၁၀. ဓမ္မဒေသနာယ အပ္ပေါဿုက္ကပဉှော

၁၀. ‘‘ဘန္တေ နာဂသေန၊ တုမှေ ဘဏထ ‘တထာဂတေန စတူဟိ စ အသင်္ချေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယာ’တိ. ပုန စ ‘သဗ္ဗညုတံ ပတ္တဿ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယာ’တိ.

‘‘ယထာ နာမ၊ ဘန္တေ နာဂသေန၊ ဣဿာသော ဝါ ဣဿာသန္တေဝါသီ ဝါ ဗဟုကေ ဒိဝသေ သင်္ဂါမတ္ထာယ ဥပါသနံ သိက္ခိတွာ သမ္ပတ္တေ မဟာယုဒ္ဓေ ဩသက္ကေယျ၊ ဧဝမေဝ ခေါ၊ ဘန္တေ နာဂသေန၊ တထာဂတေန စတူဟိ စ အသင်္ချေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစေတွာ မဟတော ဇနကာယဿ သမုဒ္ဓရဏာယ သဗ္ဗညုတံ ပတ္တေန ဓမ္မဒေသနာယ ဩသက္ကိတံ.

‘‘ယထာ ဝါ ပန၊ ဘန္တေ နာဂသေန၊ မလ္လော ဝါ မလ္လန္တေဝါသီ ဝါ ဗဟုကေ ဒိဝသေ နိဗ္ဗုဒ္ဓံ သိက္ခိတွာ သမ္ပတ္တေ မလ္လယုဒ္ဓေ ဩသက္ကေယျ၊ ဧဝမေဝ ခေါ၊ ဘန္တေ နာဂသေန၊ တထာဂတေန စတူဟိ စ အသင်္ချေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစေတွာ မဟတော ဇနကာယဿ သမုဒ္ဓရဏာယ သဗ္ဗညုတံ ပတ္တေန ဓမ္မဒေသနာယ ဩသက္ကိတံ.

‘‘ကိံ နု ခေါ၊ ဘန္တေ နာဂသေန၊ တထာဂတေန ဘယာ ဩသက္ကိတံ၊ ဥဒါဟု အပါကဋတာယ ဩသက္ကိတံ၊ ဥဒါဟု ဒုဗ္ဗလတာယ ဩသက္ကိတံ၊ ဥဒါဟု အသဗ္ဗညုတာယ ဩသက္ကိတံ၊ ကိံ တတ္ထ ကာရဏံ၊ ဣင်္ဃ မေ တွံ ကာရဏံ ဗြူဟိ ကင်္ခါဝိတရဏာယ. ယဒိ၊ ဘန္တေ နာဂသေန၊ တထာဂတေန စတူဟိ စ အသင်္ချေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယ၊ တေန ဟိ ‘သဗ္ဗညုတံ ပတ္တဿ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယာ’တိ ယံ ဝစနံ၊ တံ မိစ္ဆာ. ယဒိ သဗ္ဗညုတံ ပတ္တဿ အပ္ပေါဿုက္ကတာယ စိတ္တံ နမိ နော ဓမ္မဒေသနာယ၊ တေန ဟိ ‘တထာဂတေန စတူဟိ စ အသင်္ချေယျေတိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယာ’တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော ဂမ္ဘီရော ဒုန္နိဗ္ဗေဌော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ပရိပါစိတဉ္စ၊ မဟာရာဇ၊ တထာဂတေန စတူဟိ စ အသင်္ချေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ မဟတော ဇနကာယဿ သမုဒ္ဓရဏာယ၊ ပတ္တသဗ္ဗညုတဿ စ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယ. တဉ္စ ပန ဓမ္မဿ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ သတ္တာနဉ္စ အာလယာရာမတံ သက္ကာယဒိဋ္ဌိယာ ဒဠှသုဂ္ဂဟိတတဉ္စ ဒိသွာ ‘ကိံ နု ခေါ၊ ကထံ နု ခေါ’တိ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယ၊ သတ္တာနံ ပဋိဝေဓစိန္တနမာနသံ ယေဝေတံ.

