၅. ဗုဒ္ဓဝဂ္ဂေါ

၁. ဗုဒ္ဓဿ အတ္ထိနတ္ထိဘာဝပဉှော

၁. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ တယာ ဒိဋ္ဌော’’တိ? ‘‘န ဟိ၊ မဟာရာဇာ’’တိ. ‘‘အထ တေ အာစရိယေဟိ ဗုဒ္ဓေါ ဒိဋ္ဌော’’တိ? ‘‘န ဟိ၊ မဟာရာဇာ’’တိ. ‘‘တေန ဟိ၊ ဘန္တေ နာဂသေန၊ နတ္ထိ ဗုဒ္ဓေါ’’တိ. ‘‘ကိံ ပန၊ မဟာရာဇ၊ ဟိမဝတိ ဦဟာ နဒီ တယာ ဒိဋ္ဌာ’’တိ? ‘‘န ဟိ၊ ဘန္တေ’’တိ. ‘‘အထ တေ ပိတရာ ဦဟာ နဒီ ဒိဋ္ဌာ’’တိ? ‘‘န ဟိ၊ ဘန္တေ’’တိ. ‘‘တေန ဟိ၊ မဟာရာဇ၊ နတ္ထိ ဦဟာ နဒီ’’တိ. ‘‘အတ္ထိ၊ ဘန္တေ၊ ကိဉ္စာပိ မယာ ဦဟာ နဒီ န ဒိဋ္ဌာ၊ ပိတရာပိ မေ ဦဟာ နဒီ န ဒိဋ္ဌာ၊ အပိ စ အတ္ထိ ဦဟာ နဒီ’’တိ. ‘‘ဧဝမေဝ ခေါ၊ မဟာရာဇ၊ ကိဉ္စာပိ မယာ ဘဂဝါ န ဒိဋ္ဌော၊ အာစရိယေဟိပိ မေ ဘဂဝါ န ဒိဋ္ဌော၊ အပိ စ အတ္ထိ ဘဂဝါ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓဿ အတ္ထိနတ္ထိဘာဝပဉှော ပဌမော.

၂. ဗုဒ္ဓဿ အနုတ္တရဘာဝပဉှော

၂. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ အနုတ္တရော’’တိ? ‘‘အာမ၊ မဟာရာဇ၊ ဘဂဝါ အနုတ္တရော’’တိ. ‘‘ကထံ၊ ဘန္တေ နာဂသေန၊ အဒိဋ္ဌပုဗ္ဗံ ဇာနာသိ ‘ဗုဒ္ဓေါ အနုတ္တရော’’’တိ? ‘‘တံ ကိံ မညသိ၊ မဟာရာဇ၊ ယေဟိ အဒိဋ္ဌပုဗ္ဗော မဟာသမုဒ္ဒေါ၊ ဇာနေယျုံ တေ၊ မဟာရာဇ၊ မဟန္တော ခေါ မဟာသမုဒ္ဒေါ ဂမ္ဘီရော အပ္ပမေယျော ဒုပ္ပရိယောဂါဟော၊ ယတ္ထိမာ ပဉ္စ မဟာနဒိယော သတတံ သမိတံ အပ္ပေန္တိ၊ သေယျထိဒံ၊ ဂင်္ဂါ ယမုနာ အစိရဝတီ သရဘူ မဟီ၊ နေဝ တဿ ဦနတ္တံ ဝါ ပူရတ္တံ ဝါ ပညာယတီ’’တိ? ‘‘အာမ၊ ဘန္တေ၊ ဇာနေယျု’’န္တိ. ‘‘ဧဝမေဝ ခေါ၊ မဟာရာဇ၊ သာဝကေ မဟန္တေ ပရိနိဗ္ဗုတေ ပဿိတွာ ဇာနာမိ ‘ဘဂဝါ အနုတ္တရော’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓဿ အနုတ္တရဘာဝပဉှော ဒုတိယော.

