၄. နိဗ္ဗာနဝဂ္ဂေါ

၁. ဖဿာဒိဝိနိဗ္ဘုဇနပဉှော

၁. ရာဇာ အာဟ ‘‘ဘန္တေ နာဂသေန၊ သက္ကာ ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော၊ အယံ ဝေဒနာ၊ အယံ သညာ၊ အယံ စေတနာ၊ ဣဒံ ဝိညာဏံ၊ အယံ ဝိတက္ကော၊ အယံ ဝိစာရော’တိ’’? ‘‘န သက္ကာ၊ မဟာရာဇ၊ ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော၊ အယံ ဝေဒနာ၊ အယံ သညာ၊ အယံ စေတနာ၊ ဣဒံ ဝိညာဏံ၊ အယံ ဝိတက္ကော၊ အယံ ဝိစာရော’’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ရညော သူဒေါ အရသံ ဝါ ရသံ ဝါ [ယူသံ ဝါ ရသံ ဝါ (သီ. သျာ. ပီ.)] ကရေယျ၊ သော တတ္ထ ဒဓိမ္ပိ ပက္ခိပေယျ၊ လောဏမ္ပိ ပက္ခိပေယျ၊ သိင်္ဂိဝေရမ္ပိ ပက္ခိပေယျ၊ ဇီရကမ္ပိ ပက္ခိပေယျ၊ မရိစမ္ပိ ပက္ခိပေယျ၊ အညာနိပိ ပကာရာနိ ပက္ခိပေယျ၊ တမေနံ ရာဇာ ဧဝံ ဝဒေယျ၊ ‘ဒဓိဿ မေ ရသံ အာဟရ၊ လောဏဿ မေ ရသံ အာဟရ၊ သိင်္ဂိဝေရဿ မေ ရသံ အာဟရ၊ ဇီရကဿ မေ ရသံ အာဟရ၊ မရိစဿ မေ ရသံ အာဟရ၊ သဗ္ဗေသံ မေ ပက္ခိတ္တာနံ ရသံ အာဟရာ’တိ. သက္ကာ နု ခေါ၊ မဟာရာဇ၊ တေသံ ရသာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ ရသံ အာဟရိတုံ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ’’တိ? ‘‘န ဟိ၊ ဘန္တေ၊ သက္ကာ တေသံ ရသာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ ရသံ အာဟရိတုံ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ၊ အပိ စ ခေါ ပန သကေန သကေန လက္ခဏေန ဥပဋ္ဌဟန္တီ’’တိ. ‘‘ဧဝမေဝ ခေါ၊ မဟာရာဇ၊ န သက္ကာ ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော၊ အယံ ဝေဒနာ၊ အယံ သညာ၊ အယံ စေတနာ၊ ဣဒံ ဝိညာဏံ၊ အယံ ဝိတက္ကော၊ အယံ ဝိစာရော’တိ၊ အပိ စ ခေါ ပန သကေန သကေန လက္ခဏေန ဥပဋ္ဌဟန္တီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဖဿာဒိဝိနိဗ္ဘုဇနပဉှော ပဌမော.

၂. နာဂသေနပဉှော

၂. ထေရော အာဟ ‘‘လောဏံ၊ မဟာရာဇ၊ စက္ခုဝိညေယျ’’န္တိ. ‘‘အာမ၊ ဘန္တေ၊ စက္ခုဝိညေယျ’’န္တိ. ‘‘သုဋ္ဌု ခေါ၊ မဟာရာဇ၊ ဇာနာဟီ’’တိ. ‘‘ကိံ ပန၊ ဘန္တေ၊ ဇိဝှါဝိညေယျ’’န္တိ? ‘‘အာမ၊ မဟာရာဇ၊ ဇိဝှါဝိညေယျ’’န္တိ. ‘‘ကိံ ပန၊ ဘန္တေ၊ သဗ္ဗံ လောဏံ ဇိဝှါယ ဝိဇာနာတီ’’တိ? ‘‘အာမ၊ မဟာရာဇ၊ သဗ္ဗံ လောဏံ ဇိဝှါယ ဝိဇာနာတိ’’.

