၆. သတိဝဂ္ဂေါ

၁. ကာယပိယာယနပဉှော

၁. ရာဇာ အာဟ ‘‘ဘန္တေ နာဂသေန၊ ပိယော ပဗ္ဗဇိတာနံ ကာယော’’တိ? ‘‘န ခေါ၊ မဟာရာဇ၊ ပိယော ပဗ္ဗဇိတာနံ ကာယော’’တိ. ‘‘အထ ကိဿ နု ခေါ၊ ဘန္တေ၊ ကေလာယထ မမာယထာ’’တိ? ‘‘ကိံ ပန တေ၊ မဟာရာဇ၊ ကဒါစိ ကရဟစိ သင်္ဂါမဂတဿ ကဏ္ဍပ္ပဟာရော ဟောတီ’’တိ? ‘‘အာမ၊ ဘန္တေ၊ ဟောတီ’’တိ. ‘‘ကိံနု ခေါ၊ မဟာရာဇ၊ သော ဝဏော အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘အာမ၊ ဘန္တေ၊ အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ. ‘‘ကိံနု ခေါ၊ မဟာရာဇ၊ ပိယော တေ ဝဏော၊ တေန အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘န မေ၊ ဘန္တေ၊ ပိယော ဝဏော၊ အပိ စ မံသဿ ရုဟနတ္ထာယ အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ. ‘‘ဧဝမေဝ ခေါ၊ မဟာရာဇ၊ အပ္ပိယော ပဗ္ဗဇိတာနံ ကာယော၊ အထ စ ပဗ္ဗဇိတာ အနဇ္ဈောသိတာ ကာယံ ပရိဟရန္တိ ဗြဟ္မစရိယာနုဂ္ဂဟာယ. အပိ စ ခေါ၊ မဟာရာဇ၊ ဝဏူပမော ကာယော ဝုတ္တော ဘဂဝတာ၊ တေန ပဗ္ဗဇိတာ ဝဏမိဝ ကာယံ ပရိဟရန္တိ အနဇ္ဈောသိတာ. ဘာသိတမ္ပေတံ မဟာရာဇ ဘဂဝတာ –

‘‘‘အလ္လစမ္မပဋိစ္ဆန္နော၊ နဝဒွါရော မဟာဝဏော၊

သမန္တတော ပဂ္ဃရတိ၊ အသုစိပူတိဂန္ဓိယော’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ကာယပိယာယနပဉှော ပဌမော.

၂. သဗ္ဗညူဘာဝပဉှော

၂. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ သဗ္ဗညူ သဗ္ဗဒဿာဝီ’’တိ? ‘‘အာမ၊ မဟာရာဇ၊ ဘဂဝါ သဗ္ဗညူ သဗ္ဗဒဿာဝီ’’တိ. ‘‘အထ ကိဿ နု ခေါ၊ ဘန္တေ နာဂသေန၊ သာဝကာနံ အနုပုဗ္ဗေန သိက္ခာပဒံ ပညပေသီ’’တိ? ‘‘အတ္ထိ ပန တေ မဟာရာဇ၊ ကောစိ ဝေဇ္ဇော၊ ယော ဣမိဿံ ပထဝိယံ သဗ္ဗဘေသဇ္ဇာနိ ဇာနာတီ’’တိ? ‘‘အာမ၊ ဘန္တေ၊ အတ္ထီ’’တိ. ‘‘ကိံနု ခေါ၊ မဟာရာဇ၊ သော ဝေဇ္ဇော ဂိလာနကံ သမ္ပတ္တေ ကာလေ ဘေသဇ္ဇံ ပါယေတိ၊ ဥဒါဟု အသမ္ပတ္တေ ကာလေ’’တိ? ‘‘သမ္ပတ္တေ ကာလေ၊ ဘန္တေ၊ ဂိလာနကံ ဘေသဇ္ဇံ ပါယေတိ၊ နော အသမ္ပတ္တေ ကာလေ’’တိ? ‘‘ဧဝမေဝ ခေါ၊ မဟာရာဇ၊ ဘဂဝါ သဗ္ဗညူ သဗ္ဗဒဿာဝီ န အသမ္ပတ္တေ ကာလေ သာဝကာနံ သိက္ခာပဒံ ပညာပေတိ၊ သမ္ပတ္တေ ကာလေ သာဝကာနံ သိက္ခာပဒံ ပညာပေတိ ယာဝဇီဝံ အနတိက္ကမနီယ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

သဗ္ဗညူဘာဝပဉှော ဒုတိယော.

၃. မဟာပုရိသလက္ခဏပဉှော

၃. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော’’တိ? ‘‘အာမ၊ မဟာရာဇ၊ ဘဂဝါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော’’တိ.