၃. ဗုဒ္ဓဿ အနုတ္တရဘာဝဇာနနပဉှော

၃. ရာဇာ အာဟ ‘‘ဘန္တေ နာဂသေန၊ သက္ကာ ဇာနိတုံ ‘ဗုဒ္ဓေါ အနုတ္တရော’’’တိ? ‘‘အာမ၊ မဟာရာဇ၊ သက္ကာ ဇာနိတုံ ‘ဘဂဝါ အနုတ္တရော’’’တိ. ‘‘ကထံ၊ ဘန္တေ နာဂသေန၊ သက္ကာ ဇာနိတုံ ‘ဗုဒ္ဓေါ အနုတ္တရော’’’တိ. ‘‘ဘူတပုဗ္ဗံ၊ မဟာရာဇ၊ တိဿတ္ထေရော နာမ လေခါစရိယော အဟောသိ၊ ဗဟူနိ ဝဿာနိ အဗ္ဘတီတာနိ ကာလင်္ကတဿ ကထံ သော ဉာယတီ’’တိ. ‘‘လေခေန ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ယော ဓမ္မံ ပဿတိ၊ သော ဘဂဝန္တံ ပဿတိ၊ ဓမ္မော ဟိ၊ မဟာရာဇ၊ ဘဂဝတာ ဒေသိတော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓဿ အနုတ္တရဘာဝဇာနနပဉှော တတိယော.

၄. ဓမ္မဒိဋ္ဌပဉှော

၄. ရာဇာ အာဟ ‘‘ဘန္တေ နာဂသေန၊ ဓမ္မော တယာ ဒိဋ္ဌော’’တိ. ‘‘ဗုဒ္ဓနေတ္တိယာ ခေါ၊ မဟာရာဇ၊ ဗုဒ္ဓပညတ္တိယာ ယာဝဇီဝံ သာဝကေဟိ ဝတ္တိတဗ္ဗ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

ဓမ္မဒိဋ္ဌပဉှော စတုတ္ထော.

၅. အသင်္ကမနပဋိသန္ဒဟနပဉှော

၅. ရာဇာ အာဟ ‘‘ဘန္တေ နာဂသေန၊ န စ သင်္ကမတိ ပဋိသန္ဒဟတိ စာ’’တိ? ‘‘အာမ၊ မဟာရာဇ၊ န စ သင်္ကမတိ ပဋိသန္ဒဟတိ စာ’’တိ. ‘‘ကထံ၊ ဘန္တေ နာဂသေန၊ န စ သင်္ကမတိ ပဋိသန္ဒဟတိ စ၊ ဩပမ္မံ ကရောဟီ’’တိ? ‘‘ယထာ၊ မဟာရာဇ၊ ကောစိဒေဝ ပုရိသော ပဒီပတော ပဒီပံ ပဒီပေယျ၊ ကိံနု ခေါ သော၊ မဟာရာဇ၊ ပဒီပေါ ပဒီပမှာ သင်္ကန္တော’’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ န စ သင်္ကမတိ ပဋိသန္ဒဟတိ စာ’’တိ.

‘‘ဘိယျော ဩပမ္မံ ကရောဟီ’’တိ. ‘‘အဘိဇာနာသိ နု၊ တွံ မဟာရာဇ၊ ဒဟရကော သန္တော သိလောကာစရိယဿ သန္တိကေ ကိဉ္စိ သိလောကံ ဂဟိတ’’န္တိ? ‘‘အာမ၊ ဘန္တေ’’တိ. ‘‘ကိံနု ခေါ၊ မဟာရာဇ၊ သော သိလောကော အာစရိယမှာ သင်္ကန္တော’’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ န စ သင်္ကမတိ ပဋိသန္ဒဟတိ စာတိ.

‘‘ကလ္လောသိ၊ ဘန္တေ နာဂသေနာ’’တိ.

အသင်္ကမနပဋိသန္ဒဟနပဉှော ပဉ္စမော.