‘‘ယဒိ၊ ဘန္တေ၊ သဗ္ဗံ လောဏံ ဇိဝှါယ ဝိဇာနာတိ၊ ကိဿ ပန တံ သကဋေဟိ ဗလီဗဒ္ဒါ [ဗလိဗဒ္ဒါ (သီ. ပီ.)] အာဟရန္တိ၊ နနု လောဏမေဝ အာဟရိတဗ္ဗ’’န္တိ? ‘‘န သက္ကာ၊ မဟာရာဇ၊ လောဏမေဝ အာဟရိတုံ ဧကတောဘာဝဂတာ ဧတေ ဓမ္မာ ဂေါစရနာနတ္တဂတာ လောဏံ ဂရုဘာဝေါ စာတိ. သက္ကာ ပန၊ မဟာရာဇ၊ လောဏံ တုလာယ တုလယိတု’’န္တိ? ‘‘အာမ၊ ဘန္တေ၊ သက္ကာ’’တိ. ‘‘န သက္ကာ၊ မဟာရာဇ၊ လောဏံ တုလာယ တုလယိတုံ၊ ဂရုဘာဝေါ တုလာယ တုလိယတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

နာဂသေနပဉှော ဒုတိယော.

၃. ပဉ္စာယတနကမ္မနိဗ္ဗတ္တပဉှော

၃. ရာဇာ အာဟ ‘‘ဘန္တေ နာဂသေန၊ ယာနိမာနိ ပဉ္စာယတနာနိ၊ ကိံ နု တာနိ နာနာကမ္မေဟိ နိဗ္ဗတ္တာနိ၊ ဥဒါဟု ဧကေန ကမ္မေနာ’’တိ? ‘‘နာနာကမ္မေဟိ၊ မဟာရာဇ၊ နိဗ္ဗတ္တာနိ၊ န ဧကေန ကမ္မေနာ’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ဧကသ္မိံ ခေတ္တေ နာနာဗီဇာနိ ဝပ္ပေယျုံ၊ တေသံ နာနာဗီဇာနံ နာနာဖလာနိ နိဗ္ဗတ္တေယျု’’န္တိ? ‘‘အာမ၊ ဘန္တေ၊ နိဗ္ဗတ္တေယျု’’န္တိ. ‘‘ဧဝမေဝ ခေါ၊ မဟာရာဇ၊ ယာနိ ယာနိ ပဉ္စာယတနာနိ၊ တာနိ တာနိ နာနာကမ္မေဟိ နိဗ္ဗတ္တာနိ၊ န ဧကေန ကမ္မေနာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ပဉ္စာယတနကမ္မနိဗ္ဗတ္တပဉှော တတိယော.

၄. ကမ္မနာနာကရဏပဉှော

၄. ရာဇာ အာဟ ‘‘ဘန္တေ နာဂသေန၊ ကေန ကာရဏေန မနုဿာ န သဗ္ဗေ သမကာ၊ အညေ အပ္ပါယုကာ၊ အညေ ဒီဃာယုကာ၊ အညေ ဗဟွာဗာဓာ အညေ အပ္ပါဗာဓာ၊ အညေ ဒုဗ္ဗဏ္ဏာ၊ အညေ ဝဏ္ဏဝန္တော၊ အညေ အပ္ပေသက္ခာ၊ အညေ မဟေသက္ခာ၊ အညေ အပ္ပဘောဂါ၊ အညေ မဟာဘောဂါ၊ အညေ နီစကုလီနာ၊ အညေ မဟာကုလီနာ၊ အညေ ဒုပ္ပညာ၊ အညေ ပညဝန္တော’’တိ?

ထေရော အာဟ ‘‘ကိဿ ပန၊ မဟာရာဇ၊ ရုက္ခာ န သဗ္ဗေ သမကာ၊ အညေ အမ္ဗိလာ၊ အညေ လဝဏာ၊ အညေ တိတ္တကာ၊ အညေ ကဋုကာ၊ အညေ ကသာဝါ၊ အညေ မဓုရာ’’တိ? ‘‘မညာမိ၊ ဘန္တေ၊ ဗီဇာနံ နာနာကရဏေနာ’’တိ. ‘‘ဧဝမေဝ ခေါ၊ မဟာရာဇ၊ ကမ္မာနံ နာနာကရဏေန မနုဿာ န သဗ္ဗေ သမကာ၊ အညေ အပ္ပါယုကာ၊ အညေ ဒီဃာယုကာ၊ အညေ ဗဟွာဗာဓာ၊ အညေ အပ္ပါဗာဓာ၊ အညေ ဒုဗ္ဗဏ္ဏာ၊ အညေ ဝဏ္ဏဝန္တော၊ အညေ အပ္ပေသက္ခာ၊ အညေ မဟေသက္ခာ၊ အညေ အပ္ပဘောဂါ၊ အညေ မဟာဘောဂါ၊ အညေ နီစကုလီနာ၊ အညေ မဟာကုလီနာ၊ အညေ ဒုပ္ပညာ၊ အညေ ပညဝန္တော. ဘာသိတမ္ပေတံ မဟာရာဇ ဘဂဝတာ – ‘ကမ္မဿကာ၊ မာဏဝ၊ သတ္တာ ကမ္မဒါယာဒါ ကမ္မယောနီ ကမ္မဗန္ဓူ ကမ္မပ္ပဋိသရဏာ၊ ကမ္မံ သတ္တေ ဝိဘဇတိ ယဒိဒံ ဟီနပ္ပဏီတတာယာ’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ကမ္မနာနာကရဏပဉှော စတုတ္ထော.

