၄. ဘဂဝတော ဗြဟ္မစာရိပဉှော

၄. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ ဗြဟ္မစာရီ’’တိ? ‘‘အာမ၊ မဟာရာဇ၊ ဘဂဝါ ဗြဟ္မစာရီ’’တိ. ‘‘တေန ဟိ၊ ဘန္တေ နာဂသေန၊ ဗုဒ္ဓေါ ဗြဟ္မုနော သိဿော’’တိ? ‘‘အတ္ထိ ပန တေ၊ မဟာရာဇ၊ ဟတ္ထိပါမောက္ခော’’တိ? ‘‘အတ္ထိ၊ ဘန္တေ’’တိ. ‘‘ကိံနု ခေါ၊ မဟာရာဇ၊ သော ဟတ္ထီ ကဒါစိ ကရဟစိ ကောဉ္စနာဒံ နဒတီတိ? ‘‘အာမ၊ ဘန္တေ၊ နဒတီ’’တိ ‘‘တေန ဟိ၊ မဟာရာဇ၊ သော ဟတ္ထီ ကောဉ္စသကုဏဿ သိဿော’’တိ? ‘‘န ဟိ၊ ဘန္တေ’’တိ. ‘‘ကိံ ပန၊ မဟာရာဇ၊ ဗြဟ္မာ သဗုဒ္ဓိကော အဗုဒ္ဓိကော’’တိ? ‘‘သဗုဒ္ဓိကော၊ ဘန္တေ’’တိ. ‘‘တေန ဟိ၊ မဟာရာဇ၊ ဗြဟ္မာ ဘဂဝတော သိဿော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဘဂဝတော ဗြဟ္မစာရိပဉှော စတုတ္ထော.