၁၁. အရဏသုတ္တံ

၈၁. ‘‘ကေသူဓ အရဏာ လောကေ၊ ကေသံ ဝုသိတံ န နဿတိ၊

ကေဓ ဣစ္ဆံ ပရိဇာနန္တိ၊ ကေသံ ဘောဇိဿိယံ သဒါ.

‘‘ကိံသု မာတာ ပိတာ ဘာတာ၊ ဝန္ဒန္တိ နံ ပတိဋ္ဌိတံ၊

ကိံသု ဣဓ ဇာတိဟီနံ၊ အဘိဝါဒေန္တိ ခတ္တိယာ’’တိ.

‘‘သမဏီဓ အရဏာ လောကေ၊ သမဏာနံ ဝုသိတံ န နဿတိ၊

သမဏာ ဣစ္ဆံ ပရိဇာနန္တိ၊ သမဏာနံ ဘောဇိဿိယံ သဒါ.

‘‘သမဏံ မာတာ ပိတာ ဘာတာ၊ ဝန္ဒန္တိ နံ ပတိဋ္ဌိတံ၊

သမဏီဓ ဇာတိဟီနံ၊ အဘိဝါဒေန္တိ ခတ္တိယာ’’တိ.

ဆေတွာဝဂ္ဂေါ အဋ္ဌမော.

တဿုဒ္ဒါနံ –

ဆေတွာ ရထဉ္စ စိတ္တဉ္စ၊ ဝုဋ္ဌိ ဘီတာ နဇီရတိ၊

ဣဿရံ ကာမံ ပါထေယျံ၊ ပဇ္ဇောတော အရဏေန စာတိ.

ဒေဝတာသံယုတ္တံ သမတ္တံ.