာနာလသျဉ္စ (က.)]၊ မာတာ ပုတ္တံဝ ပေါသတိ၊

ကိံ ဘူတာ ဥပဇီဝန္တိ၊ ယေ ပါဏာ ပထဝိဿိတာ’’တိ.

‘‘ပညာ လောကသ္မိ ပဇ္ဇောတော၊ သတိ လောကသ္မိ ဇာဂရော၊

ဂါဝေါ ကမ္မေ သဇီဝါနံ၊ သီတဿ ဣရိယာပထော.

‘‘ဝုဋ္ဌိ အလသံ အနလသဉ္စ၊ မာတာ ပုတ္တံဝ ပေါသတိ၊

ဝုဋ္ဌိံ ဘူတာ ဥပဇီဝန္တိ၊ ယေ ပါဏာ ပထဝိဿိတာ’’တိ.