၅. ဝါယာမကရဏပဉှော

၅. ရာဇာ အာဟ ‘‘ဘန္တေ နာဂသေန၊ တုမှေ ဘဏထ ‘ကိန္တိ ဣမံ ဒုက္ခံ နိရုဇ္ဈေယျ၊ အညဉ္စ ဒုက္ခံ နုပ္ပဇ္ဇေယျာ’တိ. ဧတဒတ္ထာ၊ မဟာရာဇ၊ အမှာကံ ပဗ္ဗဇ္ဇာ’’တိ. ‘‘ကိံ ပဋိကစ္စေဝ ဝါယမိတေန၊ နနု သမ္ပတ္တေ ကာလေ ဝါယမိတဗ္ဗ’’န္တိ? ထေရော အာဟ ‘‘သမ္ပတ္တေ ကာလေ၊ မဟာရာဇ၊ ဝါယာမော အကိစ္စကရော ဘဝတိ၊ ပဋိကစ္စေဝ ဝါယာမော ကိစ္စကရော ဘဝတီ’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယဒါ တွံ ပိပါသိတော ဘဝေယျာသိ၊ တဒါ တွံ ဥဒပါနံ ခဏာပေယျာသိ၊ တဠာကံ ခဏာပေယျာသိ ‘ပါနီယံ ပိဝိဿာမီ’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ သမ္ပတ္တေ ကာလေ ဝါယာမော အကိစ္စကရော ဘဝတိ၊ ပဋိကစ္စေဝ ဝါယာမော ကိစ္စကရော ဘဝတီ’’တိ.

‘‘ဘိယျော ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယဒါ တွံ ဗုဘုက္ခိတော ဘဝေယျာသိ၊ တဒါ တွံ ခေတ္တံ ကသာပေယျာသိ၊ သာလိံ ရောပါပေယျာသိ၊ ဓညံ အတိဟရာပေယျာသိ ‘ဘတ္တံ ဘုဉ္ဇိဿာမီ’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ သမ္ပတ္တေ ကာလေ ဝါယာမော အကိစ္စကရော ဘဝတိ၊ ပဋိကစ္စေဝ ဝါယာမော ကိစ္စကရော ဘဝတီတိ.

‘‘ဘိယျော ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယဒါ တေ သင်္ဂါမော ပစ္စုပဋ္ဌိတော ဘဝေယျ၊ တဒါ တွံ ပရိခံ ခဏာပေယျာသိ၊ ပါကာရံ ကာရာပေယျာသိ၊ ဂေါပုရံ ကာရာပေယျာသိ၊ အဋ္ဋာလကံ ကာရာပေယျာသိ၊ ဓညံ အတိဟရာပေယျာသိ၊ တဒါ တွံ ဟတ္ထိသ္မိံ သိက္ခေယျာသိ၊ အဿသ္မိံ သိက္ခေယျာသိ၊ ရထသ္မိံ သိက္ခေယျာသိ၊ ဓနုသ္မိံ သိက္ခေယျာသိ၊ ထရုသ္မိံ သိက္ခေယျာသီ’’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ သမ္ပတ္တေ ကာလေ ဝါယာမော အကိစ္စကရော ဘဝတိ၊ ပဋိကစ္စေဝ ဝါယာမော ကိစ္စကရော ဘဝတိ. ဘာသိတမ္ပေတံ မဟာရာဇ ဘဂဝတာ –

‘‘‘ပဋိကစ္စေဝ တံ ကယိရာ၊ ယံ ဇညာ ဟိတမတ္တနော၊

န သာကဋိကစိန္တာယ၊ မန္တာ ဓီရော ပရက္ကမေ.

