၁၁. အာစရိယာနာစရိယပဉှော

၁၁. ‘‘ဘန္တေ၊ နာဂသေန၊ ဘာသိတမ္ပေတံ ဘဂဝတာ –

‘‘‘န မေ အာစရိယော အတ္ထိ၊ သဒိသော မေ န ဝိဇ္ဇတိ၊

သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ [မဟာဝ. ၁၁].

‘‘ပုန စ ဘဏိတံ ‘ဣတိ ခေါ၊ ဘိက္ခဝေ၊ အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသိ၊ ဥဠာရာယ စ မံ ပူဇာယ ပူဇေသီ’တိ. ယဒိ၊ ဘန္တေ နာဂသေန၊ တထာဂတေန ဘဏိတံ ‘န မေ အာစရိယော အတ္ထိ၊ သဒိသော မေ န ဝိဇ္ဇတိ. သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ၊ တေန ဟိ ‘ဣတိ ခေါ၊ ဘိက္ခဝေ၊ အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသီ’တိ ယံ ဝစနံ၊ တံ မိစ္ဆာ. ယဒိ တထာဂတေန ဘဏိတံ ‘ဣတိ ခေါ၊ ဘိက္ခဝေ၊ အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသီ’တိ၊ တေန ဟိ ‘န မေ အာစရိယော အတ္ထိ၊ သဒိသော မေ န ဝိဇ္ဇတိ. သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ဘာသိတမ္ပေတံ၊ မဟာရာဇ၊ တထာဂတေန ‘န မေ အာစရိယော အတ္ထိ၊ သဒိသော မေ န ဝိဇ္ဇတိ. သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ၊ ဘဏိတဉ္စ ‘ဣတိ ခေါ၊ ဘိက္ခဝေ၊ အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသိ၊ ဥဠာရာယ စ မံ ပူဇာယ ပူဇေသီ’တိ.

‘‘တဉ္စ ပန ဝစနံ ပုဗ္ဗေဝ သမ္ဗောဓာ အနဘိသမ္ဗုဒ္ဓဿ ဗောဓိသတ္တဿေဝ သတော အာစရိယဘာဝံ သန္ဓာယ ဘာသိတံ.

‘ပဉ္စိမေ၊ မဟာရာဇ၊ ပုဗ္ဗေဝ သမ္ဗောဓာ အနဘိသမ္ဗုဒ္ဓဿ ဗောဓိသတ္တဿ သတော အာစရိယာ၊ ယေဟိ အနုသိဋ္ဌော ဗောဓိသတ္တော တတ္ထ တတ္ထ ဒိဝသံ ဝီတိနာမေသိ. ကတမေ ပဉ္စ? ယေ တေ၊ မဟာရာဇ၊ အဋ္ဌ ဗြာဟ္မဏာ ဇာတမတ္တေ ဗောဓိသတ္တေ လက္ခဏာနိ ပရိဂ္ဂဏှိံသု၊ သေယျထီဒံ၊ ရာမော ဓဇော လက္ခဏော မန္တီ ယညော သုယာမော သုဘောဇော သုဒတ္တောတိ. တေ တဿ သောတ္ထိံ ပဝေဒယိတွာ ရက္ခာကမ္မံ အကံသု၊ တေ စ ပဌမံ အာစရိယာ.

‘‘ပုန စပရံ၊ မဟာရာဇ၊ ဗောဓိသတ္တဿ ပိတာ သုဒ္ဓေါဒနော ရာဇာ ယံ တေန သမယေန အဘိဇာတံ ဥဒိစ္စဇာတိမန္တံ ပဒကံ ဝေယျာကရဏံ ဆဠင်္ဂဝန္တံ သဗ္ဗမိတ္တံ နာမ ဗြာဟ္မဏံ ဥပနေတွာ သောဝဏ္ဏေန ဘိင်္ဂါရေန [ဘိင်္ကာရေန (သီ. ပီ.)] ဥဒကံ ဩဏောဇေတွာ ‘ဣမံ ကုမာရံ သိက္ခာပေဟီ’တိ အဒါသိ၊ အယံ ဒုတိယော အာစရိယော.

‘‘ပုန စပရံ၊ မဟာရာဇ၊ ယာ သာ ဒေဝတာ ဗောဓိသတ္တံ သံဝေဇေသီ၊ ယဿာ ဝစနံ သုတွာ ဗောဓိသတ္တော သံဝိဂ္ဂေါ ဥဗ္ဗိဂ္ဂေါ တသ္မိံ ယေဝ ခဏေ နေက္ခမ္မံ နိက္ခမိတွာ ပဗ္ဗဇိ၊ အယံ တတိယော အာစရိယော.

‘‘ပုန စပရံ၊ မဟာရာဇ၊ အာဠာရော ကာလာမော အာကိဉ္စညာယတနဿ ပရိကမ္မံ အာစိက္ခိ၊ အယံ စတုတ္ထော အာစရိယော.

‘‘ပုန စပရံ၊ မဟာရာဇ၊ ဥဒကော ရာမပုတ္တော နေဝသညာနာသညာယတနဿ ပရိကမ္မံ အာစိက္ခိ [အာစိက္ခတိ (က.)]၊ အယံ ပဉ္စမော အာစရိယော. ဣမေ ခေါ၊ မဟာရာဇ၊ ပုဗ္ဗေဝ သမ္ဗောဓာ အနဘိသမ္ဗုဒ္ဓဿ ဗောဓိသတ္တဿ သတော ပဉ္စ အာစရိယာ. တေ စ ပန အာစရိယာ လောကိယေ ဓမ္မေ. ဣမသ္မိဉ္စ ပန၊ မဟာရာဇ၊ လောကုတ္တရေ ဓမ္မေ သဗ္ဗညုတဉာဏပ္ပဋိဝေဓာယ နတ္ထိ တထာဂတဿ အနုတ္တရော အနုသာသကော၊ သယမ္ဘူ၊ မဟာရာဇ၊ တထာဂတော အနာစရိယကော၊ တသ္မာ ကာရဏာ တထာဂတေန ဘဏိတံ ‘န မေ အာစရိယော အတ္ထိ၊ သဒိသော မေ န ဝိဇ္ဇတိ. သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

အာစရိယာနာစရိယပဉှော ဧကာဒသမော.

သန္ထဝဝဂ္ဂေါ ပဉ္စမော.

ဣမသ္မိံ ဝဂ္ဂေ ဧကာဒသ ပဉှော.

မေဏ္ဍကပဉှော နိဋ္ဌိတော.