‘‘ယထာ၊ မဟာရာဇ၊ ဘိသက္ကော သလ္လကတ္တော အနေကဗျာဓိပရိပီဠိတံ နရံ ဥပသင်္ကမိတွာ ဧဝံ စိန္တယတိ ‘ကေန နု ခေါ ဥပက္ကမေန ကတမေန ဝါ ဘေသဇ္ဇေန ဣမဿ ဗျာဓိ ဝူပသမေယျာ’တိ၊ ဧဝမေဝ ခေါ၊ မဟာရာဇ၊ တထာဂတဿ သဗ္ဗကိလေသဗျာဓိပရိပီဠိတံ ဇနံ ဓမ္မဿ စ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ ဒိသွာ ‘ကိံ နု ခေါ၊ ကထံ နု ခေါ’တိ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယ၊ သတ္တာနံ ပဋိဝေဓစိန္တနမာနသံ ယေဝေတံ.

‘‘ယထာ၊ မဟာရာဇ၊ ရညော ခတ္တိယဿ မုဒ္ဓါဝသိတ္တဿ ဒေါဝါရိကအနီကဋ္ဌပါရိသဇ္ဇနေဂမဘဋဗလ [ဗလတ္ထ (သီ. ပီ.)] အမစ္စရာဇညရာဇူပဇီဝိနေ ဇနေ ဒိသွာ ဧဝံ စိတ္တမုပ္ပဇ္ဇေယျ ‘ကိံ နု ခေါ၊ ကထံ နု ခေါ ဣမေ သင်္ဂဏှိဿာမီ’တိ၊ ဧဝမေဝ ခေါ၊ မဟာရာဇ၊ တထာဂတဿ ဓမ္မဿ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ သတ္တာနဉ္စ အာလယာရာမတံ သက္ကာယဒိဋ္ဌိယာ ဒဠှသုဂ္ဂဟိတတဉ္စ ဒိသွာ ‘ကိံ နု ခေါ၊ ကထံ နု ခေါ’တိ အပ္ပေါဿုက္ကတာယ စိတ္တံ နမိ၊ နော ဓမ္မဒေသနာယ၊ သတ္တာနံ ပဋိဝေဓစိန္တနမာနသံ ယေဝေတံ.

‘‘အပိ စ၊ မဟာရာဇ၊ သဗ္ဗေသံ တထာဂတာနံ ဓမ္မတာ ဧသာ၊ ယံ ဗြဟ္မုနာ အာယာစိတာ ဓမ္မံ ဒေသေန္တိ. တတ္ထ ပန ကိံ ကာရဏံ? ယေ တေန သမယေန မနုဿာ တာပသပရိဗ္ဗာဇကာ သမဏဗြာဟ္မဏာ၊ သဗ္ဗေတေ ဗြဟ္မဒေဝတာ ဟောန္တိ ဗြဟ္မဂရုကာ ဗြဟ္မပရာယဏာ၊ တသ္မာ တဿ ဗလဝတော ယသဝတော ဉာတဿ ပညာတဿ ဥတ္တရဿ အစ္စုဂ္ဂတဿ ဩနမနေန သဒေဝကော လောကော ဩနမိဿတိ ဩကပ္ပေဿတိ အဓိမုစ္စိဿတီတိ ဣမိနာ စ၊ မဟာရာဇ၊ ကာရဏေန တထာဂတာ ဗြဟ္မုနာ အာယာစိတာ ဓမ္မံ ဒေသေန္တိ.

‘‘ယထာ၊ မဟာရာဇ၊ ကောစိ ရာဇာ ဝါ ရာဇမဟာမတ္တော ဝါ ယဿ ဩနမတိ အပစိတိံ ကရောတိ၊ ဗလဝတရဿ တဿ ဩနမနေန အဝသေသာ ဇနတာ ဩနမတိ အပစိတိံ ကရောတိ၊ ဧဝမေဝ ခေါ၊ မဟာရာဇ၊ ဗြဟ္မေ ဩနမိတေ တထာဂတာနံ သဒေဝကော လောကော ဩနမိဿတိ၊ ပူဇိတပူဇကော မဟာရာဇ၊ လောကော၊ တသ္မာ သော ဗြဟ္မာ သဗ္ဗေသံ တထာဂတာနံ အာယာစတိ ဓမ္မဒေသနာယ၊ တေန စ ကာရဏေန တထာဂတာ ဗြဟ္မုနာ အာယာစိတာ ဓမ္မံ ဒေသေန္တီ’’တိ. ‘‘သာဓု၊ ဘန္တေ နာဂသေန၊ သုနိဗ္ဗေဌိတော ပဉှော၊ အတိဘဒြကံ ဝေယျာကရဏံ၊ ဧဝမေတံ တထာ သမ္ပဋိစ္ဆာမီ’’တိ.

ဓမ္မဒေသနာယ အပ္ပေါဿုက္ကပဉှော ဒသမော.