‘‘‘ယထာ သာကဋိကော မဋ္ဌံ [နာမ (သီ. ပီ. က.) သံ. နိ. ၁.၁၀၃]၊ သမံ ဟိတွာ မဟာပထံ၊

ဝိသမံ မဂ္ဂမာရုယှ၊ အက္ခစ္ဆိန္နောဝ ဈာယတိ.

‘‘‘ဧဝံ ဓမ္မာ အပက္ကမ္မ၊ အဓမ္မမနုဝတ္တိယ၊

မန္ဒော မစ္စု မုခံ ပတ္တော၊ အက္ခစ္ဆိန္နောဝ ဈာယတီ’’’တိ [သောစတီတိ (သဗ္ဗတ္ထ)].

‘‘ကလ္လောသိ၊ ဘန္တေ နာဂသေနာ’’တိ.

ဝါယာမကရဏပဉှော ပဉ္စမော.

၆. နေရယိကဂ္ဂိဥဏှဘာဝပဉှော

၆. ရာဇာ အာဟ ‘‘ဘန္တေ နာဂသေန၊ တုမှေ ဘဏထ ‘ပါကတိကအဂ္ဂိတော နေရယိကော အဂ္ဂိ မဟာဘိတာပတရော ဟောတိ၊ ခုဒ္ဒကောပိ ပါသာဏော ပါကတိကေ အဂ္ဂိမှိ ပက္ခိတ္တော ဒိဝသမ္ပိ ပစ္စမာနော [ဓမမာနော (သီ. ပီ.)] န ဝိလယံ ဂစ္ဆတိ၊ ကူဋာဂါရမတ္တောပိ ပါသာဏော နေရယိကဂ္ဂိမှိ ပက္ခိတ္တော ခဏေန ဝိလယံ ဂစ္ဆတီ’တိ၊ ဧတံ ဝစနံ န သဒ္ဒဟာမိ၊ ဧဝဉ္စ ပန ဝဒေထ ‘ယေ စ တတ္ထ ဥပ္ပန္နာ သတ္တာ၊ တေ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တီ’တိ၊ တမ္ပိ ဝစနံ န သဒ္ဒဟာမီ’’တိ.

ထေရော အာဟ ‘‘တံ ကိံ မညသိ၊ မဟာရာဇ၊ ယာ တာ သန္တိ မကရိနိယောပိ သုသုမာရိနိယောပိ ကစ္ဆပိနိယောပိ မောရိနိယောပိ ကပေါတိနိယောပိ၊ ကိံနု တာ ကက္ခဠာနိ ပါသာဏာနိ သက္ခရာယော စ ခါဒန္တီ’’တိ? ‘‘အာမ၊ ဘန္တေ၊ ခါဒန္တီ’’တိ. ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ၊ ဘန္တေ၊ ဝိလယံ ဂစ္ဆန္တီ’’တိ. ‘‘ယော ပန တာသံ ကုစ္ဆိယံ ဂဗ္ဘော၊ သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ. ‘‘ကေန ကာရဏေနာ’’တိ? ‘‘မညာမိ၊ ဘန္တေ၊ ကမ္မာဓိကတေန န ဝိလယံ ဂစ္ဆတီ’’တိ. ‘‘ဧဝမေဝ ခေါ၊ မဟာရာဇ၊ ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တိ. ဘာသိတမ္ပေတံ၊ မဟာရာဇ၊ ဘဂဝတာ – ‘သော န တာဝ ကာလံ ကရောတိ၊ ယာဝ န တံ ပါပကမ္မံ ဗျန္တီဟောတီ’’’တိ.

‘‘ဘိယျော ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယာ တာ သန္တိ သီဟိနိယောပိ ဗျဂ္ဃိနိယောပိ ဒီပိနိယောပိ ကုက္ကုရိနိယောပိ၊ ကိံနု တာ ကက္ခဠာနိ အဋ္ဌိကာနိ မံသာနိ ခါဒန္တီတိ? ‘‘အာမ၊ ဘန္တေ၊ ခါဒန္တီ’’တိ. ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ၊ ဘန္တေ၊ ဝိလယံ ဂစ္ဆန္တီ’’တိ. ‘‘ယော ပန တာသံ ကုစ္ဆိယံ ဂဗ္ဘော၊ သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ. ‘‘ကေန ကာရဏေနာ’’တိ? ‘‘မညာမိ၊ ဘန္တေ၊ ကမ္မာဓိကတေန န ဝိလယံ ဂစ္ဆတီ’’တိ. ‘‘ဧဝမေဝ ခေါ၊ မဟာရာဇ၊ ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တီ’’တိ.

