၁၅. ပရိက္ခာရဟာရဝိဘင်္ဂေါ

၄၉. တတ္ထ ကတမော ပရိက္ခာရော ဟာရော? ‘‘ယေ ဓမ္မာ ယံ ဓမ္မံ ဇနယန္တီ’’တိ.

ယော ဓမ္မော ယံ ဓမ္မံ ဇနယတိ၊ တဿ သော ပရိက္ခာရော. ကိံလက္ခဏော ပရိက္ခာရော? ဇနကလက္ခဏော ပရိက္ခာရော. ဒွေ ဓမ္မာ ဇနယန္တိ ဟေတု စ ပစ္စယော စ. တတ္ထ ကိံလက္ခဏော ဟေတု၊ ကိံလက္ခဏော ပစ္စယော? အသာဓာရဏလက္ခဏော ဟေတု၊ သာဓာရဏလက္ခဏော ပစ္စယော. ယထာ ကိံ ဘဝေ? ယထာ အင်္ကုရဿ နိဗ္ဗတ္တိယာ ဗီဇံ အသာဓာရဏံ၊ ပထဝီ အာပေါ စ သာဓာရဏာ. အင်္ကုရဿ ဟိ ပထဝီ အာပေါ စ ပစ္စယော သဘာဝေါ ဟေတု. ယထာ ဝါ ပန ဃဋေ ဒုဒ္ဓံ ပက္ခိတ္တံ ဒဓိ ဘဝတိ၊ န စတ္ထိ ဧကကာလသမဝဓာနံ ဒုဒ္ဓဿ စ ဒဓိဿ စ. ဧဝမေဝံ နတ္ထိ ဧကကာလသမဝဓာနံ ဟေတုဿ စ ပစ္စယဿ စ.

အယဉှိ သံသာရော သဟေတု သပ္ပစ္စယော နိဗ္ဗတ္တော. ဝုတ္တံ ဟိ အဝိဇ္ဇာပစ္စယာ သင်္ခါရာ၊ သင်္ခါရပစ္စယာ ဝိညာဏံ၊ ဧဝံ သဗ္ဗော ပဋိစ္စသမုပ္ပါဒေါ. ဣတိ အဝိဇ္ဇာ အဝိဇ္ဇာယ ဟေတု အယောနိသော မနသိကာရော ပစ္စယော. ပုရိမိကာ အဝိဇ္ဇာ ပစ္ဆိမိကာယ အဝိဇ္ဇာယ ဟေတု. တတ္ထ ပုရိမိကာ အဝိဇ္ဇာ အဝိဇ္ဇာနုသယော ပစ္ဆိမိကာ အဝိဇ္ဇာ အဝိဇ္ဇာပရိယုဋ္ဌာနံ၊ ပုရိမိကော အဝိဇ္ဇာနုသယော ပစ္ဆိမိကဿ အဝိဇ္ဇာပရိယုဋ္ဌာနဿ ဟေတုဘူတော ပရိဗြူဟနာယ၊ ဗီဇင်္ကုရော ဝိယ သမနန္တရဟေတုတာယ. ယံ ပန ယတ္ထ ဖလံ နိဗ္ဗတ္တတိ၊ ဣဒမဿ ပရမ္ပရဟေတုတာယ ဟေတုဘူတံ. ဒုဝိဓော ဟိ ဟေတု သမနန္တရဟေတု ပရမ္ပရဟေတု စ၊ ဧဝံ အဝိဇ္ဇာယပိ ဒုဝိဓော ဟေတု သမနန္တရဟေတု ပရမ္ပရဟေတု စ.

ယထာ ဝါ ပန ထာလကဉ္စ ဝဋ္ဋိ စ တေလဉ္စ ပဒီပဿ ပစ္စယဘူတံ န သဘာဝဟေတု၊ န ဟိ သက္ကာ ထာလကဉ္စ ဝဋ္ဋိဉ္စ တေလဉ္စ အနဂ္ဂိကံ ဒီပေတုံ ပဒီပဿ ပစ္စယဘူတံ. ပဒီပေါ ဝိယ သဘာဝေါ ဟေတု ဟောတိ. ဣတိ သဘာဝေါ ဟေတု၊ ပရဘာဝေါ ပစ္စယော. အဇ္ဈတ္တိကော ဟေတု၊ ဗာဟိရော ပစ္စယော. ဇနကော ဟေတု၊ ပရိဂ္ဂါဟကော ပစ္စယော. အသာဓာရဏော ဟေတု၊ သာဓာရဏော ပစ္စယော.

