၁၀. နိဗ္ဗာနသုခဇာနနပဉှော

၁၀. ရာဇာ အာဟ ‘‘ဘန္တေ နာဂသေန၊ ယော န လဘတိ နိဗ္ဗာနံ၊ ဇာနာတိ သော ‘သုခံ နိဗ္ဗာန’’’န္တိ? ‘‘အာမ၊ မဟာရာဇ၊ ယော န လဘတိ နိဗ္ဗာနံ၊ ဇာနာတိ သော ‘သုခံ နိဗ္ဗာန’’’န္တိ. ‘‘ကထံ၊ ဘန္တေ နာဂသေန၊ အလဘန္တော ဇာနာတိ ‘သုခံ နိဗ္ဗာန’’’န္တိ? ‘‘တံ ကိံ မညသိ၊ မဟာရာဇ၊ ယေသံ နစ္ဆိန္နာ ဟတ္ထပါဒါ၊ ဇာနေယျုံ တေ၊ မဟာရာဇ၊ ‘ဒုက္ခံ ဟတ္ထပါဒစ္ဆေဒန’’’န္တိ? ‘‘အာမ၊ ဘန္တေ၊ ဇာနေယျု’’န္တိ. ‘‘ကထံ ဇာနေယျု’’န္တိ? ‘‘အညေသံ၊ ဘန္တေ၊ ဆိန္နဟတ္ထပါဒါနံ ပရိဒေဝိတသဒ္ဒံ သုတွာ ဇာနန္တိ ‘ဒုက္ခံ ဟတ္ထပါဒစ္ဆေဒန’’’န္တိ. ‘‘ဧဝမေဝ ခေါ၊ မဟာရာဇ၊ ယေသံ ဒိဋ္ဌံ နိဗ္ဗာနံ၊ တေသံ သဒ္ဒံ သုတွာ ဇာနာတိ ‘သုခံ နိဗ္ဗာန’’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

နိဗ္ဗာနသုခဇာနနပဉှော ဒသမော.

နိဗ္ဗာနဝဂ္ဂေါ စတုတ္ထော.

ဣမသ္မိံ ဝဂ္ဂေ ဒသ ပဉှာ.