၄. မဂ္ဂုပ္ပါဒနပဉှော

၄. ‘‘ဘန္တေ နာဂသေန၊ ဘာသိတမ္ပေတံ ဘဂဝတာ ‘တထာဂတော ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ. ပုန စ ဘဏိတံ ‘အဒ္ဒသံ ခွာဟံ၊ ဘိက္ခဝေ၊ ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ. ယဒိ၊ ဘန္တေ နာဂသေန၊ တထာဂတော အနုပ္ပန္နဿ မဂ္ဂဿ ဥပ္ပါဒေတာ၊ တေန ဟိ ‘အဒ္ဒသံ ခွာဟံ၊ ဘိက္ခဝေ၊ ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ ယံ ဝစနံ၊ တံ မိစ္ဆာ. ယဒိ တထာဂတေန ဘဏိတံ ‘အဒ္ဒသံ ခွာဟံ၊ ဘိက္ခဝေ၊ ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ၊ တေန ဟိ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ဘာသိတမ္ပေတံ၊ မဟာရာဇ၊ ဘဂဝတာ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ. ဘဏိတဉ္စ ‘အဒ္ဒသံ ခွာဟံ၊ ဘိက္ခဝေ၊ ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ၊ တံ ဒွယမ္ပိ သဘာဝဝစနမေဝ၊ ပုဗ္ဗကာနံ၊ မဟာရာဇ၊ တထာဂတာနံ အန္တရဓာနေန အသတိ အနုသာသကေ မဂ္ဂေါ အန္တရဓာယိ၊ တံ [သော တံ (သီ. ပီ. က.)] တထာဂတော မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော [သမ္မသမာနော (သီ. ပီ.)] အဒ္ဒသ ပုဗ္ဗကေဟိ သမ္မာသမ္ဗုဒ္ဓေဟိ အနုယာတံ၊ တံကာရဏာ အာဟ ‘အဒ္ဒသံ ခွာဟံ၊ ဘိက္ခဝေ၊ ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ.

‘‘ပုဗ္ဗကာနံ၊ မဟာရာဇ၊ တထာဂတာနံ အန္တရဓာနေန အသတိ အနုသာသကေ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ မဂ္ဂံ ယံ ဒါနိ တထာဂတော သဉ္စရဏံ အကာသိ၊ တံကာရဏာ အာဟ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ.

‘‘ဣဓ၊ မဟာရာဇ၊ ရညော စက္ကဝတ္တိဿ အန္တရဓာနေန မဏိရတနံ ဂိရိသိခန္တရေ နိလီယတိ၊ အပရဿ စက္ကဝတ္တိဿ သမ္မာပဋိပတ္တိယာ ဥပဂစ္ဆတိ၊ အပိ နု ခေါ တံ၊ မဟာရာဇ၊ မဏိရတနံ တဿ ပကတ’’န္တိ? ‘‘န ဟိ၊ ဘန္တေ၊ ပါကတိကံ ယေဝ တံ မဏိရတနံ၊ တေန ပန နိဗ္ဗတ္တိတ’’န္တိ [နိဗ္ဗတ္တန္တိ (သီ. ပီ.)]. ‘‘ဧဝမေဝ ခေါ၊ မဟာရာဇ၊ ပါကတိကံ ပုဗ္ဗကေဟိ တထာဂတေဟိ အနုစိဏ္ဏံ အဋ္ဌင်္ဂိကံ သိဝံ မဂ္ဂံ အသတိ အနုသာသကေ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ဘဂဝါ ပညာစက္ခုနာ သမ္ပဿမာနော ဥပ္ပါဒေသိ၊ သဉ္စရဏံ အကာသိ၊ တံကာရဏာ အာဟ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ.

‘‘ယထာ ဝါ ပန၊ မဟာရာဇ၊ သန္တံ ယေဝ ပုတ္တံ ယောနိယာ ဇနယိတွာ မာတာ ‘ဇနိကာ’တိ ဝုစ္စတိ၊ ဧဝမေဝ ခေါ၊ မဟာရာဇ၊ တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော ဥပ္ပါဒေသိ၊ သဉ္စရဏံ အကာသိ၊ တံကာရဏာ အာဟ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ.

‘‘ယထာ ဝါ ပန၊ မဟာရာဇ၊ ကောစိ ပုရိသော ယံ ကိဉ္စိ နဋ္ဌံ ပဿတိ၊ ‘တေန တံ ဘဏ္ဍံ နိဗ္ဗတ္တိတ’န္တိ ဇနော ဝေါဟရတိ၊ ဧဝမေဝ ခေါ၊ မဟာရာဇ၊ တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော ဥပ္ပါဒေသိ၊ သဉ္စရဏံ အကာသိ၊ တံကာရဏာ အာဟ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ.

‘‘ယထာ ဝါ ပန၊ မဟာရာဇ၊ ကောစိ ပုရိသော ဝနံ သောဓေတွာ ဘူမိံ နီဟရတိ၊ ‘တဿ သာ ဘူမီ’တိ ဇနော ဝေါဟရတိ၊ န စေသာ ဘူမိ တေန ပဝတ္တိတာ၊ တံ ဘူမိံ ကာရဏံ ကတွာ ဘူမိသာမိကော နာမ ဟောတိ၊ ဧဝမေဝ ခေါ၊ မဟာရာဇ၊ တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာယ သမ္ပဿမာနော ဥပ္ပါဒေသိ၊ သဉ္စရဏံ အကာသိ၊ တံကာရဏာ အာဟ ‘တထာဂတော၊ ဘိက္ခဝေ၊ အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

မဂ္ဂုပ္ပါဒနပဉှော စတုတ္ထော.