၆. ဝေဒဂူပဉှော

၆. ရာဇာ အာဟ ‘‘ဘန္တေ နာဂသေန၊ ဝေဒဂူ ဥပလဗ္ဘတီ’’တိ? ထေရော အာဟ ‘‘ပရမတ္ထေန ခေါ၊ မဟာရာဇ၊ ဝေဒဂူ နုပလဗ္ဘတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဝေဒဂူပဉှော ဆဋ္ဌော.

၇. အညကာယသင်္ကမနပဉှော

၇. ရာဇာ အာဟ ‘‘ဘန္တေ နာဂသေန၊ အတ္ထိ ကောစိ သတ္တော ယော ဣမမှာ ကာယာ အညံ ကာယံ သင်္ကမတီ’’တိ? ‘‘န ဟိ၊ မဟာရာဇာ’’တိ. ‘‘ယဒိ၊ ဘန္တေ နာဂသေန၊ ဣမမှာ ကာယာ အညံ ကာယံ သင်္ကမန္တော နတ္ထိ၊ နနု မုတ္တော ဘဝိဿတိ ပါပကေဟိ ကမ္မေဟီ’’တိ? ‘‘အာမ၊ မဟာရာဇ၊ ယဒိ န ပဋိသန္ဒဟေယျ၊ မုတ္တော ဘဝိဿတိ ပါပကေဟိ ကမ္မေဟီတိ၊ ယသ္မာ စ ခေါ၊ မဟာရာဇ၊ ပဋိသန္ဒဟတိ၊ တသ္မာ န ပရိမုတ္တော ပါပကေဟိ ကမ္မေဟီ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော အညတရဿ ပုရိသဿ အမ္ဗံ အဝဟရေယျ၊ ကိံ သော ဒဏ္ဍပ္ပတ္တော ဘဝေယျာ’’တိ? ‘‘အာမ၊ ဘန္တေ၊ ဒဏ္ဍပ္ပတ္တော ဘဝေယျာ’’တိ. ‘‘န ခေါ သော၊ မဟာရာဇ၊ တာနိ အမ္ဗာနိ အဝဟရိ၊ ယာနိ တေန ရောပိတာနိ၊ ကသ္မာ ဒဏ္ဍပ္ပတ္တော ဘဝေယျာ’’တိ? ‘‘တာနိ၊ ဘန္တေ၊ အမ္ဗာနိ နိဿာယ ဇာတာနိ၊ တသ္မာ ဒဏ္ဍပ္ပတ္တော ဘဝေယျာ’’တိ. ‘‘ဧဝမေဝ ခေါ၊ မဟာရာဇ၊ ဣမိနာ နာမရူပေန ကမ္မံ ကရောတိ သောဘနံ ဝါ အသောဘနံ ဝါ၊ တေန ကမ္မေန အညံ နာမရူပံ ပဋိသန္ဒဟတိ၊ တသ္မာ န ပရိမုတ္တော ပါပကေဟိ ကမ္မေဟီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

အညကာယသင်္ကမနပဉှော သတ္တမော.

၈. ကမ္မဖလအတ္ထိဘာဝပဉှော

၈. ရာဇာ အာဟ ‘‘ဘန္တေ နာဂသေန၊ ဣမိနာ နာမရူပေန ကမ္မံ ကတံ ကုသလံ ဝါ အကုသလံ ဝါ၊ ကုဟိံ တာနိ ကမ္မာနိ တိဋ္ဌန္တီ’’တိ? ‘‘အနုဗန္ဓေယျုံ ခေါ၊ မဟာရာဇ၊ တာနိ ကမ္မာနိ ဆာယာဝ အနပါယိနီ’’တိ [အနုပါယိနီတိ (က.)]. ‘‘သက္ကာ ပန၊ ဘန္တေ၊ တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’’’တိ? ‘‘န သက္ကာ၊ မဟာရာဇ၊ တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယာနိမာနိ ရုက္ခာနိ အနိဗ္ဗတ္တဖလာနိ၊ သက္ကာ တေသံ ဖလာနိ ဒဿေတုံ ‘ဣဓ ဝါ ဣဓ ဝါ တာနိ ဖလာနိ တိဋ္ဌန္တီ’’’တိ. ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ အဗ္ဗောစ္ဆိန္နာယ သန္တတိယာ န သက္ကာ တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’တိ.

