၃. ဗုဒ္ဓအပ္ပါဗာဓပဉှော

၃. ‘‘ဘန္တေ နာဂသေန၊ ဘာသိတမ္ပေတံ ဘဂဝတာ ‘အဟမသ္မိ၊ ဘိက္ခဝေ၊ ဗြာဟ္မဏော ယာစယောဂေါ သဒါ ပယတပါဏိ အန္တိမဒေဟဓရော အနုတ္တရော ဘိသက္ကော သလ္လကတ္တော’တိ. ပုန စ ဘဏိတံ ဘဂဝတာ ‘ဧတဒဂ္ဂံ၊ ဘိက္ခဝေ၊ မမ သာဝကာနံ ဘိက္ခူနံ အပ္ပါဗာဓာနံ ယဒိဒံ ဗာကုလော’တိ. ဘဂဝတော စ သရီရေ ဗဟုက္ခတ္တုံ အာဗာဓော ဥပ္ပန္နော ဒိဿတိ. ယဒိ၊ ဘန္တေ နာဂသေန၊ တထာဂတော အနုတ္တရော၊ တေန ဟိ ‘ဧတဒဂ္ဂံ။ပေ။ ဗာကုလော’တိ ယံ ဝစနံ၊ တံ မိစ္ဆာ. ယဒိ ထေရော ဗာကုလော အပ္ပါဗာဓာနံ အဂ္ဂေါ၊ တေန ဟိ ‘အဟမသ္မိ။ပေ။ သလ္လကတ္တော’တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ဘာသိတမ္ပေတံ၊ မဟာရာဇ၊ ဘဂဝတာ ‘အဟမသ္မိ။ပေ။ သလ္လကတ္တော’တိ၊ ဘဏိတဉ္စ ‘ဧတဒဂ္ဂံ။ပေ။ ဗာကုလော’တိ၊ တဉ္စ ပန ဗာဟိရာနံ အာဂမာနံ အဓိဂမာနံ ပရိယတ္တီနံ အတ္တနိ ဝိဇ္ဇမာနတံ သန္ဓာယ ဘာသိတံ.

‘‘သန္တိ ခေါ ပန၊ မဟာရာဇ၊ ဘဂဝတော သာဝကာ ဌာနစင်္ကမိကာ၊ တေ ဌာနေန စင်္ကမေန ဒိဝါရတ္တိံ ဝီတိနာမေန္တိ၊ ဘဂဝါ ပန၊ မဟာရာဇ၊ ဌာနေန စင်္ကမေန နိသဇ္ဇာယ သယနေန ဒိဝါရတ္တိံ ဝီတိနာမေတိ၊ ယေ တေ၊ မဟာရာဇ၊ ဘိက္ခူ ဌာနစင်္ကမိကာ၊ တေ တေန အင်္ဂေန အတိရေကာ.

‘‘သန္တိ ခေါ ပန၊ မဟာရာဇ၊ ဘဂဝတော သာဝကာ ဧကာသနိကာ၊ တေ ဇီဝိတဟေတုပိ ဒုတိယံ ဘောဇနံ န ဘုဉ္ဇန္တိ၊ ဘဂဝါ ပန၊ မဟာရာဇ၊ ဒုတိယမ္ပိ ယာဝ တတိယမ္ပိ ဘောဇနံ ဘုဉ္ဇတိ၊ ယေ တေ၊ မဟာရာဇ၊ ဘိက္ခူ ဧကာသနိကာ၊ တေ တေန အင်္ဂေန အတိရေကာ၊ အနေကဝိဓာနိ၊ မဟာရာဇ၊ တာနိ ကာရဏာနိ တေသံ တေသံ တံ တံ သန္ဓာယ ဘဏိတာနိ. ဘဂဝါ ပန၊ မဟာရာဇ၊ အနုတ္တရော သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေန ဒသဟိ စ ဗလေဟိ စတူဟိ ဝေသာရဇ္ဇေဟိ အဋ္ဌာရသဟိ ဗုဒ္ဓဓမ္မေဟိ ဆဟိ အသာဓာရဏေဟိ ဉာဏေဟိ၊ ကေဝလေ စ ဗုဒ္ဓဝိသယေ တံ သန္ဓာယ ဘဏိတံ ‘အဟမသ္မိ။ပေ။ သလ္လကတ္တော’တိ.

‘‘ဣဓ၊ မဟာရာဇ၊ မနုဿေသု ဧကော ဇာတိမာ ဟောတိ၊ ဧကော ဓနဝါ၊ ဧကော ဝိဇ္ဇဝါ၊ ဧကော သိပ္ပဝါ၊ ဧကော သူရော၊ ဧကော ဝိစက္ခဏော၊ သဗ္ဗေပေတေ အဘိဘဝိယ ရာဇာ ယေဝ တေသံ ဥတ္တမော ဟောတိ၊ ဧဝမေဝ ခေါ၊ မဟာရာဇ၊ ဘဂဝါ သဗ္ဗသတ္တာနံ အဂ္ဂေါ ဇေဋ္ဌော သေဋ္ဌော.

‘‘ယံ ပန အာယသ္မာ ဗာကုလော အပ္ပါဗာဓော အဟောသိ၊ တံ အဘိနီဟာရဝသေန၊ သော ဟိ၊ မဟာရာဇ၊ အနောမဒဿိဿ ဘဂဝတော ဥဒရဝါတာဗာဓေ ဥပ္ပန္နေ ဝိပဿိဿ စ ဘဂဝတော အဋ္ဌသဋ္ဌိယာ စ ဘိက္ခုသတသဟဿာနံ တိဏပုပ္ဖကရောဂေ ဥပ္ပန္နေ သယံ တာပသော သမာနော နာနာဘေသဇ္ဇေဟိ တံ ဗျာဓိံ အပနေတွာ အပ္ပါဗာဓတံ ပတ္တော၊ ဘဏိတော စ ‘ဧတဒဂ္ဂံ။ပေ။ ဗာကုလော’တိ.

‘‘ဘဂဝတော၊ မဟာရာဇ၊ ဗျာဓိမှိ ဥပ္ပဇ္ဇန္တေပိ အနုပ္ပဇ္ဇန္တေပိ ဓုတင်္ဂံ အာဒိယန္တေပိ အနာဒိယန္တေပိ နတ္ထိ ဘဂဝတာ သဒိသော ကောစိ သတ္တော. ဘာသိတမ္ပေတံ မဟာရာဇ ဘဂဝတာ ဒေဝါတိဒေဝေန သံယုတ္တနိကာယဝရလဉ္ဆကေ –

‘‘‘ယာဝတာ၊ ဘိက္ခဝေ၊ သတ္တာ အပဒါ ဝါ ဒွိပဒါ ဝါ စတုပ္ပဒါ ဝါ ဗဟုပ္ပဒါ ဝါ ရူပိနော ဝါ အရူပိနော ဝါ သညိနော ဝါ အသညိနော ဝါ နေဝသညီနာသညိနော ဝါ၊ တထာဂတော တေသံ အဂ္ဂမက္ခာယတိ အရဟံ သမ္မာသမ္ဗုဒ္ဓေါ’တိ. ‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’’တိ.

ဗုဒ္ဓအပ္ပါဗာဓပဉှော တတိယော.