‘‘ကိံ ပနဿ၊ ဘန္တေ၊ မာတာပိတရောပိ ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ? ‘‘နော စဿ၊ မဟာရာဇ၊ မာတာပိတရော ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ.

‘‘ဧဝံ သန္တေ ခေါ၊ ဘန္တေ နာဂသေန၊ န ဥပ္ပဇ္ဇတိ ဗုဒ္ဓေါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘောတိ၊ အပိ စ မာတုသဒိသော ဝါ ပုတ္တော ဟောတိ မာတုပက္ခော ဝါ၊ ပိတုသဒိသော ဝါ ပုတ္တော ဟောတိ ပိတုပက္ခော ဝါ’’တိ. ထေရော အာဟ ‘‘အတ္ထိ ပန၊ မဟာရာဇ၊ ကိဉ္စိ ပဒုမံ သတပတ္တ’’န္တိ? ‘‘အာမ၊ ဘန္တေ၊ အတ္ထီ’’တိ. ‘‘တဿ ပန ကုဟိံ သမ္ဘဝေါ’’တိ? ‘‘ကဒ္ဒမေ ဇာယတိ ဥဒကေ အာသီယတီ’’တိ. ‘‘ကိံနု ခေါ၊ မဟာရာဇ၊ ပဒုမံ ကဒ္ဒမေန သဒိသံ ဝဏ္ဏေန ဝါ ဂန္ဓေန ဝါ ရသေန ဝါ’’တိ? ‘‘န ဟိ၊ ဘန္တေ’’တိ. ‘‘အထ ဥဒကေန ဝါ ဂန္ဓေန ဝါ ရသေန ဝါ’’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ဘဂဝါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော၊ နော စဿ မာတာပိတရော ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

မဟာပုရိသလက္ခဏပဉှော တတိယော.

၄. ဘဂဝတော ဗြဟ္မစာရိပဉှော

၄. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ ဗြဟ္မစာရီ’’တိ? ‘‘အာမ၊ မဟာရာဇ၊ ဘဂဝါ ဗြဟ္မစာရီ’’တိ. ‘‘တေန ဟိ၊ ဘန္တေ နာဂသေန၊ ဗုဒ္ဓေါ ဗြဟ္မုနော သိဿော’’တိ? ‘‘အတ္ထိ ပန တေ၊ မဟာရာဇ၊ ဟတ္ထိပါမောက္ခော’’တိ? ‘‘အတ္ထိ၊ ဘန္တေ’’တိ. ‘‘ကိံနု ခေါ၊ မဟာရာဇ၊ သော ဟတ္ထီ ကဒါစိ ကရဟစိ ကောဉ္စနာဒံ နဒတီတိ? ‘‘အာမ၊ ဘန္တေ၊ နဒတီ’’တိ ‘‘တေန ဟိ၊ မဟာရာဇ၊ သော ဟတ္ထီ ကောဉ္စသကုဏဿ သိဿော’’တိ? ‘‘န ဟိ၊ ဘန္တေ’’တိ. ‘‘ကိံ ပန၊ မဟာရာဇ၊ ဗြဟ္မာ သဗုဒ္ဓိကော အဗုဒ္ဓိကော’’တိ? ‘‘သဗုဒ္ဓိကော၊ ဘန္တေ’’တိ. ‘‘တေန ဟိ၊ မဟာရာဇ၊ ဗြဟ္မာ ဘဂဝတော သိဿော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဘဂဝတော ဗြဟ္မစာရိပဉှော စတုတ္ထော.

၅. ဘဂဝတော ဥပသမ္ပဒါပဉှော

၅. ရာဇာ အာဟ ‘‘ဘန္တေ နာဂသေန၊ ဥပသမ္ပဒါ သုန္ဒရာ’’တိ? ‘‘အာမ၊ မဟာရာဇ၊ ဥပသမ္ပဒါ သုန္ဒရာ’’တိ. ‘‘အတ္ထိ ပန၊ ဘန္တေ၊ ဗုဒ္ဓဿ ဥပသမ္ပဒါ၊ ဥဒါဟု နတ္ထီ’’တိ? ‘‘ဥပသမ္ပန္နော ခေါ၊ မဟာရာဇ၊ ဘဂဝါ ဗောဓိရုက္ခမူလေ သဟ သဗ္ဗညုတဉာဏေန၊ နတ္ထိ ဘဂဝတော ဥပသမ္ပဒါ အညေဟိ ဒိန္နာ၊ ယထာ သာဝကာနံ၊ မဟာရာဇ၊ ဘဂဝါ သိက္ခာပဒံ ပညပေတိ ယာဝဇီဝံ အနတိက္ကမနီယ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

ဘဂဝတော ဥပသမ္ပဒါပဉှော ပဉ္စမော.