‘‘ဘိယျော ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယာ တာ သန္တိ ယောနကသုခုမာလိနိယောပိ ခတ္တိယသုခုမာလိနိယောပိ ဗြာဟ္မဏသုခုမာလိနိယောပိ ဂဟပတိသုခုမာလိနိယောပိ၊ ကိံနု တာ ကက္ခဠာနိ ခဇ္ဇကာနိ မံသာနိ ခါဒန္တီ’’တိ? ‘‘အာမ၊ ဘန္တေ၊ ခါဒန္တီ’’တိ. ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ၊ ဘန္တေ၊ ဝိလယံ ဂစ္ဆန္တီ’’တိ. ‘‘ယော ပန တာသံ ကုစ္ဆိယံ ဂဗ္ဘော သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ. ‘‘ကေန ကာရဏေနာ’’တိ. ‘‘မညာမိ၊ ဘန္တေ၊ ကမ္မာဓိကတေန န ဝိလယံ ဂစ္ဆတီ’’တိ. ‘‘ဧဝမေဝ ခေါ၊ မဟာရာဇ၊ ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တိ. ဘာသိတမ္ပေတံ၊ မဟာရာဇ၊ ဘဂဝတာ – ‘‘သော န တာဝ ကာလံ ကရောတိ၊ ယာဝ န တံ ပါပကမ္မံ ဗျန္တီဟောတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

နေရယိကဂ္ဂိဥဏှဘာဝပဉှော ဆဋ္ဌော.

၇. ပထဝိသန္ဓာရကပဉှော

၇. ရာဇာ အာဟ ‘‘ဘန္တေ နာဂသေန၊ တုမှေ ဘဏထ ‘အယံ မဟာ ပထဝီ ဥဒကေ ပတိဋ္ဌိတာ၊ ဥဒကံ ဝါတေ ပတိဋ္ဌိတံ၊ ဝါတော အာကာသေ ပတိဋ္ဌိတော’တိ၊ ဧတမ္ပိ ဝစနံ န သဒ္ဒဟာမီ’’တိ. ထေရော ဓမ္မကရကေန [ဓမ္မကရဏေန (က.)] ဥဒကံ ဂဟေတွာ ရာဇာနံ မိလိန္ဒံ သညာပေသိ ‘‘ယထာ၊ မဟာရာဇ၊ ဣမံ ဥဒကံ ဝါတေန အာဓာရိတံ၊ ဧဝံ တမ္ပိ ဥဒကံ ဝါတေန အာဓာရိတ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

ပထဝိသန္ဓာရကပဉှော သတ္တမော.

၈. နိရောဓနိဗ္ဗာနပဉှော

၈. ရာဇာ အာဟ ‘‘ဘန္တေ နာဂသေန၊ နိရောဓော နိဗ္ဗာန’’န္တိ? ‘‘အာမ၊ မဟာရာဇ၊ နိရောဓော နိဗ္ဗာန’’န္တိ. ‘‘ကထံ၊ ဘန္တေ၊ နာဂသေန၊ နိရောဓော နိဗ္ဗာန’’န္တိ? ‘‘သဗ္ဗေ ဗာလပုထုဇ္ဇနာ ခေါ၊ မဟာရာဇ၊ အဇ္ဈတ္တိကဗာဟိရေ အာယတနေ အဘိနန္ဒန္တိ အဘိဝဒန္တိ အဇ္ဈောသာယ တိဋ္ဌန္တိ၊ တေ တေန သောတေန ဝုယှန္တိ၊ န ပရိမုစ္စန္တိ ဇာတိယာ ဇရာယ မရဏေန သောကေန ပရိဒေဝေန ဒုက္ခေဟိ ဒေါမနဿေဟိ ဥပါယာသေဟိ န ပရိမုစ္စန္တိ ဒုက္ခသ္မာတိ ဝဒါမိ. သုတဝါ စ ခေါ၊ မဟာရာဇ၊ အရိယသာဝကော အဇ္ဈတ္တိကဗာဟိရေ အာယတနေ နာဘိနန္ဒတိ နာဘိဝဒတိ နာဇ္ဈောသာယ တိဋ္ဌတိ၊ တဿ တံ အနဘိနန္ဒတော အနဘိဝဒတော အနဇ္ဈောသာယ တိဋ္ဌတော တဏှာ နိရုဇ္ဈတိ၊ တဏှာနိရောဓာ ဥပါဒါနနိရောဓော၊ ဥပါဒါနနိရောဓာ ဘဝနိရောဓော၊ ဘဝနိရောဓာ ဇာတိနိရောဓော၊ ဇာတိနိရောဓာ ဇရာမရဏံ သောကပရိဒေဝဒုက္ခဒေါမနဿုပါယာသာ နိရုဇ္ဈန္တိ၊ ဧဝမေတဿ ကေဝလဿ ဒုက္ခက္ခန္ဓဿ နိရောဓော ဟောတိ၊ ဧဝံ ခေါ၊ မဟာရာဇ၊ နိရောဓော နိဗ္ဗာန’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

