၃. ပဉ္စာယတနကမ္မနိဗ္ဗတ္တပဉှော

၃. ရာဇာ အာဟ ‘‘ဘန္တေ နာဂသေန၊ ယာနိမာနိ ပဉ္စာယတနာနိ၊ ကိံ နု တာနိ နာနာကမ္မေဟိ နိဗ္ဗတ္တာနိ၊ ဥဒါဟု ဧကေန ကမ္မေနာ’’တိ? ‘‘နာနာကမ္မေဟိ၊ မဟာရာဇ၊ နိဗ္ဗတ္တာနိ၊ န ဧကေန ကမ္မေနာ’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ဧကသ္မိံ ခေတ္တေ နာနာဗီဇာနိ ဝပ္ပေယျုံ၊ တေသံ နာနာဗီဇာနံ နာနာဖလာနိ နိဗ္ဗတ္တေယျု’’န္တိ? ‘‘အာမ၊ ဘန္တေ၊ နိဗ္ဗတ္တေယျု’’န္တိ. ‘‘ဧဝမေဝ ခေါ၊ မဟာရာဇ၊ ယာနိ ယာနိ ပဉ္စာယတနာနိ၊ တာနိ တာနိ နာနာကမ္မေဟိ နိဗ္ဗတ္တာနိ၊ န ဧကေန ကမ္မေနာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ပဉ္စာယတနကမ္မနိဗ္ဗတ္တပဉှော တတိယော.