၄. ကမ္မနာနာကရဏပဉှော

၄. ရာဇာ အာဟ ‘‘ဘန္တေ နာဂသေန၊ ကေန ကာရဏေန မနုဿာ န သဗ္ဗေ သမကာ၊ အညေ အပ္ပါယုကာ၊ အညေ ဒီဃာယုကာ၊ အညေ ဗဟွာဗာဓာ အညေ အပ္ပါဗာဓာ၊ အညေ ဒုဗ္ဗဏ္ဏာ၊ အညေ ဝဏ္ဏဝန္တော၊ အညေ အပ္ပေသက္ခာ၊ အညေ မဟေသက္ခာ၊ အညေ အပ္ပဘောဂါ၊ အညေ မဟာဘောဂါ၊ အညေ နီစကုလီနာ၊ အညေ မဟာကုလီနာ၊ အညေ ဒုပ္ပညာ၊ အညေ ပညဝန္တော’’တိ?

ထေရော အာဟ ‘‘ကိဿ ပန၊ မဟာရာဇ၊ ရုက္ခာ န သဗ္ဗေ သမကာ၊ အညေ အမ္ဗိလာ၊ အညေ လဝဏာ၊ အညေ တိတ္တကာ၊ အညေ ကဋုကာ၊ အညေ ကသာဝါ၊ အညေ မဓုရာ’’တိ? ‘‘မညာမိ၊ ဘန္တေ၊ ဗီဇာနံ နာနာကရဏေနာ’’တိ. ‘‘ဧဝမေဝ ခေါ၊ မဟာရာဇ၊ ကမ္မာနံ နာနာကရဏေန မနုဿာ န သဗ္ဗေ သမကာ၊ အညေ အပ္ပါယုကာ၊ အညေ ဒီဃာယုကာ၊ အညေ ဗဟွာဗာဓာ၊ အညေ အပ္ပါဗာဓာ၊ အညေ ဒုဗ္ဗဏ္ဏာ၊ အညေ ဝဏ္ဏဝန္တော၊ အညေ အပ္ပေသက္ခာ၊ အညေ မဟေသက္ခာ၊ အညေ အပ္ပဘောဂါ၊ အညေ မဟာဘောဂါ၊ အညေ နီစကုလီနာ၊ အညေ မဟာကုလီနာ၊ အညေ ဒုပ္ပညာ၊ အညေ ပညဝန္တော. ဘာသိတမ္ပေတံ မဟာရာဇ ဘဂဝတာ – ‘ကမ္မဿကာ၊ မာဏဝ၊ သတ္တာ ကမ္မဒါယာဒါ ကမ္မယောနီ ကမ္မဗန္ဓူ ကမ္မပ္ပဋိသရဏာ၊ ကမ္မံ သတ္တေ ဝိဘဇတိ ယဒိဒံ ဟီနပ္ပဏီတတာယာ’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ကမ္မနာနာကရဏပဉှော စတုတ္ထော.