နိရောဓနိဗ္ဗာနပဉှော အဋ္ဌမော.

၉. နိဗ္ဗာနလဘနပဉှော

၉. ရာဇာ အာဟ ‘‘ဘန္တေ နာဂသေန၊ သဗ္ဗေဝ လဘန္တိ နိဗ္ဗာန’’န္တိ? ‘‘န ခေါ၊ မဟာရာဇ၊ သဗ္ဗေဝ လဘန္တိ နိဗ္ဗာနံ၊ အပိ စ ခေါ၊ မဟာရာဇ၊ ယော သမ္မာ ပဋိပန္နော အဘိညေယျေ ဓမ္မေ အဘိဇာနာတိ၊ ပရိညေယျေ ဓမ္မေ ပရိဇာနာတိ၊ ပဟာတဗ္ဗေ ဓမ္မေ ပဇဟတိ၊ ဘာဝေတဗ္ဗေ ဓမ္မေ ဘာဝေတိ၊ သစ္ဆိကာတဗ္ဗေ ဓမ္မေ သစ္ဆိကရောတိ၊ သော လဘတိ နိဗ္ဗာန’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

နိဗ္ဗာနလဘနပဉှော နဝမော.

၁၀. နိဗ္ဗာနသုခဇာနနပဉှော

၁၀. ရာဇာ အာဟ ‘‘ဘန္တေ နာဂသေန၊ ယော န လဘတိ နိဗ္ဗာနံ၊ ဇာနာတိ သော ‘သုခံ နိဗ္ဗာန’’’န္တိ? ‘‘အာမ၊ မဟာရာဇ၊ ယော န လဘတိ နိဗ္ဗာနံ၊ ဇာနာတိ သော ‘သုခံ နိဗ္ဗာန’’’န္တိ. ‘‘ကထံ၊ ဘန္တေ နာဂသေန၊ အလဘန္တော ဇာနာတိ ‘သုခံ နိဗ္ဗာန’’’န္တိ? ‘‘တံ ကိံ မညသိ၊ မဟာရာဇ၊ ယေသံ နစ္ဆိန္နာ ဟတ္ထပါဒါ၊ ဇာနေယျုံ တေ၊ မဟာရာဇ၊ ‘ဒုက္ခံ ဟတ္ထပါဒစ္ဆေဒန’’’န္တိ? ‘‘အာမ၊ ဘန္တေ၊ ဇာနေယျု’’န္တိ. ‘‘ကထံ ဇာနေယျု’’န္တိ? ‘‘အညေသံ၊ ဘန္တေ၊ ဆိန္နဟတ္ထပါဒါနံ ပရိဒေဝိတသဒ္ဒံ သုတွာ ဇာနန္တိ ‘ဒုက္ခံ ဟတ္ထပါဒစ္ဆေဒန’’’န္တိ. ‘‘ဧဝမေဝ ခေါ၊ မဟာရာဇ၊ ယေသံ ဒိဋ္ဌံ နိဗ္ဗာနံ၊ တေသံ သဒ္ဒံ သုတွာ ဇာနာတိ ‘သုခံ နိဗ္ဗာန’’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

နိဗ္ဗာနသုခဇာနနပဉှော ဒသမော.

နိဗ္ဗာနဝဂ္ဂေါ စတုတ္ထော.

ဣမသ္မိံ ဝဂ္ဂေ ဒသ ပဉှာ.