၆. အဿုဘေသဇ္ဇာဘေသဇ္ဇပဉှော

၆. ရာဇာ အာဟ ‘‘ဘန္တေ နာဂသေန၊ ယော စ မာတရိ မတာယ ရောဒတိ၊ ယော စ ဓမ္မပေမေန ရောဒတိ၊ ဥဘိန္နံ တေသံ ရောဒန္တာနံ ကဿ အဿု ဘေသဇ္ဇံ၊ ကဿ န ဘေသဇ္ဇ’’န္တိ? ‘‘ဧကဿ ခေါ၊ မဟာရာဇ၊ အဿု ရာဂဒေါသမောဟေဟိ သမလံ ဥဏှံ၊ ဧကဿ ပီတိသောမနဿေန ဝိမလံ သီတလံ. ယံ ခေါ၊ မဟာရာဇ၊ သီတလံ၊ တံ ဘေသဇ္ဇံ၊ ယံ ဥဏှံ၊ တံ န ဘေသဇ္ဇ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

အဿုဘေသဇ္ဇာဘေသဇ္ဇပဉှော ဆဋ္ဌော.

၇. သရာဂဝီတရာဂနာနာကရဏပဉှော

၇. ရာဇာ အာဟ ‘‘ဘန္တေ နာဂသေန၊ ကိံ နာနာကရဏံ သရာဂဿ စ ဝီတရာဂဿ စာ’’တိ? ‘‘ဧကော ခေါ၊ မဟာရာဇ၊ အဇ္ဈောသိတော၊ ဧကော အနဇ္ဈောသိတော’’တိ. ‘‘ကိံ ဧတံ၊ ဘန္တေ၊ အဇ္ဈောသိတော အနဇ္ဈောသိတော နာမာ’’တိ? ‘‘ဧကော ခေါ၊ မဟာရာဇ၊ အတ္ထိကော၊ ဧကော အနတ္ထိကော’’တိ. ‘‘ပဿာမဟံ၊ ဘန္တေ၊ ဧဝရူပံ ယော စ သရာဂေါ၊ ယော စ ဝီတရာဂေါ၊ သဗ္ဗောပေသော သောဘနံ ယေဝ ဣစ္ဆတိ ခါဒနီယံ ဝါ ဘောဇနီယံ ဝါ၊ န ကောစိ ပါပကံ ဣစ္ဆတီ’’တိ. ‘‘အဝီတရာဂေါ ခေါ၊ မဟာရာဇ၊ ရသပဋိသံဝေဒီ စ ရသရာဂပဋိသံဝေဒီ စ ဘောဇနံ ဘုဉ္ဇတိ၊ ဝီတရာဂေါ ပန ရသပဋိသံဝေဒီ ဘောဇနံ ဘုဉ္ဇတိ၊ နော စ ခေါ ရသရာဂပဋိသံဝေဒီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

သရာဂဝီတရာဂနာနာကရဏပဉှော သတ္တမော.

၈. ပညာပတိဋ္ဌာနပဉှော

၈. ရာဇာ အာဟ ‘‘ဘန္တေ နာဂသေန၊ ပညာ ကုဟိံ ပဋိဝသတီ’’တိ? ‘‘န ကတ္ထစိ မဟာရာဇာ’’တိ. ‘‘တေန ဟိ၊ ဘန္တေ နာဂသေန၊ နတ္ထိ ပညာ’’တိ. ‘‘ဝါတော၊ မဟာရာဇ၊ ကုဟိံ ပဋိဝသတီ’’တိ? ‘‘န ကတ္ထစိ ဘန္တေ’’တိ. ‘‘တေန ဟိ၊ မဟာရာဇ၊ နတ္ထိ ဝါတော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ပညာပတိဋ္ဌာနပဉှော အဋ္ဌမော.