အဝုပစ္ဆေဒတ္ထော သန္တတိ အတ္ထော၊ နိဗ္ဗတ္တိ အတ္ထော ဖလတ္ထော၊ ပဋိသန္ဓိ အတ္ထော ပုနဗ္ဘဝတ္ထော၊ ပလိဗောဓတ္ထော ပရိယုဋ္ဌာနတ္ထော၊ အသမုဂ္ဃါတတ္ထော အနုသယတ္ထော၊ အသမ္ပဋိဝေဓတ္ထော အဝိဇ္ဇတ္ထော၊ အပရိညာတတ္ထော ဝိညာဏဿ ဗီဇတ္ထော. ယတ္ထ အဝုပစ္ဆေဒေါ တတ္ထ သန္တတိ၊ ယတ္ထ သန္တတိ တတ္ထ နိဗ္ဗတ္တိ၊ ယတ္ထ နိဗ္ဗတ္တိ တတ္ထ ဖလံ၊ ယတ္ထ ဖလံ တတ္ထ ပဋိသန္ဓိ၊ ယတ္ထ ပဋိသန္ဓိ တတ္ထ ပုနဗ္ဘဝေါ၊ ယတ္ထ ပုနဗ္ဘဝေါ တတ္ထ ပလိဗောဓော၊ ယတ္ထ ပလိဗောဓော တတ္ထ ပရိယုဋ္ဌာနံ၊ ယတ္ထ ပရိယုဋ္ဌာနံ တတ္ထ အသမုဂ္ဃါတော. ယတ္ထ အသမုဂ္ဃါတော တတ္ထ အနုသယော၊ ယတ္ထ အနုသယော တတ္ထ အသမ္ပဋိဝေဓော၊ ယတ္ထ အသမ္ပဋိဝေဓော တတ္ထ အဝိဇ္ဇာ၊ ယတ္ထ အဝိဇ္ဇာ တတ္ထ သာသဝံ ဝိညာဏံ အပရိညာတံ၊ ယတ္ထ သာသဝံ ဝိညာဏံ အပရိညာတံ တတ္ထ ဗီဇတ္ထော.

သီလက္ခန္ဓော သမာဓိက္ခန္ဓဿ ပစ္စယော၊ သမာဓိက္ခန္ဓော ပညာက္ခန္ဓဿ ပစ္စယော၊ ပညာက္ခန္ဓော ဝိမုတ္တိက္ခန္ဓဿ ပစ္စယော၊ ဝိမုတ္တိက္ခန္ဓော ဝိမုတ္တိဉာဏဒဿနက္ခန္ဓဿ ပစ္စယော. တိတ္ထညုတာ ပီတညုတာယ ပစ္စယော၊ ပီတညုတာ ပတ္တညုတာယ ပစ္စယော၊ ပတ္တညုတာ အတ္တညုတာယ ပစ္စယော.

ယထာ ဝါ ပန စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏံ. တတ္ထ စက္ခု အာဓိပတေယျပစ္စယတာယ ပစ္စယော၊ ရူပါ အာရမ္မဏပစ္စယတာယ ပစ္စယော. အာလောကော သန္နိဿယတာယ ပစ္စယော၊ မနသိကာရော သဘာဝေါ ဟေတု. သင်္ခါရာ ဝိညာဏဿ ပစ္စယော၊ သဘာဝေါ ဟေတု. ဝိညာဏံ နာမရူပဿ ပစ္စယော၊ သဘာဝေါ ဟေတု. နာမရူပံ သဠာယတနဿ ပစ္စယော၊ သဘာဝေါ ဟေတု. သဠာယတနံ ဖဿဿ ပစ္စယော၊ သဘာဝေါ ဟေတု. ဖဿော ဝေဒနာယ ပစ္စယော၊ သဘာဝေါ ဟေတု. ဝေဒနာ တဏှာယ ပစ္စယော၊ သဘာဝေါ ဟေတု. တဏှာ ဥပါဒါနဿ ပစ္စယော၊ သဘာဝေါ ဟေတု. ဥပါဒါနံ ဘဝဿ ပစ္စယော၊ သဘာဝေါ ဟေတု. ဘဝေါ ဇာတိယာ ပစ္စယော၊ သဘာဝေါ ဟေတု. ဇာတိ ဇရာမရဏဿ ပစ္စယော၊ သဘာဝေါ ဟေတု. ဇရာမရဏံ သောကဿ ပစ္စယော၊ သဘာဝေါ ဟေတု. သောကော ပရိဒေဝဿ ပစ္စယော၊ သဘာဝေါ ဟေတု. ပရိဒေဝေါ ဒုက္ခဿ ပစ္စယော၊ သဘာဝေါ ဟေတု. ဒုက္ခံ ဒေါမနဿဿ ပစ္စယော၊ သဘာဝေါ ဟေတု. ဒေါမနဿံ ဥပါယာသဿ ပစ္စယော၊ သဘာဝေါ ဟေတု. ဧဝံ ယော ကောစိ ဥပနိဿယော သဗ္ဗော သော ပရိက္ခာရော. တေနာဟ အာယသ္မာ မဟာကစ္စာယနော ‘‘ယေ ဓမ္မာ ယံ ဓမ္မံ ဇနယန္တီ’’တိ.

နိယုတ္တော ပရိက္ခာရော ဟာရော.