၁၀. ဗုဒ္ဓနိဒဿနပဉှော

၁၀. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ အတ္ထီ’’တိ? ‘‘အာမ၊ မဟာရာဇ၊ ဘဂဝါ အတ္ထီ’’တိ. ‘‘သက္ကာ ပန၊ ဘန္တေ နာဂသေန၊ ဗုဒ္ဓေါ နိဒဿေတုံ ဣဓဝါ ဣဓဝါ’’တိ? ‘‘ပရိနိဗ္ဗုတော၊ မဟာရာဇ၊ ဘဂဝါ အနုပါဒိသေသာယ နိဗ္ဗာနဓာတုယာ၊ န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ မဟတော အဂ္ဂိက္ခန္ဓဿ ဇလမာနဿ ယာ အစ္စိ အတ္ထင်္ဂတာ၊ သက္ကာ သာ အစ္စိ ဒဿေတုံ ‘ဣဓ ဝါ ဣဓ ဝါ’’’တိ? ‘‘န ဟိ၊ ဘန္တေ၊ နိရုဒ္ဓါ သာ အစ္စိ အပ္ပညတ္တိံ ဂတာ’’တိ. ‘‘ဧဝမေဝ ခေါ၊ မဟာရာဇ၊ ဘဂဝါ အနုပါဒိသေသာယ နိဗ္ဗာနဓာတုယာ ပရိနိဗ္ဗုတော အတ္ထင်္ဂတော၊ န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’ တိ၊ ဓမ္မကာယေန ပန ခေါ၊ မဟာရာဇ၊ သက္ကာ ဘဂဝါ နိဒဿေတုံ. ဓမ္မော ဟိ၊ မဟာရာဇ၊ ဘဂဝတာ ဒေသိတော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓနိဒဿနပဉှော ဒသမော.

ဗုဒ္ဓဝဂ္ဂေါ ပဉ္စမော.

ဣမသ္မိံ ဝဂ္ဂေ ဒသ ပဉှာ.