၉. သံသာရပဉှော

၉. ရာဇာ အာဟ ‘‘ဘန္တေ နာဂသေန၊ ယံ ပနေတံ ဗြူသိ ‘သံသာရော’တိ၊ ကတမော သော သံသာရော’’တိ? ‘‘ဣဓ၊ မဟာရာဇ၊ ဇာတော ဣဓေဝ မရတိ၊ ဣဓ မတော အညတြ ဥပ္ပဇ္ဇတိ၊ တဟိံ ဇာတော တဟိံ ယေဝ မရတိ၊ တဟိံ မတော အညတြ ဥပ္ပဇ္ဇတိ၊ ဧဝံ ခေါ၊ မဟာရာဇ၊ သံသာရော ဟောတီ’’တိ. ‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ပက္ကံ အမ္ဗံ ခါဒိတွာ အဋ္ဌိံ ရောပေယျ၊ တတော မဟန္တော အမ္ဗရုက္ခော နိဗ္ဗတ္တိတွာ ဖလာနိ ဒဒေယျ၊ အထ သော ပုရိသော တတောပိ ပက္ကံ အမ္ဗံ ခါဒိတွာ အဋ္ဌိံ ရောပေယျ၊ တတောပိ မဟန္တော အမ္ဗရုက္ခော နိဗ္ဗတ္တိတွာ ဖလာနိ ဒဒေယျ၊ ဧဝမေတေသံ ရုက္ခာနံ ကောဋိ န ပညာယတိ၊ ဧဝမေဝ ခေါ၊ မဟာရာဇ၊ ဣဓ ဇာတော ဣဓေဝ မရတိ၊ ဣဓ မတော အညတြ ဥပ္ပဇ္ဇတိ၊ တဟိံ ဇာတော တဟိံ ယေဝ မရတိ၊ တဟိံ မတော အညတြ ဥပ္ပဇ္ဇတိ၊ ဧဝံ ခေါ၊ မဟာရာဇ၊ သံသာရော ဟောတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

သံသာရပဉှော နဝမော.

၁၀. စိရကတသရဏပဉှော

၁၀. ရာဇာ အာဟ ‘‘ဘန္တေ နာဂသေန၊ ကေန အတီတံ စိရကတံ သရတီ’’တိ? ‘‘သတိယာ၊ မဟာရာဇာ’’တိ. ‘‘နနု၊ ဘန္တေ နာဂသေန၊ စိတ္တေန သရတိ နော သတိယာ’’တိ? ‘‘အဘိဇာနာသိ နု၊ တွံ မဟာရာဇ၊ ကိဉ္စိဒေဝ ကရဏီယံ ကတွာ ပမုဋ္ဌ’’န္တိ? ‘‘အာမ ဘန္တေ’’တိ. ‘‘ကိံ နု ခေါ၊ တွံ မဟာရာဇ၊ တသ္မိံ သမယေ အစိတ္တကော အဟောသီ’’တိ? ‘‘န ဟိ၊ ဘန္တေ၊ သတိ တသ္မိံ သမယေ နာဟောသီ’’တိ. ‘‘အထ ကသ္မာ၊ တွံ မဟာရာဇ၊ ဧဝမာဟ ‘စိတ္တေန သရတိ၊ နော သတိယာ’’’တိ?

‘‘ကလ္လောသိ၊ ဘန္တေ နာဂသေနာ’’တိ.

စိရကတသရဏပဉှော ဒသမော.

၁၁. အဘိဇာနန္တသတိပဉှော

၁၁. ရာဇာ အာဟ ‘‘ဘန္တေ နာဂသေန၊ သဗ္ဗာ သတိ အဘိဇာနန္တီ ဥပ္ပဇ္ဇတိ၊ ဥဒါဟု ကဋုမိကာဝ သတီ’’တိ? ‘‘အဘိဇာနန္တီပိ၊ မဟာရာဇ၊ ကဋုမိကာပိ သတီ’’တိ. ‘‘ဧဝဉှိ ခေါ၊ ဘန္တေ နာဂသေန၊ သဗ္ဗာ သတိ အဘိဇာနန္တီ၊ နတ္ထိ ကဋုမိကာ သတီ’’တိ? ‘‘ယဒိ နတ္ထိ၊ မဟာရာဇ၊ ကဋုမိကာ သတိ၊ နတ္ထိ ကိဉ္စိ သိပ္ပိကာနံ ကမ္မာယတနေဟိ ဝါ သိပ္ပါယတနေဟိ ဝါ ဝိဇ္ဇာဋ္ဌာနေဟိ ဝါ ကရဏီယံ၊ နိရတ္ထကာ အာစရိယာ၊ ယသ္မာ စ ခေါ၊ မဟာရာဇ၊ အတ္ထိ ကဋုမိကာ သတိ၊ တသ္မာ အတ္ထိ ကမ္မာယတနေဟိ ဝါ သိပ္ပါယတနေဟိ ဝါ ဝိဇ္ဇာဋ္ဌာနေဟိ ဝါ ကရဏီယံ၊ အတ္ထော စ အာစရိယေဟီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

အဘိဇာနန္တသတိပဉှော ဧကာဒသမော.

သတိဝဂ္ဂေါ ဆဋ္ဌော.

ဣမသ္မိံ ဝဂ္ဂေ ဧကာဒသ ပဉှာ.