‘‘ကလ္လောသိ၊ ဘန္တေ နာဂသေနာ’’တိ.

ကမ္မဖလအတ္ထိဘာဝပဉှော အဋ္ဌမော.

၉. ဥပ္ပဇ္ဇတိဇာနနပဉှော

၉. ရာဇာ အာဟ ‘‘ဘန္တေ နာဂသေန၊ ယော ဥပ္ပဇ္ဇတိ၊ ဇာနာတိ သော ‘ဥပ္ပဇ္ဇိဿာမီ’’’တိ? ‘‘အာမ၊ မဟာရာဇ၊ ယော ဥပ္ပဇ္ဇတိ ဇာနာတိ သော ‘ဥပ္ပဇ္ဇိဿာမီ’’’တိ. ‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကဿကော ဂဟပတိကော ဗီဇာနိ ပထဝိယံ နိက္ခိပိတွာ သမ္မာ ဒေဝေ ဝဿန္တေ ဇာနာတိ ‘ဓညံ နိဗ္ဗတ္တိဿတီ’’’တိ? ‘‘အာမ၊ ဘန္တေ၊ ဇာနေယျာ’’တိ. ‘‘ဧဝမေဝ ခေါ၊ မဟာရာဇ၊ ယော ဥပ္ပဇ္ဇတိ၊ ဇာနာတိ သော ‘ဥပ္ပဇ္ဇိဿာမီ’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဥပ္ပဇ္ဇတိဇာနနပဉှော နဝမော.

၁၀. ဗုဒ္ဓနိဒဿနပဉှော

၁၀. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ အတ္ထီ’’တိ? ‘‘အာမ၊ မဟာရာဇ၊ ဘဂဝါ အတ္ထီ’’တိ. ‘‘သက္ကာ ပန၊ ဘန္တေ နာဂသေန၊ ဗုဒ္ဓေါ နိဒဿေတုံ ဣဓဝါ ဣဓဝါ’’တိ? ‘‘ပရိနိဗ္ဗုတော၊ မဟာရာဇ၊ ဘဂဝါ အနုပါဒိသေသာယ နိဗ္ဗာနဓာတုယာ၊ န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ မဟတော အဂ္ဂိက္ခန္ဓဿ ဇလမာနဿ ယာ အစ္စိ အတ္ထင်္ဂတာ၊ သက္ကာ သာ အစ္စိ ဒဿေတုံ ‘ဣဓ ဝါ ဣဓ ဝါ’’’တိ? ‘‘န ဟိ၊ ဘန္တေ၊ နိရုဒ္ဓါ သာ အစ္စိ အပ္ပညတ္တိံ ဂတာ’’တိ. ‘‘ဧဝမေဝ ခေါ၊ မဟာရာဇ၊ ဘဂဝါ အနုပါဒိသေသာယ နိဗ္ဗာနဓာတုယာ ပရိနိဗ္ဗုတော အတ္ထင်္ဂတော၊ န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’ တိ၊ ဓမ္မကာယေန ပန ခေါ၊ မဟာရာဇ၊ သက္ကာ ဘဂဝါ နိဒဿေတုံ. ဓမ္မော ဟိ၊ မဟာရာဇ၊ ဘဂဝတာ ဒေသိတော’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓနိဒဿနပဉှော ဒသမော.

ဗုဒ္ဓဝဂ္ဂေါ ပဉ္စမော.

ဣမသ္မိံ ဝဂ္ဂေ ဒသ ပဉှာ.